ಲಿಂಗಸುಗೂರು; ಬಿಜೆಪಿ ಟಿಕೆಟ್‌ ಕೈ ತಪ್ಪುತ್ತಿರುವ ಹಿನ್ನೆಲೆಯಲ್ಲಿ ಆಕ್ರೋಶಿತರಾದ ಸಿದ್ದು ಬಂಡಿ ಅಭಿಮಾನಿಗಳು ಮಾಜಿ ಮುಖ್ಯಮಂತ್ರಿ ಬಿ.ಎಸ್‌.ಯಡಿಯೂರಪ್ಪ ಅವರ ಭಾವಚಿತ್ರಕ್ಕೆ ಅವಮಾನಿಸಿ ಸೋಮವಾರ ಪ್ರತಿಭಟನೆ ನಡೆಸಿದರು.
ಸ್ಥಳೀಯ ಬಸ್‌ ನಿಲ್ದಾಣದ ಬಳಿ ಟೈರ್‌ಗೆ ಬೆಂಕಿ ಹಚ್ಚಿದ ಪ್ರತಿಭಟನಾಕಾರರು, ಯಡಿಯೂರಪ್ಪ ವಿರುದ್ಧ ಘೋಷಣೆ ಕೂಗಿದರು. ಈ ಬಾರಿಯ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿಯ ಪ್ರಬಲ ಟಿಕೆಟ್‌ ಆಕಾಂಕ್ಷಿಯಾಗಿದ್ದ ಸಿದ್ದು ಬಂಡಿ ಅವರನ್ನು ಕಡೆಗಣಿಸಿ, ಜೆಡಿಎಸ್‌ ನಿಂದ ಸೇರ್ಪಡೆಯಾದ ಶಾಸಕ ಮಾನಪ್ಪ ವಜ್ಜಲ್‌ ಅವರಿಗೆ ಟಿಕೆಟ್‌ ಹಂಚಿಕೆಗೆ ಮುಂದಾಗಿರುವುದು ಯಾವ ನ್ಯಾಯ? ಹಲವು ವರ್ಷಗಳಿಂದ ಪಕ್ಷದಲ್ಲಿ ದುಡಿದವರಿಗೆ ಬೆಲೆ ಇಲ್ಲವೇ? ಹಣದ ಆಮಿಷಕ್ಕೆ ಟಿಕೆಟ್‌ ಮಾರಿಕೊಳ್ಳುವುದು ಎಷ್ಟು ಸರಿ ಎಂದು ಆಕ್ರೋಶ ಹೊರ ಹಾಕಿದರು.
ಸಾಮೂಹಿಕ ರಾಜೀನಾಮೆ: ಇದೇ ವೇಳೆ ಬಿಜೆಪಿಯ ಲಿಂಗಸುಗೂರು ಮಂಡಳದ ಪದಾಧಿಕಾರಿಗಳು ತಮ್ಮ ಸ್ಥಾನಕ್ಕೆ ಸಾಮೂಹಿಕವಾಗಿ ರಾಜೀನಾಮೆ ಜತೆಗೆ ಪಕ್ಷ ದ ಪ್ರಾಥಮಿಕ ಸದಸ್ಯತ್ವಕ್ಕೆ ರಾಜೀನಾಮೆ ಸಲ್ಲಿಸಿದರು. ಜಿಲ್ಲಾ ಉಪಾದ್ಯಕ್ಷ ರು, ಯುವ ಮೋರ್ಚಾ ಸದಸ್ಯರು, ತಾಲೂಕು ಪ್ರಧಾನ ಕಾರ್ಯದರ್ಶಿ, ಎಸ್‌ಸಿ, ಎಸ್‌ಟಿ ಸೇರಿ ನಾನಾ ಮೋರ್ಚಾಗಳ ಅಧ್ಯಕ್ಷರು ಹಾಗೂ ಪ್ರದಾಧಿಕಾರಿಗಳು ತಮ್ಮ ಸ್ಥಾನಗಳಿಗೆ ರಾಜೀನಾಮೆ ಸಲ್ಲಿಸಿದರು.
ಮುಖಂಡರಾದ ಬಸವರಾಜ ಮಾಕಾಪೂರ, ಸೋಮಲಿಂಗಪ್ಪ, ಬಸನಗೌಡ ಚಿತಾಪೂರ, ರುದ್ರಗೌಡ ಪಾಟೀಲ್‌, ಸಂಗನಗೌಡ, ಬೋಧು ನಾಯಕ, ಬಸವರಾಜ, ಶೇಖರಗೌಡ, ಮೌನೇಶ, ಹನುಮಂತ, ರಮೇಶ ಸೇರಿ ಅನೇಕರು ಪ್ರತಿಭಟನೆಯಲ್ಲಿ ಇದ್ದರು.