ಗೂಡಂಗಡಿ ತೆರವಿಗೆ ಮುಖ್ಯಾಧಿಕಾರಿ ತಾಕೀತು !

ಮುದಗಲ್‌ : ಪುರಸಭೆ ಮುಂಭಾಗದ ಮುಖ್ಯ ರಸ್ತೆಗೆ ಹೊಂದಿಕೊಂಡು ಇರುವ ನೀರಿನ ಮೇಲ್ತೊಟ್ಟಿ ಶಿಥಿಲಾವಸ್ಥೆಗೆ ತಲುಪಿದ್ದರಿಂದ ಕೂಡಲೇ ಮೇಲ್ತೊಟ್ಟಿಯ ಸುತ್ತಮುತ್ತಲಿನ ಗೂಡಂಗಡಿಗಳನ್ನು ತೆರವುಗೊಳಿಸುವಂತೆ ಅಂಗಡಿ ಮಾಲೀಕರಿಗೆ ಪುರಸಭೆ ಮುಖ್ಯಾಧಿಕಾರಿ ನರಸಿಂಹಮೂರ್ತಿ ಗುರುವಾರ ತಾಕೀತು ಮಾಡಿದರು. ಈಗಾಗಲೇ ಪುರಸಭೆ ಮುಂಭಾಗದಲ್ಲಿನ ಎಲ್ಲ ಅಂಗಡಿ ಮಾಲೀಕರಿಗೆ ನೋಟಿಸ್‌ ಜಾರಿ ಮಾಡಿ ತಿಂಗಳುಗಳೇ ಗತಿಸಿವೆ. ಕಾಲಾವಕಾಶ ಕೋರಿ ಅಂಗಡಿಗಳ ತೆರವಿಗೆ ಸಮಯ ನೀಡಲಾಗಿತ್ತು. ಶನಿವಾರ ಮತ್ತು ಭಾನುವಾರದೊಳಗೆ ಅಂಗಡಿಗಳ ತೆರವಿಗೆ ಮುಂದಾಗದಿದ್ದಲ್ಲಿ ಸೋಮವಾರ ಸಂಜೆಯಿಂದಲೇ ಗೂಡಂಗಡಿಗಳ ತೆರವು ಕಾರ್ಯಾಚರಣೆ ನಡೆಸಲಾಗುವುದು ಎಂದು ಎಚ್ಚರಿಕೆ ನೀಡಿದರು. ಪಿ.ಎಸ್‌.ಐ ದೊಡ್ಡಪ್ಪ ಜೆ, ಪುರಸಭೆ, ಪೊಲೀಸ್‌ ಸಿಬ್ಬಂದಿ ಇದ್ದರು.