ನಾನು ಕನ್ನಡಿಗರ ಪರ

ಲಿಂಗಸುಗೂರು : ರಾಜ್ಯದ ರೈತರ ಸಮಸ್ಯೆಗಳ ಬಗ್ಗೆ ಯಾರೂ ಮಾತನಾಡುತ್ತಿಲ್ಲ. ಬದಲಿಗೆ ಒಬ್ಬರ ಮೇಲೊಬ್ಬರು ಕೆಸರೆರೆಚಾಟದಲ್ಲೇ ಕಾಲ ಕಳೆಯುತ್ತಿದ್ದಾರೆ ಎಂದು ಜೆಡಿಎಸ್‌ ರಾಜ್ಯಾಧ್ಯಕ್ಷ ಹಾಗೂ ಮಾಜಿ ಸಿಎಂ ಎಚ್‌ಡಿ.ಕುಮಾರಸ್ವಾಮಿ ಆರೋಪಿಸಿದರು.

ಇಲ್ಲಿನ ಶಾದಿಮಹಲ್‌ ಆವರಣದಲ್ಲಿ ಶುಕ್ರವಾರ ನಡೆದ ಜೆಡಿಎಸ್‌ನ ವಿಕಾಸ ಪರ್ವ ಸಮಾವೇಶಕ್ಕೆ ಚಾಲನೆ ನೀಡಿ ಮಾತನಾಡಿದರು.

ರಾಹುಲ್‌ ಗಾಂಧಿ ಅವರು ನೀವು ಯಾರ ಕಡೆ ಎಂದು ಪ್ರಶ್ನೆ ಮಾಡಿದ್ದಾರೆ. ನಾನು ಬಿಜೆಪಿ ಕಡೆಗೂ ಇಲ್ಲ, ಕಾಂಗ್ರೆಸ್‌ ಕಡೆಗೂ ಇಲ್ಲ. ನಾನು ಕನ್ನಡಿಗರ ಪರವಾಗಿದ್ದೇನೆಂದು ಎಚ್‌ಡಿಕೆ ರಾಗಾರಿಗೆ ವೇದಿಕೆ ಮೂಲಕ ಟಾಂಗ್‌ ನೀಡಿದರು.

ಬಿಜೆಪಿಯಿಂದ ನರೇಂದ್ರ ಮೋದಿ, ಅಮಿತ್‌ ಶಾ , ಕಾಂಗ್ರೆಸ್‌ನಿಂದ ರಾಹುಲ್‌ಗಾಂಧಿ ರಾಜ್ಯದಲ್ಲಿ ಪ್ರವಾಸ ಮಾಡುತ್ತಿದ್ದಾರೆ. ಈ ವೇಳೆ ಕೇಂದ್ರದಿಂದ ರಾಜ್ಯಕ್ಕೆ ಬರಬೇಕಾದ ಯೋಜನೆಗಳ ಬಗ್ಗೆ ಯಾರು ಮಾತನಾಡುತ್ತಿಲ್ಲ ಎಂದು ದೂರಿದರು.

ಮೇ 6ಕ್ಕೆ ಮಾಯಾವತಿ ; ಬಿಎಸ್ಪಿ ಪಕ್ಷ ದ ವರಿಷ್ಠೆ ಕುಮಾರಿ ಮಾಯಾವತಿ ಅವರು ಮೇ 6ರಂದು ರಾಯಚೂರು ನಗರಕ್ಕೆ ಬರಲಿದ್ದು, ಸಮಾರಂಭದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಕಾರ್ಯಕರ್ತರು ಸೇರಿಸಬೇಕು ಎಂದು ಎಚ್‌ಡಿಕೆ ಮನವಿ ಮಾಡಿದರು.

ಜೆಡಿಎಸ್‌ ರಾಜ್ಯ ಪ್ರದಾನ ಕಾರ್ಯದರ್ಶಿ ಟಿ.ಎ. ಶರವಣ, ಮಾಜಿ ಶಾಸಕ ವೆಂಕಟರಾವ್‌ ನಾಡಗೌಡ, ಅಭ್ಯರ್ಥಿ ಸಿದ್ದು ಬಂಡಿ, ತಾಲೂಕು ಅಧ್ಯಕ್ಷ ಶಂಭುಲಿಂಗಪ್ಪ ಪೂಲಭಾವಿ, ಜಿ.ಪಂ.ಸದಸ್ಯರಾದ ಸಂಗಣ್ಣ ದೇಸಾಯಿ, ಬಸನಗೌಡ ಕಂಬಳಿ, ಹನುಮಂತಪ್ಪ ತೊಗರಿ, ಹನುಂತಪ್ಪ ಹಳ್ಳಿ, ಎಸ್‌.ಆರ್‌.ರಸೂಲ್‌ ಇದ್ದರು.

-----
ಗೀತಾ ವಜ್ಜಲ್‌ ವಿರುದ್ಧ ಕ್ರಮ

ಜೆಡಿಎಸ್‌ನಿಂದ ಜಿಲ್ಲಾ ಪಂಚಾಯಿತಿ ಉಪಾಧ್ಯಕ್ಷೆ ಆಗಿರುವ ಗೀತಾ ವಜ್ಜಲ್‌ ಅವರು ಪಕ್ಷ ದ ತತ್ತ್ವ ಸಿದ್ಧಾಂತಗಳಿಗೆ ವಿರುದ್ಧವಾಗಿ ಬಿಜೆಪಿ ಪಕ್ಷದ ಅಭ್ಯರ್ಥಿ ಪರ ಚುನಾವಣಾ ಪ್ರಚಾರಕ್ಕೆ ತೆರಳಿರುವುದರ ಬಗ್ಗೆ ಮಾಹಿತಿ ಗೊತ್ತಾಗಿದೆ. ಈ ಕುರಿತು ಜಿಲ್ಲಾ ಮುಖಂಡರೊಂದಿಗೆ ಚರ್ಚಿಸಿ, ಗೀತಾ ವಜ್ಜಲ್‌ ಅವರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಎಚ್‌ಡಿಕೆ ಹೇಳಿದರು.