ಸತ್ತ ಮರಿಯನ್ನು 3 ದಿನಗಳಿಂದ ಹೊತ್ತು ತಿರುಗುತ್ತಿರುವ ಕೋತಿ

ಚನ್ನಪಟ್ಟಣ: ವಿದ್ಯುತ್‌ ಅವಘಡದಲ್ಲಿ ಮೃತಪಟ್ಟ ತನ್ನ ಮರಿಯನ್ನು ಮೂರು ದಿನಗಳಿಂದ ಹೆಗಲ ಮೇಲೆ ಹಾಕಿಕೊಂಡು ತಿರುಗುತ್ತಿರುವ ತಾಯಿ ಕೋತಿಯ ನೋವಿನ ಕೂಗು
ಮುಗಿಲು ಮುಟ್ಟಿದೆ.

ಪಟ್ಟಣದ ಹಳೆಯ ಕೋರ್ಟ್‌ ಕಟ್ಟಡದ ರಸ್ತೆಯಲ್ಲಿ ಮೂರು ದಿನಗಳ ಹಿಂದೆ ತನ್ನ ತಾಯಿ ಕೋತಿಯ ಜತೆ ಆಡಿಕೊಂಡು ಓಡಾಡುತ್ತಿದ್ದ 10 ತಿಂಗಳ ಮರಿಕೋತಿ ಆಕಸ್ಮಿಕವಾಗಿ ವಿದ್ಯುತ್‌ ತಂತಿಗೆ ಸಿಲುಕಿ ಮೃತಪಟ್ಟಿದೆ.

ಕರುಳಿನ ಕುಡಿ ಕಣ್ಣೆದುರಿಗೆ ಸಾವನ್ನುಪ್ಪಿದ್ದು ನೋಡಿದ ತಾಯಿ ಕೋತಿಯ ಆಕ್ರಂದನ ಮುಗಿಲು ಮುಟ್ಟಿದೆ. ಒಂದು ತಾಸುಗಳ ಕಾಲ ತನ್ನ ಮುದ್ದಿನ ಮರಿಯನ್ನು ಮುಟ್ಟದ ತಾಯಿ ಕೋತಿ ಆ ಕಡೆಯಿಂದ ಈ ಕಡೆಗೆ ಸುತ್ತು ಹಾಕಿ ತನ್ನ ಮರಿಯನ್ನು ಬದುಕಿಸಿ ಕೊಡುವ ರೀತಿಯಲ್ಲಿ ಪ್ರಯತ್ನಿಸಿದೆ. ಒಂದು ತಾಸು ಕಳೆದ ನಂತರ ತನ್ನ ಮರಿಯನ್ನು ಎತ್ತಿ ಮುದ್ದಾಡಿದ ತಾಯಿ ಕೋತಿ ತನ್ನ ಕರುಳಿನ ಸಂಕಟ ಹಾಗೂ ಅಸಾಹಾಯಕತೆಯಿಂದ ಹೊತ್ತುಕೊಂಡೇ ತನ್ನ ದೈನಂದಿನ ಜೀವನವನ್ನು ಪ್ರಾರಂಭಿಸಿದೆ.

ದಿನವಿಡೀ ತನ್ನ ಮರಿಯನ್ನು ಹೆಗಲ ಮೇಲೆ ಹಾಕಿಕೊಂಡೇ ಆಹಾರ ಹುಡುಕಿಕೊಂಡು ಹೊಟ್ಟೆ ಹೊರೆಯುತ್ತಿರುವ ತಾಯಿ ಕೋತಿ ತನ್ನ ಕರುಳುಬಳ್ಳಿಯನ್ನು ಬಿಡಲಾಗದ ಸ್ಥಿತಿಯಲ್ಲಿದೆ. ಇತ್ತ ಕೋತಿ ಮರಿ ಕೊಳೆಯುತ್ತಿದ್ದು, ಗಬ್ಬುವಾಸನೆ ಬರಲು ಪ್ರಾರಂಭಿಸಿದೆ.