ಹಿರಿಯ ನಾಗರಿಕರ ಕಚೇರಿ ನಿರ್ಮಾಣಕ್ಕೆ 5 ಲಕ್ಷ ರೂ.

ರಾಯಚೂರು : ಹಿರಿಯ ನಾಗರಿಕರ ಕಚೇರಿ ನಿರ್ಮಾಣಕ್ಕೆ ಸ್ಥಳ ನಿಗದಿಯಾಗಿದ್ದು, ಶಾಸಕರ ಅನುದಾನದಲ್ಲಿ 5 ಲಕ್ಷ ರೂ. ಅನುದಾನ ನೀಡುವೆ ಎಂದು ನಗರ ಶಾಸಕ ಡಾ.ಶಿವರಾಜ ಪಾಟೀಲ್‌ ಭರವಸೆ ನೀಡಿದರು.

ನಗರದ ವೀರಶೈವ ಮಹಾಂತೇಶ ಕಲ್ಯಾಣ ಮಂಟಪದಲ್ಲಿ ರಾಯಚೂರು ಜಿಲ್ಲಾ ನಿವೃತ್ತ ನೌಕರರ ಸಂಘ ವತಿಯಿಂದ ಶನಿವಾರ ಹಮ್ಮಿಕೊಂಡಿದ್ದ ಹಿರಿಯ ನಾಗರಿಕರ ದಿನಾಚರಣೆ ಹಾಗೂ ಸನ್ಮಾನ ಸಮಾರಂಭದಲ್ಲಿ ಅವರು ಮಾತನಾಡಿದರು. ಹಿರಿಯ ನಾಗರಿಕರಿಗೆ ಅನುಕೂಲಕರ ವಾಯು ವಿಹಾರಕ್ಕಾಗಿ ನಗರದ ಮಾವಿನ ಕೆರೆಯ ಉದ್ಯಾನ ಸೇರಿ ನಾನಾ ಬಡವಾಣೆಗಳಲ್ಲಿರುವ 10ಕ್ಕೂ ಹೆಚ್ಚು ಉದ್ಯಾನಗಳ ಅಭಿವೃದ್ಧಿಗೆ ಕ್ರಮ ಕೈಗೊಳ್ಳುವುದಾಗಿ ಹೇಳಿದರು.

ವಿಧಾನ ಪರಿಷತ್‌ ಸದಸ್ಯ ಎನ್‌.ಎಸ್‌.ಬೋಸರಾಜು, ಕಾರ್ಯಕ್ರಮ ಉದ್ಘಾಟಿಸಿದರು. ಹಿರಿಯ ನಾಗರಿಕರಾದ ಜಿ.ಬೆಟ್ಟಪ್ಪ, ಬಸವರಾಜ ಸಕ್ರಿ, ಡಾ.ವಿ.ಜಿ.ಕುಲಕರ್ಣಿ, ಅಲಿ ಸೈಫುದ್ದೀನ್‌, ರಮೇಶ ಹೀರಾ ಅವರನ್ನು ಸನ್ಮಾನಿಸಲಾಯಿತು. ಸೋಮವಾರ ಪೇಟೆ ಹಿರೇಮಠದ ಅಭಿನವ ರಾಚೋಟಿವೀರ ಶಿವಾಚಾರ್ಯರು ಸಾನ್ನಿಧ್ಯವಹಿಸಿದ್ದರು. ರಾಜ್ಯ ನಿವೃತ್ತ ನೌಕರರ ಸಂಘದ ಅಧ್ಯಕ್ಷ ಡಿ.ಎನ್‌.ಸಂಪತ್‌, ಪದಾಧಿಕಾರಿಗಳಾದ ರಾಜ ಶ್ರೀನಿವಾಸ, ಡಿ.ಎಂ.ವೀರೇಶ ಶಾಸ್ತ್ರಿ, ಮಹಾದೇವಪ್ಪ ಹಂಚಿವಾಳ, ಪಿ.ಶ್ರೀನಿವಾಸರಾವ್‌ ಸೇರಿ ಇತರರಿದ್ದರು.