ಲಂಚ ಸ್ವೀಕಾರ: ಎಸಿಬಿ ಬಲೆಗೆ ಪ್ರಭಾರಿ ಸಿಡಿಪಿಒ

ಲಿಂಗಸುಗೂರು (ರಾಯಚೂರು): ಅಂಗನವಾಡಿ ಕೇಂದ್ರಗಳಿಗೆ ಮೊಟ್ಟೆ ಪೂರೈಕೆ ಮಾಡಿದ ಬಿಲ್ ಪಾವತಿಗೆ ಲಂಚ ಸ್ವೀಕರಿಸಿದ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯ ಪ್ರಭಾರಿ ಅಧಿಕಾರಿ (ಸಿಡಿಪಿಒ) ಶಂಕರಮೂರ್ತಿ, ಮಂಗಳವಾರ ಸಂಜೆ ಭ್ರಷ್ಟಾಚಾರ ನಿಗ್ರಹ ದಳ (ಎಸಿಬಿ)ದ ಬಲೆಗೆ ಸಿಲುಕಿದ್ದಾರೆ.

ಮಾನ್ವಿ ತಾಲೂಕಿನ 243 ಅಂಗನವಾಡಿ ಕೇಂದ್ರಗಳಿಗೆ ಮೊಟ್ಟೆ ಪೂರೈಸಿದ ಬಿಲ್ ಪಾವತಿಗೆ ಶಂಕರಮೂರ್ತಿ ಅವರು, 2 ಲಕ್ಷ ರೂ. ಲಂಚದ ಬೇಡಿಕೆ ಇಟ್ಟಿದ್ದರು. ಈ ಕುರಿತು ನಮಿತಾ ಸ್ವಸಹಾಯ ಸಂಘದ ಅಮರೇಗೌಡ ಗವಿಗಟ್ಟ ಅವರು ಎಸಿಬಿಗೆ ದೂರು ನೀಡಿದ್ದರು. ಈ ದೂರು ಆಧರಿಸಿ, ಎಸಿಬಿ ಅಧಿಕಾರಿಗಳು ದಾಳಿ ನಡೆಸಿದರು. ಲಂಚದ ಮೊದಲ ಕಂತಿನ 1ಲಕ್ಷ ರೂ. ಪಡೆಯುತ್ತಿದ್ದಾಗ ಅಧಿಕಾರಿಯನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಎಸಿಬಿ ಡಿವೈಎಸ್‌ಪಿ ಅರುಣಕುಮಾರ ತಿಳಿಸಿದ್ದಾರೆ.

ಈ ತಂಡದಲ್ಲಿ ಸಿಪಿಐಗಳಾದ ಶ್ರೀಧರ, ರವಿನಾಥ, ಮುಖ್ಯಪೇದೆಗಳಾದ ಬಷೀರ್‌ಅಹ್ಮದ್, ಮುರುಳಿ, ಪೇದೆಗಳಾದ ಮನಿಷಾ, ಬಸವರಾಜೇಶ್ವರಿ, ವಿಕ್ರಮರೆಡ್ಡಿ, ಬಸಯ್ಯಸ್ವಾಮಿ ಇದ್ದರು.