ಹೈಟೆನ್ಷನ್‌ ವಿದ್ಯುತ್‌ ಕಂಬದಲ್ಲಿ ಬುದ್ಧಿಮಾಂದ್ಯನ ಡ್ಯಾನ್ಸ್‌

ಮಾಗಡಿ ಗ್ರಾಮಾಂತರ: ಬುದ್ಧಿಮಾಂದ್ಯನೊಬ್ಬ ಹೈಟೆನ್ಷನ್‌ ವಿದ್ಯುತ್‌ ಕಂಬದ ಮೇಲೆ ಹತ್ತಿ ಕೆಳಗಿಳಿಯಲು ನಿರಾಕರಿಸುವ ಮೂಲಕ ಜನರು ಹಾಗೂ ಬೆಸ್ಕಾಂ ಅಧಿಕಾರಿಗಳನ್ನು ಸತಾಯಿಸಿದ ಘಟನೆ ಮಾಗಡಿ ತಾಲೂಕಿನ ತಿಪ್ಪಸಂದ್ರ ಹೋಬಳಿ ಕೇಂದ್ರದ ರೈತರ ಜಮೀನನಲ್ಲಿ ನಡೆದಿದೆ.

ಶುಕ್ರವಾರ ಮುಂಜಾನೆ 6 ಗಂಟೆ ವೇಳೆ 350 ಅಡಿ ಎತ್ತರವಾದ ಹೈಟೆನ್ಷನ್‌ ಕಂಬದ ಮೇಲೆ ಹತ್ತಿ ಕುಳಿತ ಬುದ್ಧಿಮಾಂದ್ಯ, ಜನರು ಗಾಬರಿಗೊಳಿಸಿದ. ತಕ್ಷಣವೇ ಪೊಲೀಸರು ಮತ್ತು ಅಗ್ನಿಶಾಮಕ ದಳಕ್ಕೆ ವಿಷಯ ತಿಳಿಸಲಾಯಿತು.

ಪೊಲೀಸರು ಹಾಗೂ ಅಗ್ನಿಶಾಮಕ ದಳದ ಅಧಿಕಾರಿಗಳು ಸ್ಥಳಕ್ಕೆ ದೌಡಾಯಿಸಿ, ಬುದ್ಧಿಮಾಂದ್ಯನನ್ನು ಕಂಬದಿಂದ ಕೆಳಗಿಸಲು ಹರಸಾಹಸಪಟ್ಟರು.

ಕನ್ನಡ ಭಾಷೆ ತಿಳಿಯದ ಈತ, ತಮಿಳು, ಕೊಂಕಣಿ ಮತ್ತಿತರ ಭಾಷೆಗಳಲ್ಲಿ ಮನಬಂದಂತೆ ಹರಟುತ್ತಾ, ಸತಾಯಿಸತೊಡಗಿದ. ವಿಷಯ ತಿಳಿಯುತ್ತಿದ್ದಂತೆ ಬೆಸ್ಕಾಂ ಸಿಬ್ಬಂದಿ ಕರೆಂಟ್‌ ಕಟ್‌ ಮಾಡಿದ್ದರಿಂದ ಈತನ ಪ್ರಾಣ ಉಳಿಯಿತು. ತನ್ನ ಚೇಷ್ಠೆಗಳನ್ನು ಹೆಚ್ಚಿಸಿದ ಈತ, ಹೈಟೆನ್ಷನ್‌ ತಂತಿಯನ್ನು ಹಿಡಿದು ನರ್ತಿಸತೊಡಗಿದ.

ವಿಷಯ ತಿಳಿಯುತ್ತಿದ್ದಂತೆ ತಿಪ್ಪಸಂದ್ರದ ಎಲ್ಲ ಜನರೂ ಸ್ಥಳದಲ್ಲಿ ಜಮಾಯಿಸಿ ಪುಕ್ಕಟೆ ಮನರಂಜನೆ ಪಡೆದರು. ಕೊನೆಗೂ ಮಧ್ಯಾಹ್ನ 2ರ ಸುಮಾರಿಗೆ ಬುದ್ಧಿಮಾಂದ್ಯ ಕಂಬದಿಂದ ಕೆಳಗಿಳಿದ. ಇದನ್ನೇ ಕಾಯುತ್ತಾ ಕುಳಿತಿದ್ದ ಪೊಲೀಸರು ಮತ್ತು ಅಗ್ನಿಶಾಮಕ ಸಿಬ್ಬಂದಿ ಆತನನ್ನು ಹಿಡಿದು ಕರೆದೊಯ್ದರು. ಕುದೂರು ಠಾಣೆಯಲ್ಲಿ ಪ್ರಕರಣ ದಾಖಲಿಸಿ ವಿಚಾರಣೆ ನಡೆಸುತ್ತಿದ್ದಾರೆ.