ನನ್ನ ಮಗನಿಗೆ ಬೆಂಬಲ ಕೊಡಿ, ಸಂಕಷ್ಟ ಕಾಣಿಸುತ್ತಿಲ್ಲವೇ? ಅವನು ಏನು ಮಾಡಿಲ್ಲ: ಡಿಕೆಶಿ ತಾಯಿ ಗೌರಮ್ಮ ಕಣ್ಣೀರು

ರಾಮನಗರ: ಅಯೋ... ಬನ್ನಿ.... ನನ್ನ ಮಗನಿಗೆ ನೈತಿಕ ಬೆಂಬಲ ನೀಡಿ. ಅವನು ಏನು ಮಾಡಿಲ್ಲ. ನನ್ನ ಮಗನಿಗೆ ಇಂತಹ ಸಂಕಷ್ಟ ನೀಡುತ್ತಿದ್ದಾರೆ ಎಂದು ಗದ್ಗದಿತ ಧ್ವನಿಯಲ್ಲೇ ಕಣ್ಣಿರಿಟ್ಟಿದ್ದು ಮಾಜಿ ಸಚಿವ ಡಿ.ಕೆ.ಶಿವಕುಮಾರ್ ಅವರ ತಾಯಿ ಗೌರಮ್ಮ.

ನೀವೇ ನಮ್ಮ ಮಕ್ಕಳಿಗೆ ಧೈರ್ಯ ಹೇಳಬೇಕು. ಯಾವ ತಪ್ಪನ್ನು ಮಾಡದವನಿಗೆ ಇಂತಹ ಸಂಕಷ್ಟ ಬಂದಿದೆ. ನೀವೇ ಅತನನ್ನು ಕರೆದುಕೊಂಡು ಬರಬೇಕು ಎಂದು ಮಾಜಿ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಮುಂದೆ ಕೈ ಮುಗಿದು ನಿಂತಿದ್ದರು.

ಕನಕಪುರ ತಾಲೂಕಿನ ಕೋಡಿಹಳ್ಳಿಯಲ್ಲಿನ ಸಂಸದ ಡಿ.ಕೆ.ಸುರೇಶ್ ಅವರ ನಿವಾಸದಲ್ಲಿದ್ದ ಗೌರಮ್ಮ ಅವರನ್ನು ಭೇಟಿ ಮಾಡಲು ಆಗಮಿಸಿದ ಎಚ್.ಡಿ.ಕುಮಾರಸ್ವಾಮಿ ಅವರನ್ನೇ ಎದುರು ನೋಡುತ್ತಿದ್ದ, ಡಿಕೆಶಿ ಅವರ ತಾಯಿ ಎಚ್.ಡಿ.ಕೆ ಅವರನ್ನು ಕಂಡೊಡನೆ ಕಣ್ಣೀರು ಹರಿಸಿದರು. ಕೈ ಮುಗಿದು ನಿಂತು, ತಮ್ಮ ಮಗನ ಪರಿಸ್ಥಿತಿ ನೆನೆದು ಬಾವುಕರಾದರು.

ಮನೆಯೊಳಗೆ ಕಾಲಿಟ್ಟ ಎಚ್.ಡಿ.ಕೆ ಮೊದಲು ಗೌರಮ್ಮ ಅವರ ಕಾಲಿಗೆ ನಮಸ್ಕರಿಸಿ, ತಮ್ಮ ತಲೆ ಮೇಲೆ ಕೈ ಇಟ್ಟು ಆಶೀರ್ವಾದ ಮಾಡುವಂತೆ ಹೇಳಿ, ಪಕ್ಕದಲ್ಲೇ ಇದ್ದ ಸೋಫಾ ಮೇಲೆ ಗೌರಮ್ಮ ಅವರನ್ನು ಕೂರಿಸಿಕೊಂಡು 15 ನಿಮಿಷಗಳ ಕಾಲ ಸಂತೈಸಿದರು.


ನೀವು ನಮ್ಮ ತಾಯಿ ಇದ್ದಂತೆ. ನೀವು ಅಳಬಾರದು. ಸಮಾಧಾನವಾಗಿರಿ. ನಿಮ್ಮ ಮಗ ಎಂತಹ ದೊಡ್ಡ ಹೋರಾಟಗಳನ್ನೇ ಗೆದ್ದು ಬಂದಿದ್ದಾರೆ. ಇದು ಯಾವ ಲೆಕ್ಕ. ನೀವು ಒಬ್ಬಂಟಿ ಅಲ್ಲ. ನಿಮ್ಮೊಂದಿಗೆ ನಾವಿದ್ದೇವೆ ಎಂಬುದನ್ನು ತೋರಿಸುವುದಕ್ಕಾಗಿಯೇ ಬೆಂಗಳೂರಿನಿಂದ ಇಲ್ಲಿಗೆ ಬಂದಿದ್ದೇನೆ ಎಂದರು

ನಿಮ್ಮ ಪುತ್ರ ಹುಟ್ಟು ಹೋರಾಟಗಾರ. ಅವರನ್ನು ಏನು ಮಾಡಲು ಸಾಧ್ಯವಿಲ್ಲ ಇಲ್ಲ. ನೀವು ‘ಧೈರ್ಯವಾಗಿರಬೇಕು ಎಂದು ಎಚ್‌ಡಿ ಕುಮಾರಸ್ವಾಮಿ ಸಮಧಾನದ ಮಾತುಗಳನ್ನಾಡಿದರು.