ಸೆಕ್ಸ್ ರಾಕೆಟ್‌ನಲ್ಲಿ ಮೊರಾಕ್ಕೊ ಮಾಡೆಲ್

ಹೊಸದಿಲ್ಲಿ: ಮೊರಾಕ್ಕೊದ ಮಾಡೆಲ್‌ವೊಬ್ಬರು ಸೆಕ್ಸ್ ಜಾಲದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸುತ್ತಿರುವುದು ಪೊಲೀಸ್‌ ವಿಚಾರಣೆ ವೇಳೆ ಬಹಿರಂಗಗೊಂಡಿದೆ. ಈ ಜಾಲವನ್ನು ಪಿ.ಎನ್. ಸನ್ಯಾಲ್ ಮತ್ತು ಆತನ ಸಹಚರರು ನಡೆಸುತ್ತಿದ್ದಾರೆ.

ವಿಚಾರಣೆ ವೇಳೆ ಸನ್ಯಾಲ್ ಮಾಡೆಲ್ ಹೆಸರು ಹೇಳಿದ್ದ. ಆಕೆಯ ಗುರುತಿಗೆ ಸಂಬಂಧಿಸಿದಂತೆ ಪೊಲೀಸರು ಕೆಲವು ದಾಖಲೆಗಳನ್ನು ಪತ್ತೆ ಹಚ್ಚಿದ್ದಾರೆ. ಪೊಲೀಸರು ಸೆಕ್ಷನ್ 14 ಆಫ್‌ ದ ಫಾರಿನರ್ಸ್‌ ಅಡಿ ಎಫ್‌ಐಆರ್ ದಾಖಲಿಸಿದ್ದಾರೆ.

ಜಾಲದ ಮತ್ತೊಬ್ಬ ಪ್ರಮುಖ, ನಿವೃತ್ತ ಕರ್ನಲ್ ಅಜಯ್‌ ಅಹ್ಲಾವತ್‌ನನ್ನು ಇನ್ನೂ ಬಂಧಿಸಿಲ್ಲ. ಅಜಯ್‌ ಅಹ್ಲಾವತ್‌ ತನ್ನನ್ನು ಸನ್ಯಾಲ್‌ಗೆ ಪರಿಚಯಿಸಿದ್ದಾಗಿ ಸಂತ್ರಸ್ತೆ ಹೇಳಿದ್ದರು. ಸನ್ಯಾಲ್ ನಿವಾಸದಲ್ಲಿ ಮಹಿಳೆಯರು ಸೇರಿದಂತೆ ಮಧ್ಯ ಏಷ್ಯಾದ ಹಲವು ವಿದೇಶಿಯರ ಪಾಸ್‌ಪೋರ್ಟ್‌ ಪ್ರತಿ, ಪೋನ್‌ ನಂಬರ್ ಪೊಲೀಸರಿಗೆ ಲಭಿಸಿವೆ. ಸಂಸದರಾದ ನರೇಶ್ ಅಗರ್‌ವಾಲ್‌ ಮತ್ತು ಜಗದಂಬಿಕಾ ಪಾಲ್‌ ಅವರ ಲೆಟರ್‌ಹೆಡ್‌ , ಸೀಲ್‌ಗಳು ಕೂಡ ಪತ್ತೆಯಾಗಿವೆ. ಆದರೆ ರಾಜಕಾರಣಿಗಳಿಗೂ ಈ ಪ್ರಕರಣಕ್ಕೂ ಸಂಬಂಧ ಇಲ್ಲ ಎಂದು ಉನ್ನತ ಪೊಲೀಸ್ ಅಧಿಕಾರಿಗಳು ಹೇಳಿದ್ದಾರೆ.

ದಾಖಲೆಗಳು ಮತ್ತು ವಾಟ್ಸಾಪ್‌ ಸಂದೇಶಗಳನ್ನು ಪರಿಶೀಲಿಸಿದಾಗ ಸನ್ಯಾಲ್ ತಾನು ಪ್ರಧಾನಿ ಕಾರ್ಯಾಲಯದ ಅಧಿಕಾರಿ ಎಂದು ಹೇಳಿಕೊಂಡಿರುವುದು ಮತ್ತು ನೇರ ತೆರಿಗೆ ಕೇಂದ್ರೀಯ ಮಂಡಳಿಯ ಉನ್ನತ ಅಧಿಕಾರಿಗಳ ಜತೆ ಸಂಪರ್ಕ ಹೊಂದಿರುವುದು ತಿಳಿದು ಬಂದಿದೆ. ಪ್ರಧಾನಿ ಕಾರ್ಯಾಲಯಕ್ಕೆ ನೇರವಾಗಿ ಕರೆ ಮಾಡಲು ಅವಕಾಶ ಇರುವುದಾಗಿ ತೋರಿಸಿಕೊಳ್ಳಲು ಕರೆ ಕೂಡ ಮಾಡುತ್ತಿದ್ದ ಎಂಬುದು ತನಿಖೆ ವೇಳೆ ಬಯಲಾಗಿದೆ.