ಕುಡಿವ ನೀರಿನ ಟ್ಯಾಂಕಿನಲ್ಲಿ ಬಿದ್ದು ಕೋತಿಗಳ ಸಾವು: ಗ್ರಾಮದಲ್ಲಿ ವಾಂತಿ ಬೇಧಿ

ರಾಯಚೂರು: ಗ್ರಾಮಕ್ಕೆ ಕುಡಿಯುವ ನೀರು ಒದಗಿಸುವ ಟ್ಯಾಂಕ್‌ನಲ್ಲಿ ನಾಲ್ಕು ಕೋತಿಗಳು ಬಿದ್ದು ಸಾವನ್ನಪ್ಪಿರುವ ಘಟನೆ ತಾಲೂಕಿನ ಜೆ ಮಲ್ಲಾಪುರದಲ್ಲಿ ನಡೆದಿದೆ.

ಕೋತಿಗಳು ಸತ್ತ ಅರಿವಿಲ್ಲದೆ ನೀರು ಕುಡಿದ ಗ್ರಾಮಸ್ಥರಿಗೆ ಕಳೆದೆರಡು ದಿನಗಳಿಂದ ವಾಂತಿ ಬೇಧಿ ಕಾಣಿಸಿಕೊಂಡಿತ್ತು.

ಊರಿನ ಬಹುತೇಕ ಜನರಿಗೆ ಈ ಸಮಸ್ಯೆ ಕಾಣುತ್ತಿದ್ದಂತೆ ಅನುಮಾನಗೊಂಡ ಗ್ರಾಮಸ್ಥರು ನೀರಿನ ಟ್ಯಾಂಕ್ ಪರಿಶೀಲಿಸಿದಾಗ ಅದರಲ್ಲಿ ನಾಲ್ಕು ಕೋತಿಗಳ ಶವ ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿದೆ.

ಬಿಸಿಲಿನ ತಾಪಕ್ಕೆ ದಣಿದ ಕೋತಿಗಳು ನೀರನ್ನು ಹುಡುಕಿಕೊಂಡು ಬಂದ ಕೋತಿಗಳು ಟ್ಯಾಂಕ್‌ನಲ್ಲಿ ಇಣುಕಲು ಹೋಗಿ ಅದರಲ್ಲಿ ಬಿದ್ದಿದ್ದವು. 10 ಕೋತಿಗಳು ನೀರಲ್ಲಿ ಬಿದ್ದಿದ್ದು, ಅದರಲ್ಲಿ ನಾಲ್ಕು ಕೋತಿಗಳು ಮೇಲೆ ಹತ್ತಿ ಬರಲಾಗದೆ ಸಾವನ್ನಪ್ಪಿವೆ.

ಗ್ರಾಮಸ್ಥರು ಕೋತಿಗಳನ್ನು ಹೊರ ತೆಗೆದು ಸ್ವಚ್ಛಗೊಳಿಸುತ್ತಿದ್ದಾರೆ.

ಬೇಸಿಗೆಯಿಂದಾಗಿ ಉತ್ತರ ಕರ್ನಾಟಕದ ಹಲವು ಜಿಲ್ಲೆಗಳಲ್ಲಿ ಬರ ವ್ಯಾಪಿಸಿದ್ದು, ಪ್ರಾಣಿಗಳು ಕುಡಿಯಲು ನೀರು ಅರಸಿ ಊರಿನತ್ತ ಧಾವಿಸುವುದು ಸಾಮಾನ್ಯವಾಗಿದೆ.