ಮತದಾನ ಜಾಗೃತಿಗೆ 3500 ಕಿ.ಮೀ. ಪಯಣ

ಶಿವಮೊಗ್ಗ : ಲೋಕಸಭಾ ಸಾರ್ವತ್ರಿಕ ಚುನಾವಣೆಯಲ್ಲಿ ಯಾರೊಬ್ಬರೂ ಮತದಾನದಿಂದ ದೂರ ಉಳಿಯಬಾರದು. ಎಲ್ಲರೂ ಮತದಾನ ಮಾಡಬೇಕು ಎಂಬ ಉದ್ದೇಶದಿಂದ ಚುನಾವಣಾ ಆಯೋಗ ಆನೇಕ ಕಾರ್ಯಕ್ರಮ ಹಮ್ಮಿಕೊಂಡಿದೆ. ಈ ನಡುವೆ ಸಾಮಾಜಿಕ ಕಾರ್ಯಕರ್ತರೊಬ್ಬರು ನಾಡಿನಾದ್ಯಂತ ಬೈಕ್‌ ಸವಾರಿ ಮಾಡುತ್ತಾ ವಿಭಿನ್ನವಾಗಿ ಮತದಾನ ಜಾಗೃತಿ ಮೂಡಿಸುತ್ತಿದ್ದಾರೆ.

ಬೆಂಗಳೂರು ಮೂಲದ ಬಸವರಾಜು ಎಸ್‌. ಕಲ್ಲುಸಕ್ಕರೆ ಅವರು ಮತದಾರರ ಗಮನಸೆಳೆಯುವಂತೆ ಬೈಕ್‌ನ್ನು ವಿನ್ಯಾಸ ಮಾಡಿಕೊಂಡು ಸವಾರಿ ಮಾಡುತ್ತಿದ್ದಾರೆ. ಈಗಾಗಲೇ 19 ಜಿಲ್ಲೆಗಳಿಗೆ ಭೇಟಿ ಕೊಟ್ಟಿದ್ದು, 20ನೇ ಜಿಲ್ಲೆಯಾಗಿ ಬುಧವಾರ ಶಿವಮೊಗ್ಗಕ್ಕೆ ಭೇಟಿ ನೀಡಿದ್ದರು.

ಕೇವಲ ನಗರ ಪ್ರದೇಶಕ್ಕೆ ಸೀಮಿತವಾಗದೆ, ಹಳ್ಳಿಗಳಿಗೂ ಭೇಟಿ ನೀಡಿ ಜಾಗೃತಿ ಮೂಡಿಸುತ್ತಿದ್ದಾರೆ. ಕರ್ನಾಟಕದ 30 ಜಿಲ್ಲೆಗಳಲ್ಲಿ 3500 ಕಿ.ಮೀ. ಸುತ್ತಿದ ಬಳಿಕ ಬೆಂಗಳೂರಿಗೆ ವಾಪಸ್‌ ಅಗಿ ಅಲ್ಲೂ ಕೂಡ ಜಾಗೃತಿ ಮೂಡಿಸುವ ಆಶಯ ಹೊಂದಿದ್ದಾರೆ. ವಿಭಿನ್ನವಾಗಿ ಮತ ಜಾಗೃತಿ ಕೈಗೊಂಡ ಬಸವರಾಜ್‌ ಅವರನ್ನು ಜಿಲ್ಲಾಧಿಕಾರಿ ಕೆ.ಎ.ದಯಾನಂದ್‌, ಜಿ.ಪಂ ಸಿಇಒ ಕೆ.ಶಿವರಾಮೇಗೌಡ ಮತ್ತಿತರರು ಶ್ಲಾಘಿಸಿದ್ದಾರೆ.

----------
ಮತದಾನ ಸಂವಿಧಾನ ನಮಗೆ ನೀಡಿರುವ ಹಕ್ಕು. ಚುನಾವಣೆಯಲ್ಲಿ ಪ್ರತಿಯೊಬ್ಬರೂ ಹಕ್ಕು ಚಲಾಯಿಸಬೇಕು. ಮತದಾನ ಕೇವಲ ಹಕ್ಕಾಗಾದೆ ಕರ್ತವ್ಯ ಎಂದು ಭಾವಿಸಿ ಎಲ್ಲರೂ ಮತದಾನದಲ್ಲಿ ಭಾಗಿಯಾಗಬೇಕು. ಇದಕ್ಕಾಗಿ ಬೈಕ್‌ ಜಾಥಾ ಮಾಡುತ್ತಿದ್ದೇನೆ. ಸಾಧ್ಯವಾದಷ್ಟು ಜನರನ್ನು ತಲುಪಿ ಅವರಲ್ಲಿ ಮತದಾನದ ಬಗ್ಗೆ ಅರಿವು ಮೂಡಿಸಿ ಎಲ್ಲರನ್ನು ಮತಕಟ್ಟೆಗೆ ಕರೆತರಬೇಕು ಎಂಬುದು ನನ್ನ ಉದ್ದೇಶ.

-ಬಸವರಾಜು ಎಸ್‌.ಕಲ್ಲುಸಕ್ಕರೆ