‘ಮದ್ಯದಂಗಡಿ ಪರವಾನಗಿ ರದ್ದುಗೊಳಿಸಿ’

ರಾಯಚೂರು : ನಗರದ ಬಿಆರ್‌ಬಿ ವಾಣಿಜ್ಯ ಮಹಾವಿದ್ಯಾಲಯದ ಹತ್ತಿರ ಮದ್ಯದಂಗಡಿಗೆ ಪರವಾನಗಿ ನೀಡಿರುವುದನ್ನು ರದ್ದುಪಡಿಸಬೇಕೆಂದು ಒತ್ತಾಯಿಸಿ ಡಾ.ಬಿ.ಆರ್‌.ಅಂಬೇಡ್ಕರ್‌ ಜಾಗೃತಿ ಸಂಘದ ಪದಾಧಿಕಾರಿಗಳು ಜಿಲ್ಲಾಧಿಕಾರಿಗಳ ಕಚೇರಿ ಮುಂದೆ ಬುಧವಾರ ಪ್ರತಿಭಟಿಸಿದರು.

ನಂತರ ಡಿಸಿ ಕಚೇರಿ ಸ್ಥಾನಿಕ ಅಧಿಕಾರಿಗೆ ಮನವಿ ಸಲ್ಲಿಸಿದ ಪದಾಧಿಕಾರಿಗಳು, ಮಹಾವಿದ್ಯಾಲಯ ಹಾಗೂ ಕೊಳಚೆ ಪ್ರದೇಶದಲ್ಲಿ ಮದ್ಯದಂಗಡಿ ಪರವಾನಗಿ ನೀಡಿರುವುದು ಕಾನೂನು ಬಾಹಿರವಾಗಿದೆ. ಕೊಳಚೆ ಪ್ರದೇಶದಲ್ಲಿ ಬಡ ಮತ್ತು ಕೂಲಿಕಾರ್ಮಿಕರು ಹೆಚ್ಚಾಗಿ ವಾಸವಾಗಿದ್ದು, ಮದ್ಯದಂಗಡಿ ಪರವಾನಗಿಯಿಂದ ಸ್ವಚ್ಛ ವಾತಾವರಣ ಹಾಳಾಗಲಿದೆ. ಬಡಾವಣೆಯ ಸುತ್ತಮುತ್ತಲೂ ಕಲುಷಿತ ವಾತಾವರಣ ಉಂಟಾಗಲಿದ್ದು, ಅನೇಕ ತೊಂದರೆಗಳಿಗೆ ದಾರಿಯಾಗಲಿದೆ. ಹಾಗಾಗಿ, ಪರವಾನಗಿ ರದ್ದುಪಡಿಸುವಂತೆ ಮನವಿ ಮಾಡಿದರು. ಸಂಘದ ಅಧ್ಯಕ್ಷ ವಿ.ಆರ್‌.ಶಾಂತಕುಮಾರ, ಚನ್ನಪ್ಪ, ಗೋಪಾಲ ನಾಯಕ, ರಾಮಪ್ಪ, ಆಂಜಿನಯ್ಯ, ಶ್ರೀನಿವಾಸ ಇತರರು ಇದ್ದರು.