ಪುರಸಭಾ ಅಧಿಕಾರಿಗಳು ಹೀಂಗ್‌ ಬಂದ್ರು ಹಂಗ್‌ಹೋದ್ರು

ಮಾಗಡಿ: ಮಾಗಡಿಯ ಪುರಸಭೆಗೆ ಅಧಿಕಾರಿಗಳು ಹೀಗೆ ಬಂದು ಹಾಗೆ ಹೋಗುತ್ತಿರುವುದು ನಿತ್ಯ ನಿರಂತರವಾಗಿದೆ.

ಪುರಸಭೆ ಆರಂಭವಾದಾಗಿನಿಂದ ಕನಿಷ್ಠ ಒಬ್ಬ ಅಧಿಕಾರಿ ಎರಡು ವರ್ಷ ಒಂದೇ ಕಡೆ ಕೆಲಸ ಮಾಡಿದ ನಿದರ್ಶನ ಇಲ್ಲ. ಏಕೆ ಈ ರೀತಿ ನಡೆಯುತ್ತಿದೆ ಎಂಬುದಕ್ಕೆ ತಾಲೂಕು, ಜಿಲ್ಲಾಡಳಿತವೇ ಉತ್ತರ ನೀಡಬೇಕಾಗಿದೆ.

ವರ್ಷಕ್ಕೊಬ್ಬ ಅಧಿಕಾರಿ: 2011 ರಿಂದ 2019ರವರೆಗೆ 10 ಜನ ಮುಖ್ಯಾಧಿಕಾರಿಗಳನ್ನು ಬದಲಾವಣೆ ಮಾಡಲಾಗಿದೆ, ಮಖ್ಯಾಧಿಕಾರಿಗಳು ಕೇವಲ 1 ವರ್ಷಕ್ಕೆ ಮಾತ್ರ ಅಧಿಕಾರ ಮಾಡುವಂತಾಗಿದ್ದು ಪದೇಪದೆ ಮುಖ್ಯಾಧಿಕಾರಿಗಳ ವರ್ಗಾವಣೆಯಾಗುತ್ತಲೇ ಇದೆ. ಒಂದು ವರ್ಷ ತುಂಬಿದ ಒಳಗೆ ಮುಖ್ಯಾಧಿಕಾರಿಗಳ ಬದಲಾವಣೆ ಆಗತ್ತಲಿದ್ದು ಬದಲಾವಣೆಯಾದ ಅಧಿಕಾರಿಗಳೇ ಮತ್ತೆ ಮುಖ್ಯಾಧಿಕಾರಿಗಳಾಗಿ ಬರುತ್ತಿರುವುದು ವಿಪರ್ಯಾಸ.

ಹೋದವರೇ ಮತ್ತೆ ಬರ್ತಾರೆ: 2013 ರಲ್ಲಿ ಮುತ್ತಪ್ಪನವರು 2013-14 ರವರೆಗೂ ಕೆಲಸ ಮಾಡಿ ವರ್ಗಾವಣೆಯಾಗಿದ್ದರು, ಇವರು ಮತ್ತೆ ಮೇ 2018 ರಿಂದ 4 ತಿಂಗಳು ಮಾತ್ರ ಮತ್ತೆ ಮುಖ್ಯಾಧಿಕಾರಿಗಳಾಗಿ ಬಂದಿದ್ದರು. ಈಗ ನಟರಾಜುರವರು ಮುಖ್ಯಾಧಿಕಾರಿಗಳಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಇವರು 2014-15 ಒಂದು ವರ್ಷಗಳ ಕಾಲ ಅಧಿಕಾರ ನಡೆಸಿ ಲೋಕಸಭಾ ಚುನಾವಣೆ ಬಂದ ಹಿನ್ನೆಲೆಯಲ್ಲಿ ವರ್ಗಾವಣೆ ಮಾಡಿ ಈಗ ಮತ್ತೆ ಅಧಿಕಾರ ಕೊಟ್ಟಿದ್ದಾರೆ. ಇದೇ ರೀತಿ ಪದೇಪದೆ ಮುಖ್ಯಾಧಿಕಾರಿಗಳ ಬದಲಾವಣೆಯಾದರೆ ಅಭಿವೃದ್ಧಿ ಕಾಣುವುದು ಹೇಗೆ ಎಂಬುದು ನಾಗರಿಕರ ಪ್ರಶ್ನೆ.

ಏನಾಗುತ್ತಿದೆ ಸಮಸ್ಯೆ: ಹೊಸದಾಗಿ ಅಧಿಕಾರ ವಹಿಸಿಕೊಂಡ ಅಧಿಕಾರಿಗಳು ಪುರಸಭೆ ಸಮಸ್ಯೆಗಳನ್ನು ಬಗೆಹರಿಸಲು ಹೋಗುತ್ತಿದ್ದಾರೆ ಎನ್ನುವಷ್ಟರಲ್ಲಿ ವರ್ಗಾವಣೆಯಾಗುತ್ತಿದೆ. ಇದರಿಂದ ಕಳೆದ 5 ವರ್ಷಗಳಿಂದಲೂ ಅಭಿವೃದ್ಧಿ ಮರೀಚಿಕೆಯಾಗಿದೆ ಎಂಬುದು ನಾಗರಿಕರ ಅಳಲು.

ಎರಡೇ ತಿಂಗಳಲ್ಲಿ ವರ್ಗಾವಣೆ!

ಮಾಗಡಿ ಪುರಸಭೆ ಮುಖ್ಯಾಧಿಕಾರಿಗಳನ್ನು 2 ತಿಂಗಳಲ್ಲಿ ಮತ್ತೆ ವರ್ಗಾವಣೆ ಮಾಡಿ ಆದೇಶ ಕಳುಹಿಸಿದ್ದು, ನಟರಾಜು ಎಂಬುವರ ಬದಲಾಗಿ ಈಗ ಮತ್ತೆ ಮದ್ದೂರಿನ ಪುರಸಭೆಯ ಮಹೇಶ್‌ ಅವರನ್ನೆ ಮುಖ್ಯಾಧಿಕಾರಿಗಳನ್ನಾಗಿ ನೇಮಕ ಮಾಡಿದ್ದಾರೆ.