ಮದುವಣಗಿತ್ತಿಯಂತೆ ಸಿಂಗಾರಗೊಂಡ ವಿಶೇಷಚೇತನ ಮತಕೇಂದ್ರ

ರಾಮನಗರ: ಪ್ರಥಮ ಬಾರಿಗೆ ಚುನಾವಣಾ ಆಯೋಗ ಸ್ಥಾಪಿಸಲಾಗಿರುವ ವಿಶೇಷಚೇತನ ಸಿಬ್ಬಂದಿಯುಳ್ಳ ಮತಗಟ್ಟೆ ಮದುವಣಗಿತ್ತಿಯಂತೆ ಸಿಂಗಾರಗೊಂಡಿದೆ.

ಮತದಾರರನ್ನು ಮತಗಟ್ಟೆಗಳ ಬಳಿ ಆಕರ್ಷಿಸುವ ಸಲುವಾಗಿ ಪ್ರಥಮ ಬಾರಿಗೆ ವಿನೂತನ ಪ್ರಯೋಗಕ್ಕೆ ಚುನಾವಣಾ ಆಯೋಗ ಮುಂದಾಗಿದೆ. ಜಿಲ್ಲೆಯಲ್ಲಿ ಈ ರೀತಿಯ ನಾಲ್ಕು ಮತಗಟ್ಟೆಗಳನ್ನು ಸ್ಥಾಪಿಸಲಾಗಿದೆ. ಜಿಲ್ಲಾ ಕೇಂದ್ರ ರಾಮನಗರದಲ್ಲಿ ನಗರಸಭೆ ಪಕ್ಕದ ನೆಹರೂ ಶಾಲಾ ಆವರಣದ ಮತಗಟ್ಟೆ ಸಂಖ್ಯೆ 67ನ್ನು ಇದಕ್ಕೆ ಆಯ್ಕೆ ಮಾಡಿಕೊಳ್ಳಲಾಗಿದೆ.

ನಾಲ್ಕು ಜನ ಸಿಬ್ಬಂದಿ ಇದರಲ್ಲಿ ಕಾರ‍್ಯ ನಿರ್ವಹಿಸುತ್ತಿದ್ದು, ಎಲ್ಲರೂ ಸಹ ವಿಶೇಷ ಚೇತನರೇ ಆಗಿದ್ದಾರೆ. ಈ ಮತಗಟ್ಟೆಯಲ್ಲಿ ಒಟ್ಟಾರೆ 800ರಕ್ಕೂ ಹೆಚ್ಚು ಮತದಾರರಿದ್ದಾರೆ.

ಅಲಂಕೃತಗೊಂಡ ಮತಗಟ್ಟೆ: ಮೊದಲ ಬಾರಿಯ ಪ್ರಯೋಗಕ್ಕೆ ಮುಂದಾಗಿರುವ ಚುನಾವಣಾ ಆಯೋಗ, ಮತಗಟ್ಟೆಯನ್ನು ಮದುವಣಗಿತ್ತಿಯಂತೆ ಅಲಂಕೃತಗೊಳಿಸಿದೆ. ಪ್ರವೇಶದ್ವಾರದ ಮುಂಭಾಗ ವಿಶೇಷಚೇತನ ಸ್ನೇಹಿ ಮತಕೇಂದ್ರ ಎಂದು ದೊಡ್ಡ ಬ್ಯಾನರ್‌ ಹಾಕಲಾಗಿದೆ. ಕೇಂದ್ರದ ಸುತ್ತಲು ಕಂಬಗಳನಿಟ್ಟು, ಅದಕ್ಕೆ ನಾಡ ಬಣ್ಣ ಕೆಂಪು ಮತ್ತು ಹಳದಿ ಬಟ್ಟೆಗಳನ್ನು ಸುತ್ತಲಾಗಿದೆ. ಮತ ಕೇಂದ್ರದೊಳಗೆ ಬಲೂನು ಸೇರಿದಂತೆ ಅಲಂಕೃತ ವಸ್ತುಗಳಿಂದ ಶೃಂಗರಿಸಲಾಗಿದೆ. ಒಟ್ಟಾರೆಯಾಗಿ ಈ ಮತಕೇಂದ್ರ ಜನತೆಯನ್ನು ಆಕರ್ಷಿಸುತ್ತಿದೆ.