ಎಸ್ಸೆಸ್ಸೆಲ್ಸಿ ಪರೀಕ್ಷಾಮಂಡಳಿಯ ಎಡವಟ್ಟು, ಪಾಸಾಗಿದ್ದರೂ ಫೇಲಾದ ವಿದ್ಯಾರ್ಥಿನಿ

ರಾಮನಗರ: ಎಸ್ಸೆಸ್ಸೆಲ್ಸಿ ಪರೀಕ್ಷೆಯ ಕನ್ನಡ ವಿಷಯದಲ್ಲಿ 14 ಪುಟಗಳ ಉತ್ತರ ಬರೆದಿದ್ದ ಈಕೆಗೆ ಬಂದಿದ್ದು, ಕೇವಲ 14 ಅಂಕ!

ಇದು ಎಸ್ಸೆಸ್ಸೆಲ್ಸಿ ಬೋರ್ಡ್‌ ಮಾಡಿದ ಎಡವಟ್ಟು. ಪರೀಕ್ಷೆಯಲ್ಲಿ ಉತ್ತಮವಾಗಿ ಬರೆದಿದ್ದರೂ ಅನುತ್ತೀರ್ಣ ಎಂಬ ಹಣೆಪಟ್ಟಿ ಹೊತ್ತು ಈ ಹುಡುಗಿ ಅನುಭವಿಸಿದ ಸಂಕಟ ಅಪಾರ.ತಾಲ್ಲೂಕಿನ ಬಿಳಗುಂಬ ಸರಕಾರಿ ಪ್ರೌಢಶಾಲೆಯ ವಿದ್ಯಾರ್ಥಿನಿ, ಅರೇಹಳ್ಳಿ ಗ್ರಾಮದ ಲಕ್ಷ್ಮಿದೇವಿ ನರಕ ಅನುಭವಿಸಿದ ವಿದ್ಯಾರ್ಥಿನಿ.

ಎಸ್ಸೆಸ್ಸಿಲ್ಸಿ ಪರೀಕ್ಷೆಯಲ್ಲಿ 339 ಅಂಕ ಬಂದಿದ್ದರೂ, ಕನ್ನಡ ವಿಷಯದಲ್ಲಿ ಕೇವಲ 14 ಅಂಕ ಬಂದಿದೆ ಎಂಬ ಕಾರಣಕ್ಕಾಗಿ ಆಕೆಯನ್ನು ಅನುತ್ತೀರ್ಣಗೊಳಿಸಲಾಗಿತ್ತು. ಲಕ್ಷ್ಮೇದೇವಿ ಪೋಷಕರು ಹೆಚ್ಚು ವಿದ್ಯಾವಂತರಲ್ಲದ ಕಾರಣ, ಮಗಳು ಫೇಲಾಗಿರಬಹುದು ಎಂದೇ ಭಾವಿಸಿದ್ದರು. ಆದರೆ, ಲಕ್ಷ್ಮೇದೇವಿಗೆ, ತಾನು ಬರೆದ ಉತ್ತರಕ್ಕೆ ಫೇಲಾಗಲು ಸಾಧ್ಯವೇ ಇಲ್ಲ ಎಂಬ ಅಚಲ ವಿಶ್ವಾಸವಿತ್ತು.

ಆದ್ದರಿಂದ ಅವರು ನೆರೆಹೊರೆಯವರ ನೆರವು ಪಡೆದು ಕರ್ನಾಟಕ ಪ್ರೌಢಶಿಕ್ಷ ಣ ಮಂಡಳಿಗೆ ಶುಲ್ಕ ತುಂಬಿ ,ಉತ್ತರ ಪತ್ರಿಕೆಯ ನಕಲು ಪ್ರತಿ ಪಡೆದಳು. ಉತ್ತರ ಪತ್ರಿಕೆ ನೋಡಿದಾಗ ನೈಜ ಸಂಗತಿ ಗೊತ್ತಾಯಿತು. ಕನ್ನಡ ವಿಷಯದಲ್ಲಿ ಆಕೆಗೆ 89 ಅಂಕ ಬಂದಿತ್ತು. ಆದರೆ, ಮೌಲ್ಯಮಾಪಕರು ಆಕೆ ಪಡೆದ 89 ಅಂಕಗಳನ್ನು ನಮೂದಿಸುವ ಬದಲು, ಆಕೆ ಉತ್ತರ ಬರೆದ ಪುಟಗಳ ಸಂಖ್ಯೆಯನ್ನು ಅಂಕಪಟ್ಟಿಯಲ್ಲಿ ನಮೂದಿಸಿದ್ದರು. ಇದರಿಂದ ಆಕೆಯನ್ನು ಅನುತ್ತೀರ್ಣ ಎಂದು ಘೋಷಿಸಲಾಗಿತ್ತು.

ಉತ್ತರ ಪತ್ರಿಕೆಯ ನಕಲು ಪ್ರತಿ ಬಂದ ಬಳಿಕ ವಿದ್ಯಾರ್ಥಿನಿ ಸಮಾಧಾನದ ನಿಟ್ಟುಸಿರು ಬಿಟ್ಟಿದ್ದಾಳೆ. ಪರೀಕ್ಷಾ ಮಂಡಳಿಯಿಂದ ಪರಿಷ್ಕೃತ ಅಂಕಪಟ್ಟಿ ಪಡೆದು ಪ್ರಥಮ ಪಿ.ಯು.ಗೆ ಸೇರಲು ಸಿದ್ಧತೆ ನಡೆಸಿದ್ದಾಳೆ. 'ಕನ್ನಡದಲ್ಲಿ ಫೇಲ್‌ ಎಂದಾಗ ಆಘಾತವಾಗಿತ್ತು. ಈಗ ಸಮಾಧಾನವಾಗಿದೆ. ವಾಣಿಜ್ಯ ವಿಷಯಕ್ಕೆ ಸೇರಬೇಕೆಂದಿದ್ದೇನೆ' ಎಂದು ಲಕ್ಷ್ಮಿ ತಿಳಿಸಿದಳು.