ಬೆಲೆ ಇಳಿದರೂ ರೈತನ ಮುಖದಲ್ಲಿ ನಗು ತರದ ಪಶು ಆಹಾರ!

ರಾಮನಗರ: ಹೊಸ ವರ್ಷದಿಂದ ಏರುತ್ತಲೇ ಸಾಗಿದ್ದ ಪಶು ಆಹಾರ ಬೆಲೆ, ಕೊನೆಗೂ ಇಳಿಕೆಯ ಲಕ್ಷಣ ದಾಖಲಿಸಿದೆ. ಕಳೆದ ಎಂಟು ದಿನಗಳಲ್ಲಿ ಪ್ರತಿ ಟನ್‌ ಪಶು ಆಹಾರಕ್ಕೆ 1500 ರೂ.ಗಳಷ್ಟು ಹೆಚ್ಚಿದ ದರಗಳು, ಜ.10ರಿಂದ ಪ್ರತಿ ಟನ್‌ಗೆ 644 ರೂ.ಗಳಷ್ಟು ಕಡಿಮೆ ಆಗಲಿದೆ. ಪ್ರತಿಭಟನೆಗೆ ಜಗ್ಗಿದ ಬಮೂಲ್‌ ಬೆಲೆ ಇಳಿಕೆ ಮಾಡಿದ್ದರೆ, ರೈತರ ಆಕ್ರೋಶಕ್ಕೆ ಕೆಎಂಎಫ್‌ ಕ್ಯಾರೇ ಎಂದಿಲ್ಲ.

ಏನಿದು ಬರ ಏರಿಕೆ ಬರೆ?: ಜಿಲ್ಲೆಯಲ್ಲಿ ಬರ ವ್ಯಾಪಿಸಿದೆ. ಗಾಯದ ಮೇಲೆ ಬರೆ ಎಳೆದಂತೆ ಕೆಎಂಎಫ್‌ ಪಶು ಆಹಾರದ ದರಗಳನ್ನು ಏರಿಕೆ ಮಾಡಿತ್ತು. ಇದು ಸಾಲದು ಎಂಬಂತೆ ಬಮೂಲ್‌ (ಬೆಂಗಳೂರು, ಬೆಂಗಳೂರು ಗ್ರಾಮಾಂತರ, ರಾಮನಗರ ಜಿಲ್ಲೆಗಳ ಹಾಲು ಒಕ್ಕೂಟ) ಕೂಡ ಸಾಗಣೆ ವೆಚ್ಚವನ್ನು ಇದರಲ್ಲಿ ಸೇರಿಸಿತ್ತು. ಬೆನ್ನುಬೆನ್ನಿಗೆ ಬಿದ್ದ ಬೆಲೆ ಏರಿಕೆ ಬರೆಯಿಂದ ಸಿಟ್ಟಿಗೆದ್ದ ಹೈನುಗಾರರು ಉಗ್ರ ಪ್ರತಿಭಟನೆ ದಾಖಲಿಸಿದ್ದರು. ಹಲವು ಸಂಘ ಸಂಸ್ಥೆಗಳೂ ಇವರ ಬೆನ್ನಿಗೆ ನಿಂತಿದ್ದರು.

ಮೆತ್ತಗಾದ ಬಮೂಲ್‌: ಹೈನುಗಾರರ ಪ್ರತಿಭಟನೆ ಬಿಸಿಗೆ ಮೆತ್ತಗಾದ ಬಮೂಲ್‌ ಜ.10ರಿಂದ ಅನ್ವಯವಾಗುವಂತೆ ಪ್ರತಿಟನ್‌ ಪಶು ಆಹಾರಕ್ಕೆ 644 ರೂ. ರಿಯಾಯಿತಿ ಘೋಷಿಸಿ ಜ.7ರಂದು ಆದೇಶ ಹೊರಡಿಸಿದೆ. ಬಮೂಲ್‌ ತನ್ನ ಸಾಗಣೆ ವೆಚ್ಚವನ್ನು ಕೈಬಿಟ್ಟಿರುವುದರಿಂದ ಪ್ರತಿ ಕಿಲೋ ಪಶು ಆಹಾರಕ್ಕೆ 32 ರೂ. ಕಡಿಮೆ ಆಗಿದೆ. ಆದರೆ, ಕೆಎಂಎಫ್‌ ಮಾತ್ರ ಹೈನುಗಾರರ ಪ್ರತಿಭಟನೆಗೆ ಕ್ಯಾರೇ ಎಂದಿಲ್ಲ. ಹೊಸ ದರಪಟ್ಟಿಯ ಪ್ರಕಾರ ನಂದಿನ ಗೋಲ್ಡ್‌ ಪಶು ಆಹಾರವು ಜ.10ರಿಂದ 957 ರೂ.ಗಳ ಬದಲಾಗಿ 925 ರೂ.ಗಳಿಗೆ ಲಭ್ಯವಾಗಲಿದೆ.

ಡೇರಿಗಳ ಮುಖದಲ್ಲೂ ಆವರಿಸಿದ ಆತಂಕ: ಬಮೂಲ್‌ ನಿರ್ಧಾರದಿಂದ ಈಗ ಡೇರಿ ಮಾಲೀಕರ ಮುಖದಲ್ಲೂ ಆತಂಕ ಆವರಿಸಿದೆ. ಪರಿಷ್ಕೃತ ದರದಂತೆ ಈಗಾಗಲೇ ಖರೀದಿಸಿ ಶೇಖರಿಸಿಟ್ಟಿರುವ ಪಶು ಆಹಾರವನ್ನು ಕಡಿಮೆ ಬೆಲೆ ಮಾರಾಟ ಮಾಡಿದರೆ ಆಗುವ ನಷ್ಟವನ್ನು ತುಂಬಿ ಕೊಡುವವರು ಯಾರು ಎಂಬ ಚಿಂತೆ ಅವರದ್ದು. ಜ.1ಕ್ಕೆ ಮೊದಲು ಪ್ರತಿಟನ್‌ ಪಶು ಆಹಾರದ ಬೆಲೆ 17,644 ರೂ.ಗಳಿತ್ತು. ಆದು ಏಕಾಏಕಿ ಏರಿಕೆ ದಾಖಲಿಸಿ ಕೇವಲ ಹತ್ತು ದಿನಗಳಲ್ಲಿ 19, 144 ರೂ.ಗಳಿಗೆ ತಲುಪಿತ್ತು. ಈ ದರದಲ್ಲೇ ಪಶು ಆಹಾರ ಖರೀದಿಸಿರುವ ಡೇರಿಗಳು ಈಗ ಕಡಿಮೆ ಬೆಲೆಗೆ ಅದನ್ನು ರೈತರಿಗೆ ನೀಡಬೇಕಿದೆ. ಕೊರತೆ ಹಣವನ್ನು ತುಂಬಿಕೊಳ್ಳುವುದು ಎಲ್ಲಿಂದ ಎಂಬುದು ಅವರ ಚಿಂತೆ.

ಏರಿದ್ದು 1500, ಇಳಿದದ್ದು ಕೇವಲ 644!: ಕಳೆದ ಹತ್ತು ದಿನಗಳಲ್ಲಿ ಪಶು ಆಹಾರದ ಬೆಲೆ ಬರೋಬ್ಬರಿ 1500 ರೂ. ಏರಿಕೆ ಕಂಡಿದೆ. ಆದರೆ, ಈಗ ಇಳಿದಿರುವುದು ಕೇವಲ 644 ರೂ. ಮಾತ್ರ. ಹೊರ ಜಗತ್ತಿಗೆ ಪಶು ಆಹಾರದಲ್ಲಿ ಭಾರಿ ಪ್ರಮಾಣದಲ್ಲಿ ಇಳಿಕೆಯಾದಂತೆ ಕಾಣಿಸಿದರೂ, ಹೈನುಗಾರರು ಪ್ರತಿಟನ್‌ ಪಶು ಆಹಾರಕ್ಕೆ ಕಳೆದ ವರ್ಷಕ್ಕಿಂತ 856 ರೂ.ಗಳನ್ನು ಹೆಚ್ಚು ನೀಡಬೇಕಿದೆ ಒಟ್ಟಿನಲ್ಲಿ ಪಶು ಆಹಾರದ ಬೆಲೆಯ ಹಾವು ಏಣಿ ಆಟದಿಂದ ಹೈನುಗಾರರು ಮತ್ತು ಡೇರಿಗಳ ಮಾಲೀಕರು ಇಬ್ಬರೂ ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಪಶು ಆಹಾರದ ಬೆಲೆಯನ್ನು ಒಂದೇ ಸಾರಿ 1500ರಷ್ಟು ಹೆಚ್ಚಿಸಲಾಗಿದೆ. ಈಗ ಬಮೂಲ್‌ ಮಾತ್ರ 644 ರೂ.,ಗಳನ್ನು ಇಳಿಸಿದೆ. ಆದರೆ, ಹಳೆ ದರಕ್ಕಿಂತ 856 ರೂ.ಗಳಷ್ಟು ದರ ಹೆಚ್ಚಿದೆ. ಈ ಹೆಚ್ಚುವರಿ ಹೊರೆಯನ್ನು ಹೈನುಗಾರರು ಹೊರುವುದು ಕಷ್ಟ.
-ಶಿವರುದ್ರ, ಹೈನುಗಾರ ಕಚುವನಹಳ್ಳಿ

ಪಶು ಆಹಾರ ದರ ಏರಿಕೆ ವಿರೋಧಿಸಿ ಮಂಗಳವಾರ ರಾಮನಗರದಲ್ಲಿ ಪ್ರತಿಭಟನೆ ನಡೆಸಿದ್ದೇವೆ. ಬುಧವಾರ ಮಾಗಡಿಯಲ್ಲಿಯು ಪ್ರತಿಭಟನೆ ನಡೆಸಿದ್ದೇವೆ. ಈ ಮೊದಲು ಪ್ರತಿ ಚೀಲಕ್ಕೆ 800 ರೂ,ಗಳನ್ನು ನೀಡಲಾಗುತ್ತಿತು. ಇದೇ ದರದಲ್ಲಿ ಹೈನುಗಾರರಿಗೆ ಪಶು ಆಹಾರ ದೊರೆಯಬೇಕು. ಅಲ್ಲಿಯವರೆಗೂ ಹೋರಾಟ ನಡೆಸಲಾಗುವುದು. ಕೆಎಂಎಫ್‌ ಸತ್ತು ಹೋಗಿದೆ. ಹೀಗಾಗಿ ಹೈನುಗಾರರ ಬೆನ್ನಿಗೆ ನಿಲ್ಲುತ್ತಿಲ್ಲ
-ರವಿ, ಜಿಲ್ಲಾಧ್ಯಕ್ಷ ಜಯ ಕರ್ನಾಟಕ ಸಂಘಟನೆ

ಪಶು ಆಹಾರದ ಬೆಲೆಯನ್ನು ಕೆಜಿಗೆ 32 ರೂ. ಇಳಿಸಿರುವುದು ಬಮೂಲ್‌. ನಮ್ಮ ಸಾಗಣೆ ಖರ್ಚನ್ನು ಕಳೆದು ದರ ಇಳಿಕೆ ಮಾಡಿದ್ದೇವೆ. ಪಶು ಆಹಾರ ಪೂರೈಕೆ ಮಾಡುವುದು ಕೆಎಂಎಫ್‌. ಇದು ಸಹ 2 ವರ್ಷದಿಂದ ನಿಷ್ಕ್ರೀಯಗೊಂಡಿದೆ. ಬಮೂಲ್‌ ಏನು ಮಾಡಲು ಸಾಧ್ಯ?
- ನರಸಿಂಹಮೂರ್ತಿ, ಬಮೂಲ್‌ ನಿದೇರ್ಶಕ (ಮಾಗಡಿಯಲ್ಲಿ ಹೇಳಿದ್ದು)