ಯುವಕನ ಹತ್ಯೆ ಮಾಡಿದ ಆರೋಪಿಗಳ ಬಂಧನ

ಮಾಗಡಿ: ರವಿ ಎಂಬ ಯುವಕನನ್ನು ಬರ್ಬರವಾಗಿ ಹತ್ಯೆ ಮಾಡಿದ ನಾಲ್ವರು ಆರೋಪಿಗಳನ್ನು ಮಾಗಡಿ ಪೊಲೀಸರು ಕೊಲೆಯಾದ ಮರುದಿನವೇ ಬಂಧಿಸಿದ್ದಾರೆ.

ತಾಲೂಕಿನ ಮಾನಗಲ್‌ ಗ್ರಾಮದ ನಿವಾಸಿ ರವಿ ಎಂಬ ಯುವಕ ಪಟ್ಟಣದ ಬೈಚಾಪುರದ ನಾಗೇಶ್‌ ಎಂಬುವರ ಪುತ್ರಿಯನ್ನು ಪ್ರೀತಿಸುತ್ತಿದ್ದನು. ರವಿಗೆ ಬುದ್ಧಿ ಹೇಳುವಂತೆ ಯುವತಿಯ ತಂದೆ ನಾಗೇಶ್‌, ಪಟ್ಟಣದ ಹೊಸಪೇಟೆಯ ನಿವಾಸಿ ಲೋಕೇಶ್‌ ಎಂಬುವವರಿಗೆ ತಿಳಿಸಿದ್ದು, ಲೋಕೇಶ್‌ ಉದಯ್‌ ಹಾಗೂ ಇತರರು ಭಾನುವಾರ ರಾತ್ರಿ ರವಿಯನ್ನು ತಿರುಮಲೆ ರಸ್ತೆಯ ಲೋಕೋಪಯೋಗಿ ಉಪ ವಿಭಾಗ ಕಚೇರಿಯ ಮುಂಭಾಗ ನೂರಾರು ಸಾರ್ವಜನಿಕರ ಎದುರೇ ಹಾಕಿ ಬ್ಯಾಟ್‌ನಿಂದ ಹಿಗ್ಗಾಮುಗ್ಗಾ ಥಳಿಸಿ ಕತ್ತು ಕೊಯ್ದು ಹತ್ಯೆ ಮಾಡಿ ಮಾಗಡಿ ಗುಡೇಮಾರನಹಳ್ಳಿ ರಸ್ತೆ ಪಾರಂಗ ಶಾಲೆಯ ಬಳಿ ಇರುವ ಸೇತುವೆ ಕೆಳಗೆ ಎಸೆದು ಪರಾರಿಯಾಗಿದ್ದರು. ಮಾಗಡಿ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿದ್ದು, ಪೊಲೀಸರು ಆರೋಪಿಗಳ ಪತ್ತೆಗೆ ತೀವ್ರ ಪ್ರಯತ್ನ ನಡೆಸಿದ್ದು, ನಾಲ್ವರು ಆರೋಪಿಗಳಾದ ಯುವತಿಯ ತಂದೆ ನಾಗೇಶ್‌, ಲೋಕೇಶ್‌, ಉದಯ್‌, ರವಿಕುಮಾರ್‌ ಎಂಬುವವರನ್ನು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಿ ಪೊಲೀಸ್‌ ಕಸ್ಟಡಿಗೆ ಪಡೆದಿದ್ದಾರೆ.