ಡಿವೈಎಸ್ಪಿ ಪುತ್ರಿಯ ಮೊಬೈಲ್‌ ಕದ್ದ ಕಳ್ಳ

ಚನ್ನಪಟ್ಟಣ: ಪಟ್ಟಣದ ಕೆಎಸ್‌ಆರ್‌ಟಿಸಿ ನಿಲ್ದಾಣದಲ್ಲಿ ಮೊಬೈಲ್‌ನಲ್ಲಿ ಸಂಭಾಷಣೆ ಮಾಡಿಕೊಂಡು ಹೋಗುತ್ತಿದ್ದ ಎಂಜಿನಿಯರಿಂಗ್‌ ಕಾಲೇಜು ವಿದ್ಯಾರ್ಥಿನಿ ಕೈಯಿಂದ ಕಳ್ಳನೊಬ್ಬ ಬೆಲೆ ಬಾಳುವ ಮೊಬೈಲ್‌ ಕಿತ್ತು ಪರಾರಿಯಾಗಿದ್ದಾನೆ.

ವಿದ್ಯಾರ್ಥಿನಿ ಶರ್ಮಿಳಾ ಮೊಬೈಲ್‌ ಕಳೆದುಕೊಂಡವರು. ಬೆಂಗಳೂರಿನ ವಿಜಯನಗರದ ಪೊಲೀಸ್‌ ಠಾಣೆಯ ಡಿವೈಎಸ್ಪಿ ಪುತ್ರಿಯಾದ ಆಕೆ ಪಟ್ಟಣದ ಕೆಂಪೇಗೌಡ ಬಡಾವಣೆಯಲ್ಲಿ ತನ್ನ ಸ್ನೇಹಿತೆಯ ಮನೆಗೆ ಬಂದು ನಂತರ ಬೆಂಗಳೂರಿಗೆ ಹೋಗಲು ಬಸ್ಸ್‌ ನಿಲ್ದಾಣದಲ್ಲಿರುವಾಗ ಈ ಘಟನೆ ನಡೆದಿದೆ.

ಬೆಂಗಳೂರಿಗೆ ಬಸ್ಸ್‌ ಹತ್ತಲು ಮೊಬೈಲ್‌ನಲ್ಲಿ ಸಂಭಾಷಣೆ ಮಾಡಿಕೊಂಡು ಬರುವಾಗ ಹಿಂಬದಿಯಿಂದ ಬಂದ ಯುವಕ ಏಕಾಎಕಿ ಮೊಬೈಲ್‌ ಕಿತ್ತು ಪರಾರಿಯಾಗಿದ್ದಾನೆ. ಈ ಘಟನೆಯಿಂದ ಬೆದರಿದ ಯುವತಿ ತನ್ನ ತಂದೆಗೆ ಕರೆ ಮಾಡಿ ತಿಳಿಸಿದ್ದಾಳೆ. ಸುಮಾರು 50 ಸಾವಿರ ರೂ, ಮೌಲ್ಯದ ಮೊಬೈಲ್‌ ಅಪಹರಣವಾಗಿದ್ದು, ತನ್ನ ತಂದೆಯ ಸೂಚನೆಯಂತೆ ಠಾಣೆಗೆ ದೂರು ನೀಡಿ ಬೆಂಗಳೂರಿನತ್ತ ಪ್ರಯಾಣ ಬೆಳೆಸಿದ್ದಾರೆ.