ಪರಿತ್ಯಕ್ತ ದೇವದಾಸಿಯರ ಮಕ್ಕಳಿಗೆ ಕಂಕಣಭಾಗ್ಯ

ರಾಯಚೂರು :ಪರಿತ್ಯಕ್ತ ದೇವದಾಸಿರ ಕೆಲವು ಮಕ್ಕಳು, ಕಂಕಣಭಾಗ್ಯ ಪಡೆಯುವ ಮೂಲಕ ದೇವದಾಸಿ ಪದ್ಧತಿ ನಿರ್ಮೂಲನೆಗೆ ಮೊದಲ ಹೆಜ್ಜೆ ಇರಿಸಿದ ಅಪರೂಪದ ಕ್ಷಣಗಳಿಗೆ ನಗರದ ವಿಠ್ಠಲ ರುಕ್ಮಿಣಿ ಕಲ್ಯಾಣ ಮಂಟಪ ಸಾಕ್ಷಿಯಾಯಿತು.

ದೇವದಾಸಿ ಪದ್ಧತಿ ನಿರ್ಮೂಲನಾ ಮಹಿಳಾ ಒಕ್ಕೂಟ ಹಾಗೂ ಪ್ರಗತಿಪರ ಸಂಘಟನೆಗಳ ಸಹಭಾಗಿತ್ವದಲ್ಲಿ ಗುರುವಾರ ಆಯೋಜಿಸಿದ್ದ ಪರಿತ್ಯಕ್ತ ದೇವದಾಸಿಯರ ರಾಜ್ಯ ಮಟ್ಟದ ಜಾಗೃತಿ ಶಿಬಿರ ಮತ್ತು ಅವರ ಮಕ್ಕಳ ಸಾಮೂಹಿಕ ಮದುವೆ ಸಮಾರಂಭ, ನೂರಾರು ಜನರ ಸಮ್ಮುಖದಲ್ಲಿ ಸಂಭ್ರಮದಿಂದ ಜರುಗಿತು.

ಮಂಜುನಾಥ-ಲಕ್ಷ್ಮಿ, ಸುನೀಲ್‌-ಗೌತಮಿ, ಭೀಮರೆಡ್ಡಿ-ಅಂಬಮ್ಮ ದಾಂಪತ್ಯಜೀವನಕ್ಕೆ ಕಾಲಿರಿಸಿದ ಅಪರೂಪದ ನೂತನ ಜೋಡಿಗಳು. ಈ ಜೋಡಿಗಳು ಪರಸ್ಪರ ಒಪ್ಪಿದ್ದಲ್ಲದೇ ಅಸ್ಪೃಶ್ಯತೆ ಹೋಗಲಾಡಿಸಿ, ಅಂತರ್ಜಾತಿ ಮದುವೆಯಾಗುವ ಮೂಲಕ ಸಮಾನ ಸಮಾಜದತ್ತ ಸಾಗಲು ಪಣತೊಟ್ಟರು.

ಪ್ರಗತಿಪರ ಸಂಘಟನೆ ಮುಖಂಡ ನಿತ್ಯಾನಂದಸ್ವಾಮಿ ಮಾತನಾಡಿ, ''ದೇವದಾಸಿಯರು ತಮ್ಮ ಮಕ್ಕಳಿಗೆ ಸ್ವಾತಂತ್ರ್ಯ ನೀಡಬೇಕು. ಆಗ ಅವರು ಮುಕ್ತ ಮನಸ್ಸಿನಿಂದ ಆಲೋಚಿಸಿ ಸಂಗಾತಿಯನ್ನು ಆರಿಸಿಕೊಳ್ಳುತ್ತಾರೆ. ಆಗ ಅವಮಾನಕರ ಜೀವನದ ಬದಲಾಗಿ ಸ್ವಾಭಿಮಾನದ ಜೀವನ ಕಟ್ಟಿಕೊಳ್ಳಲು ಸಾಧ್ಯವಾಗುತ್ತದೆ'' ಎಂದರು.

ಕರ್ನಾಟಕ ಪ್ರಾಂತ ರೈತ ಸಂಘದ ಮುಖಂಡ ಕೆ.ಜಿ.ವೀರೇಶ್‌ ಮಾತನಾಡಿ, ''ಪರಿತ್ಯಕ್ತ ದೇವದಾಸಿಯರ ಮಕ್ಕಳು ಸಮಾಜದಲ್ಲಿ ಜನಸಾಮಾನ್ಯರಂತೆ ಗೌರವದ ಜೀವನ ನಡೆಸಿ, ಭದ್ರತೆ ಹೊಂದಲು ಸರಕಾರ, ಪರಿತ್ಯಕ್ತ ದೇವದಾಸಿ ಮಹಿಳೆಯರ ಮಕ್ಕಳನ್ನು ವಿವಾಹವಾದರೆ ಪ್ರೋತ್ಸಾಹಧನ ನೀಡುತ್ತಿದೆ'' ಎಂದರು.

ಹಸೆಮಣೆ ಏರಿದ ಒಟ್ಟು 15 ಜೋಡಿಗಳಿಗೆ ಒಂದೇ ವೇದಿಕೆಯಲ್ಲಿ ನೂರಾರು ಜನರು ಶುಭ ಹಾರೈಸಿದರು. ಈ ಸಂದರ್ಭದಲ್ಲಿ ವಿವಿಧ ಸಂಘಟನೆಗಳ ಪದಾಧಿಕಾರಿಗಳಾದ ವರಲಕ್ಷ್ಮಿ, ರೇಣುಕಾ, ರವಿ, ಶರಣಗೌಡ ಸೇರಿ ಹಲವರಿದ್ದರು.