- ರವಿಕಿರಣ್‌ ವಿ,
ಏನಿದು?:
ಈ ಬಾರಿ ಮುಂಗಾರು ಹಂಗಾಮು ಕೈಕೊಟ್ಟಿ ಹಿನ್ನೆಲೆಯಲ್ಲಿ ಬೆಳೆಗಳು ಸಂಪೂರ್ಣ ನೆಲಕಚ್ಚಿದ್ದವು. ಹಾಗಾಗಿ ಸರ್ವೆ ಮಾಡಿದ ಅಧಿಕಾರಿಗಳು ರಾಮನಗರ, ಕನಕಪುರ ಮತ್ತು ಹಾರೋಹಳ್ಳಿ ತಾಲೂಕುಗಳನ್ನು ಬರ ಪೀಡಿತ ಪ್ರದೇಶ ಎಂಬುದಾಗಿ ಸರಕಾರಕ್ಕೆ ವರದಿ ನೀಡಿದ್ದರು. ಮಳೆ ಮತ್ತು ಬೆಳೆ ಕೊರತೆ, ತೇವಾಂಶದ ಆಧಾರದ ಮೇಲೆ ಬರ ಪೀಡಿತ ಎಂದು ಘೋಷಿಸಲಾಗುತ್ತದೆ.
ಸರ್ವೆ ಕಾರ‍್ಯ:
ಇನ್ನು ಜಿಲ್ಲೆಯಲ್ಲಿನ ಬರ ಪರಿಸ್ಥಿತಿಯನ್ನು ಅಧ್ಯಾಯನ ಮಾಡುವ ಸಂಬಂಧ ಕೃಷಿ ಮತ್ತು ಕಂದಾಯ ಇಲಾಖೆ ಅಧಿಕಾರಿಗಳು ಜಂಟಿಯಾಗಿ ಸರ್ವೆ ಕಾರ‍್ಯ ಮಾಡಿದ್ದಾರೆ. ಬರ ಪೀಡಿತ ವ್ಯಾಪ್ತಿಗೆ ಆಗಮಿಸಿದ ಒಟ್ಟು 3 ಮೂರು ತಾಲೂಕಿನ 40 ಹೆಚ್ಚು ಹಳ್ಳಿಗಳಲ್ಲಿ ಅನಿಯಮಿತ (ರಾರ‍ಯಂಡಮ್‌)ಆಗಿ ಸರ್ವೆ ಕಾರ‍್ಯ ಮಾಡಿದ್ದಾರೆ. ಇದರಲ್ಲಿ ರಾಮನಗರ ತಾಲೂಕಿನ 14 ಗ್ರಾಮಗಳು, ಕನಕಪುರದ 17 ಹಳ್ಳಿಗಳು, ಹಾರೋಹಳ್ಳಿಯ 9 ಗ್ರಾಮಗಳಲ್ಲಿ ಸರ್ವೆ ಕಾರ‍್ಯ ಮಾಡಿದ್ದಾರೆ.
ಮಳೆ ಕೊರತೆ:
ಮುಂಗಾರು ಹಂಗಾಮಿನ ಕಳೆದ ಆಗಸ್ಟ್‌ನಲ್ಲಿ ಜಿಲ್ಲೆಯಲ್ಲಿ ಶೇ. 69ರಷ್ಟು ಮಳೆ ಕೊರತೆ ಉಂಟಾಗಿದೆ. 108 ಮಿ.ಮೀಟರ್‌ ವಾಡಿಕೆ ಮಳೆಗೆ 35 ಮಿ.ಮೀಟರ್‌ ವಾಸ್ತವ ಮಳೆಯಾಗಿತ್ತು. ಜತೆಗೆ, ಮಾನ್ಸೂನ್‌ ವ್ಯಾಪ್ತಿಯ ಜೂ. 1ರಿಂದ ಸೆ. 3ರ ತನಕ ಜಿಲ್ಲೆಯಲ್ಲಿ 274 ಮಿ.ಮೀಟರ್‌ ವಾಡಿಕೆ ಮಳೆಗೆ 195 ಮಿ.ಮೀಟರ್‌ ವಾಸ್ತವ ಮಳೆಯಾಗಿದೆ. ಆ ಮೂಲಕ -29ರಷ್ಟು ಮಳೆ ಕೊರತೆ ಕಂಡು ಬಂದಿದೆ.
ಬರ ಘೋಷಣೆ ನಿಯಮಗಳು
ಬರ ಪೀಡಿತ ವ್ಯಾಪ್ತಿಗೆ ತಾಲೂಕು ಘೋಷಣೆ ಮಾಡಲು ಸರಕಾರ ಒಂದಿಷ್ಟು ಮಾನದಂಡವನ್ನು ಅನುರಿಸುತ್ತದೆ. ಈ ಪ್ರಕಾರ ಮೂರು ಹಂತಗಳಲ್ಲಿ ಪರಿಶೀಲನೆ ಹಾಗೂ ಸರ್ವೆ ಕಾರ‍್ಯ ಮುಗಿದ ಬಳಿಕ ಬರ ಪರಿಸ್ಥಿತಿ ಘೋಷಣೆ ಮಾಡುತ್ತದೆ.
ಹಂತ-1ರಲ್ಲಿ ಮಳೆ ಕೊರತೆಯು ಶೇ.60ಕ್ಕಿಂತ ಹೆಚ್ಚು ಮತ್ತು ಸತತ ಮೂರು ವಾರಗಳು ಅಥವಾ ಅದಕ್ಕಿಂತ ಹೆಚ್ಚು ಶುಷ್ಕ ವಾತಾವರಣ ಕಂಡು ಬರಬೇಕು.
ಹಂತ-2ರಲ್ಲಿ ತತ್ಪರಿಣಾಮ ಮಾನದಂಡಗಳಾದ ಕೃಷಿ ಬಿತ್ತನೆ ಪ್ರದೇಶ, ಉಪಗ್ರಹ ಆಧಾರಿತ ಬೆಳೆ ಸೂಚ್ಯಂಕ, ತೇವಾಂಶ ಕೊರತೆ ಹಾಗೂ ಜಲಸಂಪನ್ಮೂಲ ಸೂಚ್ಯಂಕಗಳಲ್ಲಿ ತೀವ್ರತೆಯನ್ನು ಆಧರಿಸಿ ಬರ ತೀವ್ರತೆಯನ್ನು ನಿರ್ಧಾರಿಸಲಾಗುತ್ತದೆ.
ಹಂತ-3 ರಲ್ಲಿ ಬರ ಪರಿಸ್ಥಿತಿ ಕಂಡುಬಂದ ತಾಲೂಕುಗಳಲ್ಲಿನ ಆಯ್ದೆ ಪ್ರದೇಶದಲ್ಲಿ ಕ್ಷೇತ್ರ ಪರಿಶೀಲನೆ ಹಾಗೂ ದೃಢೀಕರಣಕ್ಕಾಗಿ ಬರಪೀಡಿತ ತಾಲೂಕುಗಳಲ್ಲಿನ ಶೇ.10ರಷ್ಟು ಗ್ರಾಮ, ಪ್ರದೇಶಗಳನ್ನು ಆಯ್ಕೆ ಮಾಡಿ 5 ಪ್ರಮುಖ ಬೆಳೆ ಕ್ಷೇತ್ರಗಳಲ್ಲಿ ಬೆಳೆ ಹಾನಿಗೆ ಸಂಬಂಧಿಸಿದ್ದಂತೆ ಜಿಲ್ಲಾಧಿಕಾರಿ ಅಧ್ಯಕ್ಷತೆಯಲ್ಲಿ ಜಂಟಿ ಸಮೀಕ್ಷೆಯನ್ನು ಕೈಗೊಂಡು ದೃಢೀಕೃತ ವರದಿ ಸಲ್ಲಿಸಬೇಕಾಗುತ್ತದೆ.
ಉಳಿದ ತಾಲೂಕು ಘೋಷಣೆ ಸಾಧ್ಯತೆ
ಜಿಲ್ಲೆಯಲ್ಲಿ ವಾಡಿಕೆ ಮಳೆಯಾಗದೆ ವಾತಾವರಣ ಇದೇ ರೀತಿ ಮುಂದುವರಿದರೆ ಮಾಗಡಿ ಹಾಗೂ ಚನ್ನಪಟ್ಟಣ ತಾಲೂಕುಗಳನ್ನು ಬರ ಪೀಡಿತ ಪಟ್ಟಿಗೆ ಸೇರ್ಪಡೆಗೊಳ್ಳಲಿದೆ. ಈಗಾಗಲೇ ಚನ್ನಪಟ್ಟಣ ತಾಲೂಕಿನಲ್ಲಿ ಬಿತ್ತನೆ ಕಡಿಮೆಯಾಗಿದೆ. ಮಾಗಡಿ ತಾಲೂಕಿನಲ್ಲಿ ಬಿತ್ತನೆಯಾಗಿಲ್ಲ. ಸಕಾಲಕ್ಕೆ ಮಳೆಯಾಗದಿದ್ದರೆ, ಈ ಎರಡು ತಾಲೂಕು ಸಹ ಬರ ಪೀಡಿತವಾಗಲಿದೆ.
ಘೋಷಣೆ ಬಳಿಕ:
ಸರಕಾರ ಒಂದು ತಾಲೂಕನ್ನು ಬರ ಎಂದು ಘೋಷಿಸಿದ ಬಳಿಕ ಆ ತಾಲೂಕಿಗೆ ಬೆಳೆ ನಷ್ಟ ಪರಿಹಾರ ದೊರೆಯಲಿದೆ. ಗ್ರಾಮದಲ್ಲಿ ಕುಡಿಯುವ ನೀರಿಗೂ ಹಾಹಾಕಾರ ಇದ್ದರೆ ಸೂಕ್ತ ವ್ಯವಸ್ಥೆ ಕಲ್ಪಿಸಿಕೊಡುತ್ತದೆ. ಜಾನುವಾರುಗಳಿಗೆ ಮೇವು ಮತ್ತು ಕುಡಿಯುವ ನೀರು ಒದಗಿಸುವ ಸಂಬಂಧ ವ್ಯವಸ್ಥೆ ಮಾಡಲಾಗುತ್ತದೆ. ಗೋಶಾಲೆ ತೆರೆಯಲಾಗುತ್ತದೆ.
ರಾಮನಗರ ಜಿಲ್ಲೆಯ ಮಾಗಡಿ ಮತ್ತು ಚನ್ನಪಟ್ಟಣ ತಾಲೂಕುಗಳನ್ನು ಹೊರತು ಪಡಿಸಿ, ರಾಮನಗರ, ಕನಕಪುರ ಹಾಗೂ ಹಾರೋಹಳ್ಳಿಯನ್ನು ಬರಪೀಡಿತ ತಾಲೂಕುಗಳೆಂದು ಗುರುತಿಸಲಾಗಿದೆ ಎಂದು ರಾಮನಗರ ಕೃಷಿ ಇಲಾಖೆ ಜಂಟಿ ನಿರ್ದೇಶಕಿ ಅಂಬಿಕಾ ಹೇಳಿದ್ದಾರೆ.