'ರಾಜ್ಯದಲ್ಲಿ ಶೀಘ್ರ ಚುನಾವಣೆ, ಬಿಜೆಪಿಯವರಿಂದಲೇ ಸರಕಾರ ಪತನʼ: ಡಿ.ಕೆ.ಸುರೇಶ್‌ ಭವಿಷ್ಯ

ರಾಮನಗರ: ರಾಜ್ಯದಲ್ಲಿ ಶೀಘ್ರದಲ್ಲಿ ಮತ್ತೊಂದು ಚುನಾವಣೆ ನಡೆಯಲಿದೆ. ಬಿಜೆಪಿಯವರಿಂದಲೇ ಸರಕಾರ ಪತನವಾಗಲಿದೆ ಎಂದು ಸಂಸದ ಡಿ.ಕೆ.ಸುರೇಶ್‌ ಭವಿಷ್ಯ ನುಡಿದಿದ್ದಾರೆ. ಮಾಗಡಿಯಲ್ಲಿ ನಡೆದ ಕಾಂಗ್ರೆಸ್ ಸಭೆಯಲ್ಲಿ ಮಾತನಾಡಿದ ಅವರು, ಭಿನ್ನಮತದಿಂದ ಸರಕಾರ ಪತನವಾಗಿ ಅತಿ ಶೀಘ್ರದಲ್ಲಿ ರಾಜ್ಯದಲ್ಲಿ ಚುನಾವಣೆ ನಡೆಯಲಿದೆ ಎಂದು ಹೇಳಿದರು.

ಮುಂದಿನ ದಿನಗಳಲ್ಲಿ ಕಾಂಗ್ರೆಸ್ ಪಕ್ಷವನ್ನು ಅಧಿಕಾರಕ್ಕೆ ತರಬೇಕಿದೆ. ಮಾಗಡಿಯಲ್ಲಿ ಮಾಜಿ ಶಾಸಕ ಬಾಲಕೃಷ್ಣ ನೇತೃತ್ವದಲ್ಲಿ ಕಾಂಗ್ರೆಸ್ ಕಟ್ಟುತ್ತೇವೆ. ವಿರೋಧಿಗಳ ಹೇಳಿಕೆಗೆ ತಲೆ ಕೆಡಿಸಿಕೊಳ್ಳುವುದಿಲ್ಲ. ಪಕ್ಷ ಸಧೃಡವಾಗಿ ಬೆಳೆಯಬೇಕು ಎಂದು ಅವರು ಹೇಳಿದರು.

ಕಾಂಗ್ರೆಸ್ ನೀಡಿದ ಕಾರ್ಯಕ್ರಮಗಳನ್ನು ಯಾರಿಂದಲೂ ನೀಡಲು ಸಾಧ್ಯವಿಲ್ಲ. ಪ್ರಧಾನಿ ನರೇಂದ್ರ ಮೋದಿ ಅವರಿಂದಲೂ ಕಾಂಗ್ರೆಸ್‌ ನೀಡಿದ ಕಾರ್ಯಕ್ರಮಗಳನ್ನು ಅಳಿಸಲು ಸಾಧ್ಯವಿಲ್ಲ. 20 ಲಕ್ಷ ಕೋಟಿ ರೂ.ನ ಕೊರೊನಾ ಪ್ಯಾಕೇಜ್‌ ಹೆಸರಲ್ಲಿ ಜನರಿಗೆ ಬಿಜೆಪಿ ನಾಮ ಹಾಕುತ್ತಿದೆ ಎಂದು ಹೇಳಿದರು.

'22 'ಕೈ' ಶಾಸಕರು ಸಂಪರ್ಕದಲ್ಲಿ; ಐವರು ತಕ್ಷಣ ರಾಜೀನಾಮೆಗೆ ಸಿದ್ಧʼ: ರಮೇಶ್‌ ಜಾರಕಿಹೊಳಿ

ಕೊರೊನಾ ಬಿಕ್ಕಟ್ಟಿನ ನಡುವೆಯೂ ರಾಜ್ಯದಲ್ಲಿ ರಾಜಕೀಯ ಚಟುವಟಿಕೆಗಳು ಗರಿಗೆದರಿವೆ. ಬಿಜೆಪಿಯ ಒಂದಿಷ್ಟು ಶಾಸಕರು ಗುರುವಾರ ಸಭೆ ಸೇರಿರುವುದು ಇವೆಲ್ಲಾ ಅನುಮಾನಗಳಿಗೆ ಕಾರಣವಾಗಿದೆ. ಮುಖ್ಯಮಂತ್ರಿ ಬಿ.ಎಸ್‌.ಯಡಿಯೂರಪ್ಪ ಅವರು ವಲಸಿಗರಿಗೆ ಮಣೆ ಹಾಕುತ್ತಿದ್ದಾರೆ ಎಂದು ಮೂಲ ಬಿಜೆಪಿಗರು ಅಸಮಧಾನ ವ್ಯಕ್ತಪಡಿಸುತ್ತಿದ್ದಾರೆ.

ಕಮಲದಲ್ಲಿ ಬಂಡಾಯದ ಬಿಸಿ! ಅಸಮಾಧಾನದ ಕಿಡಿಯ ಹಿಂದೆ ಯಾರ ಕೈವಾಡ?