ಸುಮಲತಾ ಬಗ್ಗೆ ಹಗುರ ಮಾತು, ಕ್ಷಮೆ ಕೇಳುವೆ: ಎಚ್‌. ವಿಶ್ವನಾಥ್

ರಾಯಚೂರು: ಸುಮಲತಾ ಅಂಬರೀಶ ಬಗ್ಗೆ ಸಚಿವ ಎಚ್‌.ಡಿ.ರೇವಣ್ಣ ಅವರು ಹಗುರವಾಗಿ ಮಾತನಾಡಿರುವುದು ಸರಿಯಲ್ಲ. ಜವಾಬ್ದಾರಿಯುತ ಸ್ಥಾನದಲ್ಲಿರುವ ಮಂತ್ರಿ ಬಾಯಿಂದ ಇಂತಹ ಮಾತು ನಿರೀಕ್ಷಿಸಿರಲಿಲ್ಲ. ಆ ಹೇಳಿಕೆಗೆ ಪಕ್ಷ ದ ರಾಜ್ಯಾಧ್ಯಕ್ಷ ನಾಗಿ ನಾನು ಕ್ಷಮೆ ಕೋರುವೆ ಎಂದು ಜೆಡಿಎಸ್‌ ಪಕ್ಷ ದ ರಾಜ್ಯಾಧ್ಯಕ್ಷ ಎಚ್‌. ವಿಶ್ವನಾಥ ಹೇಳಿದರು.

ಇಲ್ಲಿನ ಪತ್ರಿಕಾಭವನದಲ್ಲಿ ಶನಿವಾರ ಕರೆದಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಜೆಡಿಎಸ್‌ ಮಹಿಳೆಯರಿಗೆ ಅಪಾರ ಗೌರವ ನೀಡುತ್ತದೆ. ಆದರೆ, ಸಚಿವರ ಈ ಹೇಳಿಕೆ ವಿಷಾದನೀಯ ಎಂದರು.

ಎಲ್ಲ ಕಡೆಯೂ ಇದೆ:
ಇಂದು ಯಾವ ಪಕ್ಷ ಗಳಲ್ಲಿ ಕುಟುಂಬ ರಾಜಕಾರಣವಿಲ್ಲ ಎಂದು ಪ್ರಶ್ನಿಸಿದ ಅವರು, ಸಿದ್ಧರಾಮಯ್ಯ, ಬಿ.ಎಸ್‌.ಯಡಿಯೂರಪ್ಪ ಅವರ ಕುಟುಂಬಸ್ಥರೂ ರಾಜಕಾರಣದಲ್ಲಿದ್ದಾರೆ. ಅದೊಂದು ವಿಷಯವಾಗಿ ಉಳಿದಿಲ್ಲ ಎಂದರು. ಲೋಕಸಭಾ ಚುನಾವಣೆಯ ಹಿನ್ನೆಲೆಯಲ್ಲಿ ಜೆಡಿಎಸ್‌ ಮತ್ತು ಕಾಂಗ್ರೆಸ್‌ ಟಿಕೆಟ್‌ ಹಂಚಿಕೆ ಅಂತಿಮವಾಗಿಲ್ಲ. 12 ಟಿಕೆಟ್‌ ಪ್ರಸ್ತಾವನೆ ಸಲ್ಲಿಸಲಾಗಿದೆ ಎಂದರು.

ಮೋದಿ ಕೊಡುಗೆಯಿಲ್ಲ:
ಪ್ರಧಾನಿ ನರೇಂದ್ರ ಮೋದಿ ಅವರು ಉತ್ತರ ಕರ್ನಾಟಕಕ್ಕೆ ಯಾವುದೇ ಕೊಡುಗೆ ನೀಡಿಲ್ಲ. ಹೈದರಾಬಾದ್‌ ಕರ್ನಾಟಕ ಭಾಗಕ್ಕೆ ಸಂವಿಧಾನ 371(ಜೆ) ಕಾಯಿದೆ ವಿಶೇಷ ಸ್ಥಾನಮಾನ ನೀಡಲು ವಾಜಪೇಯಿ ಸರಕಾರ ತಿರಸ್ಕರಿಸಿತ್ತು. ಮನಮೋಹನಸಿಂಗ್‌ ಸರಕಾರದಲ್ಲಿ 371(ಜೆ) ಜಾರಿಗೊಳಿಸಲಾಗಿದೆ. ಅನುಷ್ಠಾನದಲ್ಲಿ ಕೇಂದ್ರ ತಾರತಮ್ಯ ತೋರಿದೆ.

ಹೊಸತೇನಲ್ಲ:
ಪಾಕಿಸ್ತಾನವು ಭಾರತ ದೇಶದ ಗಡಿದಾಟಿ ಗುಂಡಿನ ದಾಳಿ ನಡೆಸುತ್ತಿರುವುದು ಹೊಸದಲ್ಲ. ಮೊದಲಿನಿಂದ ನಡೆಯುತ್ತಿದೆ. ಪ್ರತಿಯಾಗಿ ನಮ್ಮ ಸೈನಿಕರು ಉತ್ತರ ನೀಡಿದ್ದಾರೆ. ಅವರ ಕಾರ್ಯ ಸ್ವಾಗತಿಸುತ್ತೇವೆ. ಆದರೆ, ಬಿಜೆಪಿಯವರಲ್ಲಿ ಮಾತ್ರ ದೇಶಪ್ರೇಮವಿದೆ ಎಂದು ಬಿಂಬಿಸಲು ಹೊರಟಿರುವುದು, ಖಂಡನೀಯ ಎಂದರು. ಸೈನಿಕರ ದಾಳಿಯನ್ನು ಬಿಜೆಪಿ ಚುನಾವಣೆಗೆ ಬಳಸಿಕೊಳ್ಳುತ್ತಿದೆ. ಈ ಬಗ್ಗೆ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್‌ ಯಡಿಯೂರಪ್ಪ ಅವರು ಸತ್ಯ ಸಂಗತಿ ಹೇಳಿದ್ದಾರೆ. ದೇಶದ ಜನರನ್ನು ಮಾನಸಿಕವಾಗಿ ಸೆಳೆದುಕೊಳ್ಳುವ ಪ್ರಯತ್ನ ಬಿಜೆಪಿಯಿಂದ ನಡೆದಿದೆ ಎಂದರು.