ನೇರ ವೇತನ ಪಾವತಿಗೆ ಆಗ್ರಹ

ರಾಯಚೂರು; ರಾಜ್ಯದ ಮಹಾನಗರ ಪಾಲಿಕೆ, ನಗರಸಭೆ, ಪುರಸಭೆ, ಪಟ್ಟಣ ಪಂಚಾಯಿತಿಯಲ್ಲಿಕಾರ್ಯನಿರ್ವಹಿಸುತ್ತಿರುವ ತ್ಯಾಜ್ಯ ಸಾಗಿಸುವ ವಾಹನ ಚಾಲಕರು ಲೋಡರ್ಸ್, ಜೆಸಿಬಿ ಆಪರೇಟರುಗಳನ್ನು ನೇರ ವೇತನ ಪಾವತಿಗೆ ಒಳಪಡಿಸಬೇಕೆಂದು ಒತ್ತಾಯಿಸಿ ರಾಜ್ಯ ದಿನಗೂಲಿ ಮತ್ತು ಗುತ್ತಿಗೆ ಪೌರಸೇವಾ ನೌಕರರ ಸಂಘದ ಪದಾಧಿಕಾರಿಗಳು, ಅಪರ ಜಿಲ್ಲಾಧಿಕಾರಿ ಮೂಲಕ ಪೌರಾಡಳಿತ ಸಚಿವರಿಗೆ ಇತ್ತೀಚೆಗೆ ಮನವಿ ರವಾನಿಸಿದರು.

ರಾಜ್ಯಾದ್ಯಂತ ಸುಮಾರು ವರ್ಷಗಳಿಂದ 18 ಸಾವಿರ ಜನರು ತ್ಯಾಜ್ಯ ಸಾಗಿಸುವ ವಾಹನ ಚಾಲಕರು, ಲೋಡರ್ಸ್, ಜೆಸಿಬಿ ಆಪರೇಟರ್ಸ್ ಸೇವೆಯನ್ನು ಗುತ್ತಿಗೆ ಆಧಾರದಡಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಚಾಲಕ ಕಾರ್ಮಿಕರು ಸಂದರ್ಭ ಬಂದಾಗ ಪೌರಕಾರ್ಮಿಕರು ಮಾಡುವ ಕೆಲಸವನ್ನೂ ನಿರ್ವಹಿಸುತ್ತಾರೆ. ಹಗಲಿರುಳು ತ್ಯಾಜ್ಯದ ಮಧ್ಯೆ ಇರುತ್ತಾರೆ. ಸರಕಾರ ಕೂಡಲೇ ಇವರನ್ನು ನೇರ ಪಾವತಿ ವ್ಯವಸ್ಥೆಗೆ ಒಳಪಡಿಸಿ, ನಗರಸಭೆಯಿಂದ ಕನಿಷ್ಠ ವೇತನ ಕೊಡಬೇಕು ಎಂದು ಮನವಿಯಲ್ಲಿಆಗ್ರಹಿಸಿದ್ದಾರೆ.

ಸರ್ವೋಚ್ಛ ನ್ಯಾಯಾಲಯದ ತೀರ್ಪಿನಂತೆ ಸಮಾನ ಕೆಲಸಕ್ಕೆ ಸಮಾನ ವೇತನ ನೀಡಬೇಕು. ರಾಜ್ಯಾದ್ಯಂತ ಗುತ್ತಿಗೆ ಪದ್ಧತಿಯನ್ನು ರದ್ದುಪಡಿಸಬೇಕು. ತ್ಯಾಜ್ಯವಾಹನ ಚಾಲಕರನ್ನು ಪೌರಕಾರ್ಮಿಕರೆಂದು ಪರಿಗಣಿಸಬೇಕು. ತ್ಯಾಜ್ಯ ಸಾಗಿಸುವಲ್ಲಿಮುಖ್ಯ ಪಾತ್ರವಹಿಸುವ ವಾಹನ ಚಾಲಕರು ಕೆಲಸ ಸಮಯದ ಮಿತಿಯೇ ಇಲ್ಲದಂತಾಗಿದ್ದು, ಚಾಲಕರಿಗೆ ಉದ್ಯೋಗ ಭದ್ರತೆಯಿಲ್ಲ. ಆರೋಗ್ಯ ಭದ್ರತೆಯಿಲ್ಲ, ಹೆಚ್ಚಿನ ಜನರಿಗೆ ಪಿಎಫ್‌ ಮತ್ತು ಇಎಸ್‌ಐ ಸೌಲಭ್ಯಗಳಿಲ್ಲ. ಇವರಿಗಾಗುತ್ತಿರುವ ಶೋಷಣೆ ಕುರಿತು ತನಿಖೆ ಮಾಡಬೇಕು.ಅತಂತ್ರ ಸ್ಥಿತಿಯಲ್ಲಿಬದುಕು ಸಾಗಿಸುತ್ತಿರುವ ಚಾಲಕರು ಮತ್ತು ಜೆಸಿಬಿ ಆಪರೇಟರುಗಳು, ಲೋಡರ್ಸ್ ಕುಟುಂಬಗಳು ಬೀದಿ ಪಾಲಾಗುತ್ತಿವೆ. ಮಕ್ಕಳಿಗೆ ವಿದ್ಯಾಭ್ಯಾಸ ಕೊಡಿಸಲಾಗುತ್ತಿಲ್ಲ. ಹಿರಿಯ ನಾಗರಿಕರಿಗೆ ವೈದ್ಯಕೀಯ ಸೌಲಭ್ಯ ನೀಡಲಾಗುತ್ತಿಲ್ಲ. ಆದ್ದರಿಂದ ಕೂಡಲೇ ಇವರುಗಳ ನೆರವಿಗೆ ಬಂದು ನ್ಯಾಯ ಕೊಡಿಸಬೇಕೆಂದು ಒತ್ತಾಯಿಸಿದರು. ಈ ಸಂದರ್ಭದಲ್ಲಿಸಂಘದ ರಾಜ್ಯಾಧ್ಯಕ್ಷ ಎಸ್‌.ಮಾರೆಪ್ಪ ಸೇರಿದಂತೆ ಅನೇಕರಿದ್ದರು.