ವಿಮಾ ಮೊತ್ತ ಜಮೆಗೆ ರೈತರ ಮನವಿ

ರಾಯಚೂರು : ಪ್ರಧಾನಮಂತ್ರಿ ಫಸಲ್‌ ಬಿಮಾ ಯೋಜನೆಯಡಿ 2016-17ನೇ ಸಾಲಿನ ಹಿಂಗಾರು ಬೆಳೆಯ ವಿಮೆ ಮೊತ್ತವನ್ನು ತಮ್ಮ ಖಾತೆಗೆ ಜಮೆ ಮಾಡುವಂತೆ ಮಾನ್ವಿ ತಾಲೂಕಿನ ಪಾಮನಕಲ್ಲೂರು ಹೋಬಳಿಯ 23 ಗ್ರಾಮಗಳ ರೈತರು, ಜಿಲ್ಲಾ ಉಸ್ತುವಾರಿ ಸಚಿವ ವೆಂಕಟರಾವ್‌ ನಾಡಗೌಡ ಅವರಿಗೆ ಮಂಗಳವಾರ ಮನವಿ ಸಲ್ಲಿಸಿ ಒತ್ತಾಯಿಸಿದರು.

2016-17ರಲ್ಲಿ ಫಸಲ್‌ ಬಿಮಾ ಯೋಜನೆಯಡಿ ಪಾಮನಕಲ್ಲೂರು ಹೋಬಳಿ ವ್ಯಾಪ್ತಿಯ ವಟಗಲ್‌, ಇರಕಲ್‌, ಬೆಂಚಮರಡಿ, ಚಿಲ್ಕರಾಗಿ, ಹರವಾಪುರ, ಹಿಲಾಲಪುರ, ಬಸಾಪುರ ಸೇರಿ 23ಹಳ್ಳಿಗಳ ರೈತರು ವಿಮಾ ಕಂಪನಿಗೆ ಪ್ರೀಮಿಯಂ ಹಣ ತುಂಬಿದ್ದಾರೆ. ಆದರೆ ಇಂದಿಗೂ ಯಾವ ರೈತರ ಖಾತೆಗೂ ವಿಮಾ ಮೊತ್ತ ಜಮೆಯಾಗಿಲ್ಲ.

ಪ್ರಸಕ್ತ ವರ್ಷ ಮತ್ತೆ ರೈತರು ಬರಗಾಲಕ್ಕೆ ತುತ್ತಾಗಿದ್ದಾರೆ. ತಮ್ಮ ಅಳಲನ್ನು ಗಂಭೀರವಾಗಿ ಪರಿಗಣಿಸಿ, ಶೀಘ್ರ ವಿಮೆ ಮೊತ್ತವನ್ನು ರೈತರ ಬ್ಯಾಂಕ್‌ ಖಾತೆಗೆ ಪಾವತಿಸಲು ಸಚಿವರು ಪ್ರಾಮಾಣಿಕ ಪ್ರಯತ್ನ ಮಾಡಬೇಕು ಎಂದು ಒತ್ತಾಯಿಸಿದರು.

ಈ ಸಂದರ್ಭದಲ್ಲಿ ಜಿ.ಪಂ. ಅಧ್ಯಕ್ಷೆ ಆದಿಮನಿ ವೀರಲಕ್ಷ್ಮಿ, ಎನ್‌ಆರ್‌ಬಿಸಿ 5ಎ ಹೋರಾಟ ಸಮಿತಿ ಅಧ್ಯಕ್ಷ ಬಸವರಾಜಪ್ಪಗೌಡ, ವಿಜಯಕುಮಾರ ಚಿಲ್ಕರಾಗಿ, ಮಹಾದೇವಪ್ಪಗೌಡ, ಮಲ್ಲರಡ್ಡೆಪ್ಪ, ರುದ್ರಪ್ಪ, ಬೀರಪ್ಪ, ಈರಣ್ಣ, ಶಿವರಾಜ, ನಿಂಗಣ್ಣ, ಅಂಬಪ್ಪ, ರಾಮಣ್ಣ, ಅಮರಪ್ಪ, ಅಮರೇಗೌಡ, ಮಹಾಂತಪ್ಪ, ರಾಮಚಂದ್ರಪ್ಪ, ಮಾನಪ್ಪ ಸೇರಿ ಇತರರಿದ್ದರು.