ರಾಮನಗರ: ಒಂದೇ ದಿನ ಶತಕ ಬಾರಿಸಿದ ಪಾಸಿಟಿವ್, ಸಾವಿರದ ಸನಿಹಕ್ಕೆ ಬಂದ ಕೋವಿಡ್

ರಾಮನಗರ: ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿರುವ ಕೊರೊನಾ ಪ್ರಕರಣಗಳ ಪೈಕಿ ಜಿಲ್ಲೆಯಲ್ಲಿ ಸೋಮವಾರ ದಾಖಲೆ ಬರೆದಂತಾಗಿದೆ. ಒಂದೇ ದಿನ ಬರೊಬ್ಬರಿ 100 ಪ್ರಕರಣಗಳು ದೃಢಪಟ್ಟಿವೆ. ಈ ಮೂಲಕ ಸೋಂಕಿತರ ಸಂಖ್ಯೆ 830ಕ್ಕೆ ಏರಿಕೆಯಾಗಿದೆ.

ಇನ್ನು ಎರಡ್ಮೂರು ದಿನಗಳಲ್ಲಿ ಸೋಂಕಿತರ ಸಂಖ್ಯೆ 1 ಸಾವಿರ ದಾಟಲಿದೆ ಎಂದು ಅಂದಾಜಿಸಲಾಗಿದೆ. ಇದೇ ಮೊದಲ ಬಾರಿಗೆ ನೂರು ಪ್ರಕರಣಗಳು ಒಂದೇ ದಿನ ದೃಢ ಪಟ್ಟಿರುವುದು ಜಿಲ್ಲೆಯನ್ನು ಇನ್ನಷ್ಟು ಆತಂಕಕ್ಕೀಡುಮಾಡಿದೆ.

100 ಪ್ರಕರಣಗಳ ಪೈಕಿ ರಾಮನಗರ ತಾಲೂಕು ಒಂದರಲ್ಲೇ 51 ಪ್ರಕರಣಗಳಿದ್ದರೆ, ಮಾಗಡಿಯಲ್ಲಿ 20, ಚನ್ನಪಟ್ಟಣದಲ್ಲಿ 15 ಹಾಗೂ ಕನಕಪುರದಲ್ಲಿ 14 ಕೇಸ್ ಗಳು ಪತ್ತೆಯಾಗಿವೆ. ಇದರೊಂದಿಗೆ ಇಬ್ಬರು ಸೋಂಕಿತರು ಮೃತ ಪಟ್ಟಿದ್ದರೆ, 150 ಮಂದಿ ಗುಣಮುಖರಾಗಿದ್ದಾರೆ. ಹೀಗಾಗಿ ಒಟ್ಟು 830 ಪ್ರಕರಣಗಳ ಪೈಕಿ ಸಕ್ರಿಯ ಪ್ರಕರಣಗಳ 336 ಎಂಬುದು ಸಮಾಧಾನನಕರ ಸಂಗತಿಯಾಗಿದೆ. ಇದರೊಂದಿಗೆ ಕೋವಿಡ್‌ಗೆ ಜಿಲ್ಲೆಯಲ್ಲಿ ಈವರೆಗೆ 15 ಮಂದಿ ಮೃತಪಟ್ಟಿದ್ದಾರೆ.

ಆತಂಕವು ಉಂಟು, ಸಮಾಧಾನವು ಉಂಟು....

ಒಂದೇ ದಿನ ನೂರು ಪ್ರಕರಣಗಳು ದೃಢಪಟ್ಟಿರುವುದು ಮತ್ತು ಈವರೆಗೆ 830 ಸೋಂಕಿತರು ಜಿಲ್ಲೆಯಲ್ಲಿ ಪತ್ತೆಯಾಗಿರುವುದು ಆತಂಕಕ್ಕೆ ಕಾರಣವಾಗಿದೆ. ಆದರೆ, ಸೋಮವಾರ ಒಂದೇ ದಿನ 613 ನೆಗೆಟಿವ್ ಪ್ರಕರಣಗಳು ಇವೆ. ಇದರೊಂದಿಗೆ ಈವರೆಗೆ ತಪಾಸಣೆಗೊಳ್ಳಪಟ್ಟ 15,532 ಪ್ರಕರಣಗಳ ಪೈಕಿ 14020 ಪ್ರಕರಣಗಳು ಸಹ ನೆಗೆಟಿವ್ ಆಗಿದೆ. ಜತೆಗೆ 479 ಮಂದಿ ಸೋಂಕಿತರು ಗುಣಮುಖರಾಗಿರುವುದು ಇನ್ನೊಂದೆಡೆ ಜಿಲ್ಲೆಯ ಪಾಲಿಗೆ ತುಸು ಸಮಾಧಾನರ ಸಂಗತಿ ಎನ್ನಬಹುದು. ಮಗದೊಂದೆಡೆ 422 ಪರೀಕ್ಷಾ ವರದಿಗಳು ನಿರೀಕ್ಷೆಯಲ್ಲಿವೆ.

ಹೆಚ್ಚಾಗಲು ಕಾರಣವು ಇದೆ..!

ಜಿಲ್ಲೆಯಲ್ಲೆ ಕಳೆದ ಮೂರು ದಿನಗಳಿಂದ ಕೊರೊನಾ ಟೆಸ್ಟಿಂಗ್ ಲ್ಯಾಬ್ ಕಾರ್ಯಾರಂಭ ಮಾಡಿದೆ. ಹೀಗಾಗಿ ದಿನಕ್ಕೆ 700ಕ್ಕೂ ಹೆಚ್ಚು ವರದಿಗಳು ಜಿಲ್ಲೆಗೆ ದಕ್ಕುತ್ತಿವೆ. ಹೀಗಾಗಿ ಕಳೆದ 15 ದಿನಗಳಿಂದ ನಿರೀಕ್ಷೆಯಲ್ಲಿದ್ದ ಪರೀಕ್ಷಾ ವರದಿಗಳು ಒಮ್ಮೆಲೆ ಸೋಟಗೊಳ್ಳುತ್ತಿರುವುದು ಸಹ ಪಾಸಿಟಿವ್ ಪ್ರಕರಣಗಳ ಏರಿಕೆಗೆ ಕಾರಣವಾಗಿದೆ ಎನ್ನಬಹುದು.