ವಿವಿಧ ಬೇಡಿಕೆಗೆ ಆಗ್ರಹಿಸಿ ಧರಣಿ

ಲಿಂಗಸುಗೂರು : ನರೇಗಾದಡಿ 100 ದಿನಕ್ಕೆ ಸೀಮಿತಗೊಳಿಸಿದ ಕೂಲಿಯನ್ನು 150ದಿನಕ್ಕೆ ಹೆಚ್ಚಿಸುವುದು ಸೇರಿ ಇನ್ನಿತರ ಬೇಡಿಕೆಗಳನ್ನು ಈಡೇರಿಸುವಂತೆ ಆಗ್ರಹಿಸಿ ಜಾಗೃತ ರೈತ ಸಂಘ ಹಾಗೂ ಯುವ ಜನರಂಗದ ಕಾರ್ಯಕರ್ತರು ಗುರುವಾರ ಸಹಾಯಕ ಆಯುಕ್ತರ ಕಚೇರಿ ಎದುರು ಧರಣಿ ನಡೆಸಿದರು.

ನರೇಗಾ ಕೂಲಿಯನ್ನು 300ರೂ.ಗೆ ಹೆಚ್ಚಿಸಬೇಕು. ಗೆಜ್ಜಲಗಟ್ಟಾದಲ್ಲಿ ಕೂಲಿಕಾರರಿಗೆ ಎರಡು ತಿಂಗಳಿಂದ ಕೂಲಿ ನೀಡಿಲ್ಲ. ಕೂಡಲೇ ವೇತನ ಪಾವತಿಸಬೇಕು. ಗೆಜ್ಜಲಗಟ್ಟಾದಲ್ಲಿ ಕುಡಿವ ನೀರಿನ ಸಮಸ್ಯೆಯಿದ್ದು, ನೀರಿನ ವ್ಯವಸ್ಥೆ ಮಾಡಬೇಕು. ಗೆಜ್ಜಲಗಟ್ಟಾ ಪಿಡಿಒ ಕರ್ತವ್ಯಲೋಪ ಎಸಗಿದ್ದು ಈ ಬಗ್ಗೆ ತನಿಖೆ ನಡೆಸಿ, ಅವರ ವಿರುದ್ಧ ಕ್ರಮ ಜರುಗಿಸಬೇಕು ಎಂದು ಮನವಿ ಸಲ್ಲಿಸಿದರು.

ಸಂಘಟನೆಗಳ ಮುಖಂಡರಾದ ಚೆನ್ನಬಸವ ಕರ್ನಾಟಗಿ, ಆರ್‌.ಎಸ್‌.ಗುತ್ತೇದಾರ್‌, ಶರಣಪ್ಪ ಸಾಲಿ, ಅಮರಪ್ಪ ದಳಪತಿ, ವಿನಾಯಕ ಕುಮಾರ, ಆದಮ್ಮ, ರೇಣುಕಮ್ಮ ಇತರರಿದ್ದರು.