ರಾಮನಗರ: ಕೊರೊನಾಗೆ 3ನೇ ಬಲಿ, ಮೂವರಲ್ಲಿ ಸೋಂಕು ಪತ್ತೆ

ರಾಮನಗರ: ರಾಮನಗರ ಟೌನ್‌ನಲ್ಲಿ ಸೋಮವಾರ ಮೂವರು ಸೋಂಕಿತರು ಪತ್ತೆಯಾಗಿದ್ದಾರೆ. ಮಾಗಡಿಯಲ್ಲಿ 90 ವರ್ಷದ ವ್ಯಕ್ತಿಯ ಸಾವಿನ ನಂತರ ಕೊರೊನಾ ಸೋಂಕು ದೃಢಪಟ್ಟಿರುವುದನ್ನು ಆರೋಗ್ಯ ಇಲಾಖೆ ಸೋಮವಾರ ಖಚಿತಪಡಿಸಿದೆ.

ಇದರಂತೆ ಜಿಲ್ಲೆಯಲ್ಲಿ ಕೊರೊನಾ ಮೂರು ಬಲಿ ಪಡೆದಿದೆ. 90 ವರ್ಷದ ವ್ಯಕ್ತಿ ಶನಿವಾರ ತಡರಾತ್ರಿ ಮೃತಪಟ್ಟಿದ್ದರು. ಸೋಮವಾರ 248 ವರದಿಗಳು ನೆಗೆಟಿವ್ ಬಂದಿದ್ದು, ಇದೀಗಷ್ಟೆ 58 ವರ್ಷದ ವೃದ್ಧ ಹಾಗೂ 28 ವರ್ಷದ ಯುವಕನಿಗೆ ಸೋಂಕು ದೃಢಪಟ್ಟಿರುವುದನ್ನು ಆರೋಗ್ಯ ಇಲಾಖೆ ದೃಢಪಡಿಸಿದೆ. ಇಬ್ಬರೂ ಸೋಂಕಿತರೊಬ್ಬರ ಪ್ರಾಥಮಿಕ ಸಂಪರ್ಕದಲ್ಲಿದ್ದರು. 750ಕ್ಕೂ ಅಧಿಕ ಕೋವಿಡ್ ಪರೀಕ್ಷಾ ವರದಿಗಳು ಬರಬೇಕಿದೆ.

ಅಲ್ಲದೇ ರಾಮನಗರದ ಕಾಯಿಸೊಪ್ಪಿನ ಬೀದಿ ಮತ್ತು ವಿಜಯನಗರ ಬಡಾವಣೆಯಲ್ಲಿ ಇಬ್ಬರು ಶಂಕಿತ ಮಹಿಳೆಯರನ್ನು ಆರೋಗ್ಯ ಇಲಾಖೆ ಕರೆದೊಯ್ದಿದ್ದು, ಸೋಂಕು ದೃಢಪಟ್ಟಿರುವುದನ್ನು ಆರೋಗ್ಯ ಇಲಾಖೆ ಖಚಿತಪಡಿಸಿಲ್ಲ. ಮಂಗಳವಾರ ಖಚಿತ ಮಾಹಿತಿ ಲಭ್ಯವಾಗಲಿದೆ.