ರಾಮನಗರ :ಕಾಡಾನೆ ದಾಳಿಗೆ 2 ಹಸು 1 ಎಮ್ಮೆಯ ಸಾವು, ಬೆಚ್ಚಿ ಬಿದ್ದ ಗ್ರಾಮಸ್ಥರು

ರಾಮನಗರ : ಕನಕಪುರ ತಾಲೂಕಿನ ಸಾತನೂರು ಸಮೀಪದ ಎರಡು ಗ್ರಾಮಗಳಲ್ಲಿ ಮಾರ್ಚ್6ರ ಬೆಳಗ್ಗೆ ಕಾಡಾನೆಯೊಂದು ದಾಳಿ ನಡೆಸಿ ಗ್ರಾಮಸ್ಥರಲ್ಲಿ ಆತಂಕವನ್ನು ಉಂಟು ಮಾಡಿದೆ.

ಶುಕ್ರವಾರ ಬೆಳಗ್ಗೆ 8 ಗಂಟೆ ಸುಮಾರಿಗೆ ಈ ಕಾಡಾನೆ ದಾಳಿ ನಡೆಸಿದ್ದು, ಮೊದಲಿಗೆ ಸಾಸಲಪುರ ಗ್ರಾಮದಲ್ಲಿನ ಎರಡು ಸೀಮೆ ಹಸುಗಳ ಮೇಲೆ ದಾಳಿ ನಡೆಸಿ, ಕಾಲಿನಿಂದ ತುಳಿದಿದೆ. ಬಳಿಕ ಮರೀಗೌಡ ಎಂಬುವವರಿಗೆ ಸೇರಿದ ಎರಡು ಹಸುಗಳನ್ನು ತುಳಿದು ಸಾಯಿಸಿದ್ದು, ಪಕ್ಕದ ಊರಿನ ಹಲಸಿನ ಮರದೊಡ್ಡಿ ಗ್ರಾಮದ ಕೆಂಪೇಗೌಡ ಎಂಬುವವರಿಗೆ ಸೇರಿದ ಎಮ್ಮೆಯನ್ನು ಕೂಡ ಸಾಯಿಸಿದೆ.

ತದನಂತರ ನಾಟಿ ಹಸುಗಳ ಮೇಲೆಯೂ ಹಲ್ಲೆ ನಡೆಸಿದ್ದು, ಮಲ್ಲೇಗೌಡನ ದೊಡ್ಡಿ ಎಂಬಲ್ಲಿ ಬೈಕ್ ಒಂದನ್ನು ಸಹ ಧ್ವಂಸಗೊಳಿಸಿದೆ. ಆನೆಯನ್ನು ಓಡಿಸಲು ಗ್ರಾಮಸ್ಥರು ಹರಸಾಹಸಪಟ್ಟಿದ್ದು ಪಟಾಕಿ ಸಿಡಿಸಿದ್ದಾರೆ. ಕೊನೆಗೂ ಕಾಡಾನೆ ಕಬ್ಬಾಳು ವಲಯದ ಹಲಸಿನ ಮರದೊಡ್ಡಿ ಅರಣ್ಯದೊಳಗೆ ಸೇರಿಕೊಂಡಿದೆ. ಆನೆಯೊಂದರ ಈ ಅನಿರೀಕ್ಷಿತ ದಾಂದಲೆಯಿಂದ ಎರಡು ಗ್ರಾಮಗಳ ಗ್ರಾಮಸ್ಥರನ್ನು ಬೆಚ್ಚಿ ಬೀಳಿಸಿದೆ. ಅರಣ್ಯ ಇಲಾಖೆ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.