ಸಿಂಧನೂರು;ತಾಲೂಕಿನ ಬಳಗಾನೂರು, ತುರುವಿಹಾಳ ಪಟ್ಟಣ ಪಂಚಾಯಿತಿಗೆ ಭಾನುವಾರ ನಡೆದ ಮತದಾನ ಸೂಸೂತ್ರವಾಗಿ ನಡೆದಿದ್ದು, ಇನ್ನೇನಿದ್ದರೂ ಫಲಿತಾಂಶಕ್ಕಾಗಿ ಅಭ್ಯರ್ಥಿಗಳು, ಹಿಂಬಾಲಕರೂ ಕಾಯುತ್ತಿದ್ದಾರೆ. ಅಭ್ಯರ್ಥಿಗಳ ಭವಿಷ್ಯ ಮಾತ್ರ ಇಲ್ಲಿನ ತಹಸಿಲ್ ಕಚೇರಿಯ ಭದ್ರತಾ ಕೋಣೆಯಲ್ಲಿ ಭದ್ರವಾಗಿದೆ.
ತಾಲೂಕಿನ ಬಳಗಾನೂರು ಪಟ್ಟಣ ಪಂಚಾಯಿತಿಯ ಒಟ್ಟು 12ವಾರ್ಡ್ಗಳಲ್ಲಿ 11 ವಾರ್ಡ್ಗಳಿಗೆ ಮತದಾನ ಪೂರ್ಣವಾಗಿದ್ದು, ತುರುವಿಹಾಳದಲ್ಲಿ ಒಟ್ಟು 14ವಾರ್ಡ್ಗಳಿಗೆ ಮತದಾನ ನಡೆದಿದೆ. ಎರಡೂ ಪಟ್ಟಣ ಪಂಚಾಯಿತಿಗಳ ಮತದಾನ ಪೆಟ್ಟಿಗೆಗಳನ್ನು ಇಲ್ಲಿನ ತಹಸಿಲ್ ಕಚೇರಿಯ ಭದ್ರತಾ ಕೋಣೆಯಲ್ಲಿ ಇಡಲಾಗಿದ್ದು, ಸೂಕ್ತ ಪೊಲೀಸ್ ಬಂದೋಬಸ್ತ್ ಒದಗಿಸಲಾಗಿದೆ.
ಎಲ್ಲ ಕಡೆಯೂ ಸೋಲು-ಗೆಲುವಿನ ಲೆಕ್ಕಚಾರ ಶುರುವಾಗಿದೆ. ಬಿಜೆಪಿ, ಕಾಂಗ್ರೆಸ್ ನಡುವೆ ಎರಡೂ ಕಡೆ ಭಾರಿ ಪೈಪೋಟಿ ನಡೆದಿದ್ದು, ಮೊದಲ ಬಾರಿ ಪಟ್ಟಣ ಪಂಚಾಯಿತಿ ಗದ್ದುಗೆ ಅಲಂಕರಿಸಲು ಭಾರಿ ಕಸರತ್ತು ನಡೆಸಿದ್ದರು. ಇನ್ನು ಪ್ರತಿ ವಾರ್ಡ್ನಲ್ಲಿ ನಡೆದ ಬೂತ್ವಾರು ಮತದಾನ ಅಂಕಿ-ಅಂಶ, ಯಾವ ಜನಾಂಗದ ಎಷ್ಟು ಮತಗಳ ಚಲಾವಣೆಯಾಗಿವೆ ಎನ್ನುವುದು ಸೇರಿ ಹಲವು ದೃಷ್ಟಿಕೋನಗಳಿಂದ ಚರ್ಚೆಗಳು ನಡೆದಿವೆ. ಅಭ್ಯರ್ಥಿಗಳ ಸೋಲು-ಗೆಲುವಿನ ಮಾತುಕತೆ ನಡೆದಿವೆ. ಇನ್ನು ತುರುವಿಹಾಳ ಪಟ್ಟಣ ಪಂಚಾಯಿತಿಯ ಚುನಾವಣೆ ಭಾರಿ ಕುತೂಹಲ ಮೂಡಿಸಿದ್ದು, ಮತದಾನದ ದಿನವೂ ಕೂಡ ಬೂತ್ಗಳಿಗೆ ತೆರಳಿ ಪ್ರಚಾರ ನಡೆಸಿದರು.
ತಹಸಿಲ್ ಕಚೇರಿಯ ಎರಡು ಪ್ರತ್ಯೇಕ ಕೋಣೆಗಳಲ್ಲಿ ವೋಟಿಂಗ್ ಮಷಿನ್ಗಳನ್ನು ಶೇಖರಿಸಿಡಲಾಗಿದೆ. ಇದಕ್ಕೆ ಪೊಲೀಸ್ ಬಂದೋಬಸ್ತ್ ಸಹ ಒದಗಿಸಲಾಗಿದೆ. ಅಲ್ಲದೆ ಏ.27ರಂದು ಮತ ಎಣಿಕೆ ನಡೆಯಲಿದ್ದು ಇಲ್ಲಿನ ತಹಸಿಲ್ ಕಚೇರಿಯಲ್ಲಿ ಎಣಿಕೆ ಕೇಂದ್ರ ಆರಂಭಿಸಲಾಗಿದೆ. ಎರಡು ಕೌಂಟರ್ಗಳಲ್ಲಿ ಟೇಬಲ್ಗೆ ಮೂವರು ಅಧಿಕಾರಿಗಳಂತೆ ಎರಡು ಸುತ್ತಿನಲ್ಲೂ ಎಣಿಕೆ ಕಾರ್ಯ ಮುಗಿಸಲು ತಾಲೂಕು ಆಡಳಿತ ಕೈಗೊಂಡಿದೆ. ಬುಧವಾರ ಮಧ್ಯಾಹ್ನ 12 ಗಂಟೆ ವೇಳೆಗೆ ಚುನಾವಣೆಯ ಫಲಿತಾಂಶ ಹೊರ ಬೀಳುವ ನಿರೀಕ್ಷೆ ಇದೆ.