ರಾಯಚೂರು: 43.8ಡಿಗ್ರಿ ದಾಖಲು

ರಾಯಚೂರು: ಪ್ರಸಕ್ತ ಬೇಸಿಗೆಯಲ್ಲಿಯೇ ಅತೀ ಹೆಚ್ಚಿನ ತಾಪಮಾನ 43.8 ಡಿಗ್ರಿ ಸೆಲ್ಸಿಯಸ್ ನಗರದಲ್ಲಿ ಶುಕ್ರವಾರ ದಾಖಲಾಯಿತು.

ಬೆಳಗ್ಗೆಯಿಂದಲೇ ಬಿರುಬಿಸಿಲ ತಾಪಕ್ಕೆ ಸಿಲುಕಿದ ಜನತೆ ದಿನವಿಡೀ ಪರದಾಡಿದರು. ಮಧ್ಯಾಹ್ನ ವೇಳೆ ರಸ್ತೆಯಲ್ಲಿ ಸಂಚಾರ ತೀರಾ ವಿರಳವಾಗಿತ್ತು. ಸರಕಾರಿ ಕಚೇರಿ ಸೇರಿ ಇತರ ಕೆಲಸಗಳಿಗೆ ಆಗಮಿಸಿದ್ದ ಜಿಲ್ಲೆಯ ನಾನಾ ಕಡೆಯ ಜನ ಬಿರುಬಿಸಿಲಿನಿಂದ ಪಾರಾಗಲು ನೆರಳಿನ ಆಶ್ರಯ ಪಡೆದರು.

ಬಿರುಬಿಸಿಲ ಮಧ್ಯೆ ವಿದ್ಯುತ್ ಆಗಾಗ್ಗೆ ಕಡಿತಗೊಂಡು ಜನತೆ ಜೆಸ್ಕಾಂಗೆ ಹಿಡಿಶಾಪ ಹಾಕಿದರು. ಪ್ರಸಕ್ತ ಬೇಸಿಗೆಯಲ್ಲಿ ಇದುವರೆಗೆ 43.7ಡಿಗ್ರಿ ಸೆಲ್ಸಿಯಸ್ ಅತೀ ಹೆಚ್ಚಿನ ತಾಪಮಾನವಾಗಿತ್ತು. ಶುಕ್ರವಾರ ಈ ಪ್ರಮಾಣ 43.8ಕ್ಕೆ ಏರಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.