ಖಾಲಿ ಕುಳಿತ ಪಿಡಿಒಗಳಿಗೆ ಚಾರ್ಜ್‌

ಸಿಂಧನೂರು : ತಾಲೂಕಿನ ಐದು ಗ್ರಾಮ ಪಂಚಾಯಿತಿಗಳಲ್ಲಿ ಇಬ್ಬರು ಪಿಡಿಒಗಳು ಕಾರ್ಯನಿರ್ವಹಿಸುತ್ತಿರುವುದಕ್ಕೆ ಬ್ರೇಕ್‌ ಬಿದ್ದಿದ್ದು, ಹೊಸ ಪಿಡಿಒಗಳಿಗೆ ಜವಾಬ್ದಾರಿ ವಹಿಸಲಾಗಿದೆ.

ಕಳೆದ ಐದಾರು ತಿಂಗಳಿಂದ ಕೋಳಬಾಳ, ಗುಡದೂರು, ಪಗಡದಿನ್ನಿ, ಕೆ.ಬಸಾಪುರ, ಜಾಲಿಹಾಳ ಗ್ರಾಮ ಪಂಚಾಯಿತಿಗಳಲ್ಲಿ ಇಬ್ಬರು ಪಿಡಿಒಗಳು ಕಾರ್ಯನಿರ್ವಹಿಸುತ್ತಿದ್ದರು. ಈ ಕುರಿತಾಗಿ ಫೆ.27ರಂದು 'ವಿಜಯ ಕರ್ನಾಟಕ'ದಲ್ಲಿ 'ಪಂಚಾಯಿತಿ ಸಿಂಗಲ್‌; ಪಿಡಿಒ ಡಬಲ್‌' ಶೀರ್ಷಿಕೆಯಡಿ ವರದಿ ಪ್ರಕಟವಾಗಿತ್ತು. ವರದಿಯನ್ನು ಗಮನಿಸಿರುವ ಜಿಲ್ಲಾ ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ ನಳಿನ್‌ ಅತುಲ್‌, ತಾ.ಪಂ.ಕಾರ್ಯನಿರ್ವಾಹಕ ಅಧಿಕಾರಿ ಬಾಬುರಾಠೋಡ್‌ರಿಗೆ ಈ ಕುರಿತು ವಿಚಾರಿಸಿ, ತರಾಟೆಗೆ ತೆಗೆದುಕೊಂಡಿದ್ದಾರೆ. ಕೂಡಲೇ ಎಚ್ಚೆತ್ತುಕೊಂಡಿರುವ ಅಧಿಕಾರಿಗಳು, ಹೊಸ ಪಿಡಿಒಗಳಿಗೆ ಚಾರ್ಜ್‌ ನೀಡಿ, ಹಳೆ ಪಿಡಿಒಗಳು ನಿಮ್ಮ ಪಂಚಾಯಿತಿಯಲ್ಲಿ ಹೋಗಿ ಕೆಲಸ ಆರಂಭಿಸುವಂತೆ ತಾಕೀತು ಮಾಡಿದ್ದಾರೆ. ಈ ಕುರಿತು ಪ್ರತಿಕ್ರಿಯೆ ನೀಡಿದ ಬಾಬುರಾಠೋಡ್‌, ಹೊಸ ಪಿಡಿಒಗಳಿಗೆ ಅನುಭವಾಗಲಿ ಎಂಬ ಕಾರಣಕ್ಕೆ ಸುಮ್ಮನಿದ್ದೆವು. ಪಂಚಾಯಿತಿಗಳಲ್ಲಿ ಹಳೆ ಕೆಲಸಗಳು ಬಾಕಿ ಇದ್ದವು. ಆದರೀಗ ಎಲ್ಲರನ್ನು ಅವರವರ ಪಂಚಾಯಿತಿಗೆ ಸೇವೆಗೆ ಹಾಜರಾಗುವಂತೆ ಆದೇಶಿಸಿದ್ದೇನೆ ಎಂದರು.