ಎಂಜಿನ್‌ನಲ್ಲಿ ಬೆಂಕಿ: ಸಿಮೆಂಟ್ ಲಾರಿಭಸ್ಮ

ಹಟ್ಟಿಚಿನ್ನದಗಣಿ (ರಾಯಚೂರು): ಗುರುಗುಂಟಾ ಬಳಿಯ ಲೆಕಿಮಿಚೇರಿ ಸಮೀಪದ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸೋಮವಾರ ತಡರಾತ್ರಿ, ಸಿಮೆಂಟ್ ತುಂಬಿದ ಲಾರಿಯ ಎಂಜಿನ್‌ನಲ್ಲಿ ಚಾಲನೆ ಸಂದರ್ಭದಲ್ಲೇ ತಾಂತ್ರಿಕ ದೋಷದಿಂದ ಬೆಂಕಿ ಕಾಣಿಸಿಕೊಂಡು ಲಾರಿ ಸಂಪೂರ್ಣ ಸುಟ್ಟುಹೋಗಿದೆ.

ವಾಡಿಯಿಂದ ಸಿಮೆಂಟ್ ಲೋಡ್ ಹೊತ್ತು ಹುಬ್ಬಳ್ಳಿ ಕಡೆ ಹೊರಟಿದ್ದ ಈ ಲಾರಿಯ ಎಂಜಿನ್‌ನಲ್ಲಿ ಏಕಾಏಕಿ ಬೆಂಕಿ ಕಾಣಿಸಿಕೊಂಡಿದೆ. ಹಿಂದೆ ಬರುತ್ತಿದ್ದ ಮತ್ತೊಂದು ಲಾರಿಯ ಚಾಲಕರು ಇದನ್ನು ಗಮನಿಸಿ, ಮುಂದಿನ ಲಾರಿ ಚಾಲಕರಿಗೆ ವಾಹನ ನಿಲ್ಲಿಸುವಂತೆ ಸೂಚಿಸಿದ್ದಾರೆ. ಅಷ್ಟರಲ್ಲೇ ಲಾರಿ ಎಂಜಿನ್ ಮುಂಭಾಗ, ಟೈರ್‌ಗಳಿಗೂ ಬೆಂಕಿ ತಗುಲಿ ಟೈರ್‌ಗಳು ಸ್ಫೋಟಗೊಂಡಿವೆ.

ಘಟನೆಯಲ್ಲಿ ಯಾವುದೇ ಪ್ರಾಣಹಾನಿಯಾಗಿಲ್ಲ. ಆದರೆ, ಲಾರಿ ಸಮೀಪದಲ್ಲಿದ್ದ ಭತ್ತದ ಹುಲ್ಲಿನ ಬಣವೆಗೆ ಬೆಂಕಿಯ ಕಿಡಿ ತಾಗಿದೆ. ಅಭಲಯ್ಯ ಅವರಿಗೆ ಸೇರಿದ ಭತ್ತದ ಹುಲ್ಲಿನ ಬಣವೆ ಸುಟ್ಟಿದೆ. ಲಾರಿ ಚಾಲಕ ಆದಪ್ಪ ಹಾಗೂ ಅಭಲಯ್ಯ ನೀಡಿದ ದೂರು ಆಧರಿಸಿ, ಎರಡು ಪ್ರತ್ಯೇಕ ಪ್ರಕರಣಗಳು ಸ್ಥಳೀಯ ಠಾಣೆಯಲ್ಲಿ ದಾಖಲಾಗಿವೆ.