ಉಕ್ಕಿ ಹರಿಯುತ್ತಿರುವ ಒಳಚರಂಡಿ ನೀರು ತಡೆಗಟ್ಟಲು ಮನವಿ

ಮಾಗಡಿ: ಕೆಂಪೇಗೌಡ ವೃತ್ತದಲ್ಲಿರುವ ಒಳಚರಂಡಿಯ ಮ್ಯಾನ್‌ಹೋಲ್‌ನಿಂದ ಕಲುಷಿತ ನೀರು ಉಕ್ಕಿ ಹರಿದಿದ್ದು, ಸಾರ್ವಜನಿಕರು ಮೂಗು ಮುಚ್ಚಿಕೊಂಡು ಸಂಚರಿಸುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಪಟ್ಟಣದಲ್ಲಿ ಕೆಂಪೇಗೌಡ ವೃತ್ತ ಪ್ರಮುಖ ಸ್ಥಳವಾಗಿದ್ದು, ಈ ವೃತ್ತದಲ್ಲಿ ಅಂಗಡಿಗಳು, ಕ್ಲಿನಿಕ್‌, ಆಟೋ ಸ್ಟಾಂಡ್‌ ಇದೆ. ಬೈಚಾಪುರ, ತಿರುಮಲೆ, ಎನ್‌ಇಎಸ್‌ ಬಡಾವಣೆಯಿಂದ ಬಸ್‌ ಸ್ಟಾಂಡ್‌, ಮಾರುಕಟ್ಟೆಗೆ ತೆರಳುವವರು ಈ ವೃತ್ತದ ಮುಖಾಂತರವೇ ತೆರಳಬೇಕಿದೆ. ಕೆಂಪೇಗೌಡ ವೃತ್ತದಲ್ಲಿರುವ ಒಳ ಚರಂಡಿಯ ಮ್ಯಾನ್‌ಹೋಲ್‌ನಿಂದ ಶುಕ್ರವಾರ ಬೆಳಗ್ಗೆ ಕಲುಷಿತ ನೀರು ಉಕ್ಕಿ ರಸ್ತೆಯ ತುಂಬಾ ಹರಿದ ಪರಿಣಾಮ ಈ ಸುತ್ತಮುತ್ತಲ ಸ್ಥಳದಲ್ಲಿ ಕೆಟ್ಟ ವಾಸನೆ ಹರಡಿತ್ತು. ಶಾಲೆ, ಕಾಲೇಜು, ಮದುವೆ, ದೇವಾಲಯ ಮುಂತಾದ ಶುಭ ಕಾರ್ಯಗಳಿಗೆ ತೆರಳುವವರು ಒಳಚರಂಡಿಯ ಮಲಿನ ನೀರನ್ನು ತುಳಿದುಕೊಂಡೇ ತೆರಳುವಂತಾಯಿತು. ಉಕ್ಕಿ ಹರಿಯುತ್ತಿರುವ ಒಳಚರಂಡಿ ಕಲುಷಿತ ನೀರನ್ನು ತಡೆಗಟ್ಟಬೇಕೆಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.

ಶಾಶ್ವತ ಪರಿಹಾರಕ್ಕೆ ಮನವಿ:

ಉಕ್ಕಿ ಹರಿಯುತ್ತಿರುವ ಒಳ ಚರಂಡಿ ಕಲುಷಿತದ ಬಗ್ಗೆ ಸ್ಥಳೀಯ ಅಂಗಡಿ ಮಾಲೀಕ ಎಂ.ವೈ.ಕರ್ಣಾರ್ಜುನ್‌ ಮಾತನಾಡಿ, ಪ್ರತಿಯೊಂದು ತಿಂಗಳಿಗೊಮ್ಮೆ ಒಳಚರಂಡಿ ಉಕ್ಕಿ ಹರಿಯುತ್ತದೆ. ಈ ಸಮಯದಲ್ಲಿ ಕಲುಷಿತ ನೀರು ರಸ್ತೆಯ ಮೇಲೆ ಹರಿಯುವುದರಿಂದ ಕೆಟ್ಟ ವಾಸನೆ ಹರಡುತ್ತದೆ. ಇದರಿಂದ ಅಂಗಡಿಯಲ್ಲಿ ಕುಳಿತು ವ್ಯಾಪಾರ ಮಾಡಲು ಸಾಧ್ಯವಾಗುವುದಿಲ್ಲ. ಈ ಸಮಸ್ಯೆ ಬಗ್ಗೆ ಸಂಬಂಧಪಟ್ಟ ಅಧಿಕಾರಿಗಳು ಶಾಶ್ವತ ಪರಿಹಾರ ಕಂಡು ಹಿಡಿದು ಸ್ವಚ್ಛ ಪರಿಸರ ನಿರ್ಮಾಣಕ್ಕೆ ಸಹಕರಿಸಬೇಕು ಎಂದು ಮನವಿ ಮಾಡಿದರು.