ರಾಮನಗರ: ಹಣಕ್ಕಾಗಿ ಅಪಹರಣದ ನಾಟಕವಾಡಿ ಹೆತ್ತವರನ್ನೇ ಬೆಚ್ಚಿಬೀಳಿಸಿದ 15ರ ಬಾಲಕ!

ಕನಕಪುರ: ಬಟ್ಟೆ ಅಂಗಡಿ ಮಾಲೀಕನ ಮಗನ ಅಪಹರಣ ಪ್ರಕರಣವು ಕುತೂಹಲಕರ ತಿರುವಿನೊಂದಿಗೆ ಸುಖಾಂತ್ಯ ಕಂಡಿದೆ. ಓದಿನ ಕಾಟ ತಪ್ಪಿಸಿಕೊಳ್ಳಲು ಹಾಗೂ ಹಣಕ್ಕಾಗಿ ಬಾಲಕನೇ ಅಪಹರಣದ ನಾಟಕ ಆಡಿದ್ದ ಎಂಬುದು ಪೊಲೀಸರ ತನಿಖೆಯಿಂದ ಬೆಳಕಿಗೆ ಬಂದಿದೆ. ತಿರುಪತಿಯಲ್ಲಿ ಬಾಲಕನನ್ನು ಟ್ರೇಸ್‌ ಮಾಡಿದ ಪೊಲೀಸರು, ಆತನನ್ನು ಕರೆತಂದು ಪೋಷಕರಿಗೆ ಒಪ್ಪಿಸಿದ್ದಾರೆ.

ಏನಿದು ಪ್ರಕರಣ?:
ಕನಕಪುರದ ಬೂದಿಕೇರಿ ರಸ್ತೆಯಲ್ಲಿರುವ ಸರ್ವೇಶ್‌ ಟೆಕ್ಸ್‌ಟೈಲ್ಸ್‌ ಅಂಗಡಿ ಮಾಲೀಕರಾದ ಸೂರ್ಯ ಮನೋಹರ್‌ ತಮ್ಮ ಮಗ ಸರ್ವೇಶ್‌(15) ಅಪಹರಣವಾಗಿದ್ದಾನೆ. ಆತನ ಬಿಡುಗಡೆಗೆ ಅಪಹರಣಕಾರರು 5 ಲಕ್ಷ ರೂ.ಗಳಿಗೆ ಬೇಡಿಕೆ ಇರಿಸಿದ್ದಾರೆ ಎಂದು ಪೊಲೀಸರಿಗೆ ದೂರು ನೀಡಿದ್ದರು. ದೂರಿನ ಜತೆಗೆ ಬಾಲಕ ಸರ್ವೇಶ್‌ ಶೌಚಾಲಯವೊಂದರಲ್ಲಿ ಬಂಧಿತನಾಗಿರುವ ಫೋಟೊವನ್ನು ನೀಡಿದ್ದರು.

ಪ್ರಕರಣ ಬೆನ್ನು ಹತ್ತಿದ ಪೊಲೀಸರಿಗೆ ಅಚ್ಚರಿ ಕಾದಿತ್ತು. ಬಾಲಕನ ಮೊಬೈಲ್‌ ಕರೆ ಟ್ರೇಸ್‌ ಮಾಡಿದ ಪೊಲೀಸರಿಗೆ ಅದು ತಿರುಪತಿಯಲ್ಲಿ ಇರುವುದು ಕಂಡು ಬಂದಿತ್ತು. ಅಲ್ಲಿಗೆ ಹುಡುಕಿ ಹೋದ ಪೊಲೀಸರು ಬಾಲಕನಿರುವ ಸ್ಥಳ ಪತ್ತೆ ಹಚ್ಚಿದ್ದರು. ಆತನನ್ನು ವಿಚಾರಣೆಗೊಳಪಡಿಸಿದಾಗ, ಓದು ಎಂದು ಅಪ್ಪಅಮ್ಮ ಹೇರುತ್ತಿದ್ದ ಒತ್ತಡದಿಂದ ಪಾರಾಗಲು ಹಾಗೂ ಸುಲಭವಾಗಿ ಖರ್ಚಿಗೆ ಹಣ ಸಂಪಾದಿಸಲು ಆತನೇ ಅಪಹರಣದ ನಾಟಕ ಆಡಿದ್ದ.

ಕೋಡಿಹಳ್ಳಿಯಲ್ಲಿ ವಿಚಿತ್ರ ಘಟನೆ: ವಿವಾಹ ಆಮಂತ್ರಣ ನೀಡದ ಕುಟುಂಬಕ್ಕೆ ಸಾಮಾಜಿಕ ಬಹಿಷ್ಕಾರ!

ತಿರುಪತಿಗೆ ತೆರಳಿ ಅಲ್ಲಿ ಶೌಚಾಲಯದಲ್ಲಿ ತನ್ನನ್ನೇ ತಾನು ಹಗ್ಗದಲ್ಲಿ ಕಟ್ಟಿಕೊಂಡು ಚಿತ್ರ ಹಿಡಿದು ಪೋಷಕರಿಗೆ ಕಳುಹಿಸಿದ್ದ. ಬಾಲಕನ ಕ್ರಿಮಿನಲ್‌ ಯೋಚನೆ ಕಂಡು ಪೊಲೀಸರು ಬೆಚ್ಚಿಬಿದ್ದಿದ್ದಾರೆ. ಆತ ಅಪ್ರಾಪ್ತ ವಯಸ್ಕನಾದ ಕಾರಣ, ತಿಳಿಹೇಳಿ ಪೋಷಕರಿಗೆ ಒಪ್ಪಿಸಿ ಕೈತೊಳೆದುಕೊಂಡಿದ್ದಾರೆ. ಕಾರ್ಯಚರಣೆಯಲ್ಲಿ ಸಹಾಯಕ ಜಿಲ್ಲಾ ಪೋಲಿಸ್‌ ವರಿಷ್ಠಾಧಿಕಾರಿ ರಾಮರಾಜನ್‌, ನಗರಠಾಣೆಯ ಎಸ್‌ಐ ಲಕ್ಷ್ಮಣ ಗೌಡ, ಗ್ರಾಮಾಂತರ ಠಾಣೆಯ ಎಸ್‌ಐ ಅನಂತ್‌ರಾಮ್‌ ಭಾಗವಹಿಸಿದ್ದರು.