ಮನೆಯಲ್ಲಿ ಪದವಿ ಪರೀಕ್ಷೆ ಬರೆಸುತ್ತಿದ್ದ ಕಾಲೇಜು: ಜಾಗೃತ ದಳದ ದಾಳಿ ವೇಳೆ ಅಕ್ರಮ ಬಯಲು

ರಾಯಚೂರು: ಗುಲ್ಬರ್ಗಾ ವಿವಿ ಪದವಿ ಪರೀಕ್ಷೆಯನ್ನು ಅಕ್ರಮವಾಗಿ ಮನೆಯೊಂದರಲ್ಲಿ ಬರೆಯಿಸುತ್ತಿದ್ದ ಪ್ರಕರಣ ಪತ್ತೆಯಾಗಿದೆ. ಜಾಗೃತ ದಳದ ಅಧಿಕಾರಿಗಳು ನಡೆಸಿದ ಕಾರ್ಯಾಚರಣೆ ವೇಳೆ ಅಕ್ರಮ ಬಯಲಾಗಿದೆ.

ನಗರದ ಐಡಿಎಸ್‌ಎಂಟಿ ಬಡಾವಣೆಯ ಮನೆಯಲ್ಲಿ ಪರೀಕ್ಷೆ ಬರೆಯಿಸುತ್ತಿದ್ದ ವೇಳೆ ಸುಳಿವು ದೊರೆತ ಜಾಗೃತ ದಳದ ಅಧಿಕಾರಿಗಳು ದಾಳಿ ನಡೆಸಿದರು.

ನಗರದ ವಿವೇಕಾನಂದ ಪದವಿ ಕಾಲೇಜು ಆಡಳಿತ ಮಂಡಳಿ 37 ವಿದ್ಯಾರ್ಥಿಗಳಿಗೆ ಅಕ್ರಮವಾಗಿ ಕೊಠಡಿಯಲ್ಲಿ ಪರೀಕ್ಷೆ ನಡೆಸುತ್ತಿತ್ತು. ಕಾಲೇಜಿನ ವಿರುದ್ಧ ನಗರದ ಪಶ್ಚಿಮ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ವಿಚಾರಣೆ ನಡೆಯುತ್ತಿದೆ.

ಬಿ.ಕಾಂ ಪದವಿ ಪರೀಕ್ಷೆಯ ವೇಳೆ ಈ ಕಾಲೇಜಿನ ವಿದ್ಯಾರ್ಥಿಗಳಿಗೆ ಬೇರೊಂದು ಪರೀಕ್ಷಾ ಕೇಂದ್ರ ನಿಗದಿಯಾಗಿತ್ತು. ಅಲ್ಲಿ ಪರೀಕ್ಷೆ ಬರೆಯಿಸುವ ಬದಲು ಅಕ್ರಮವಾಗಿ ಖಾಸಗಿ ಕಾಲೇಜು ಆಡಳಿತವು ಮನೆಯ ಕೊಠಡಿಯೊಂದರಲ್ಲಿ ಪರೀಕ್ಷೆ ನಡೆಸುತ್ತಿತ್ತೆಂದು ಪೊಲೀಸರಿಗೆ ದೂರಲಾಗಿದೆ.