ಬೇಡಿಕೆ ಈಡೇರಿಕೆಗೆ ಆಗ್ರಹಿಸಿ ಧರಣಿ

ಮಾನ್ವಿ ; ಬೇಡಿಕೆ ಈಡೇರಿಕೆಗೆ ಒತ್ತಾಯಿಸಿ, ಕರ್ನಾಟಕ ಫುಡ್ ಆ್ಯಂಡ್ ಸಿವಿಲ್ ಸಪ್ಲೈ ಕಾರ್ಪೊರೇಷನ್ ಲೋಡಿಂಗ್ ಆ್ಯಂಡ್ ಅನ್‌ಲೋಡಿಂಗ್ ಲೇಬರ್ಸ್‌ ಯೂನಿಯನ್ ತಾಲೂಕು ಘಟಕದ ನೇತೃತ್ವದಲ್ಲಿ ಕಾರ್ಮಿಕರು ಸೋಮವಾರ ಕೆಎಫ್‌ಸಿಎಸ್‌ಸಿ ಗೋದಾಮು ಬಳಿ ಧರಣಿ ನಡೆಸಿದರು.

ಭಾರತ ಆಹಾರ ನಿಗಮದಲ್ಲಿ ನೀಡುತ್ತಿರುವ ಪ್ರಕಾರ ವೇತನ ಸವಲತ್ತು, ರಜೆ, ಉದ್ಯೋಗ ಪತ್ರ, ಗುರುತಿನ ಚೀಟಿ ನೀಡಬೇಕು.

ಕಾರ್ಮಿಕರಿಗೆ ವೇತನ ಚೀಟಿ, ಹೆಚ್ಚುವರಿ ಕೆಲಸಕ್ಕೆ ಹೆಚ್ಚುವರಿ ವೇತನ, ಭವಿಷ್ಯ ನಿಧಿ ಒದಗಿಸಬೇಕು ಎಂದು ಆಗ್ರಹಿಸಿದರು.

ಕೆಎಫ್‌ಸಿಎಸ್‌ಸಿಯ ಗೋದಾಮುಗಳಲ್ಲಿ ಹಲವು ವರ್ಷಗಳಿಂದ ನಿರಂತರವಾಗಿ ಕೆಲಸ ನಿರ್ವಹಿಸುತ್ತಿದ್ದು, ಇಲ್ಲಿವರೆಗೆ ಸರಕಾರವಾಗಲಿ, ಆಹಾರ ನಿಗಮವಾಗಲಿ ಸವಲತ್ತು ಕೊಡಿಸುವಲ್ಲಿ ಸಂಪೂರ್ಣ ವಿಫಲವಾಗಿವೆ. ಬೇಡಿಕೆ ಈಡೇರುವವರೆಗೂ ಅನಿರ್ದಿಷ್ಟಾವಧಿ ನಿರಶನ ನಡೆಸಲಾಗುವುದು ಎಂದು ಪ್ರತಿಭಟನಾನಿರತರು ತಿಳಿಸಿದರು.

ಯೂನಿಯನ್ ತಾಲೂಕು ಅಧ್ಯಕ್ಷ ಬಿ.ರಾಮಣ್ಣ ನಾಯಕ, ಗೌರವ ಸಲಹೆಗಾರ ಶ್ರೀಕಾಂತ ಗೂಳಿ ಪಾಟೀಲ್, ಹನುಮಂತಪ್ಪ ನಾಯಕ, ಚನ್ನಪ್ಪ, ಮಂಜುನಾಥ ನಾಯಕ, ಸಬ್ಜಲಿ ಸಾಬ್, ದೇವೇಂದ್ರ, ಬಂದೇನವಾಜ್, ದೇವರಾಜ ಇನ್ನಿತರರಿದ್ದರು.