556 ಅಭ್ಯರ್ಥಿಗಳು ಆಯ್ಕೆ

ಶಿವಮೊಗ್ಗ : ನಗರದ ನೆಹರೂ ಕ್ರೀಡಾಂಗಣದಲ್ಲಿ ನಡೆದ ಆರು ದಿನಗಳ ವಾಯುಸೇನಾ ನೇಮಕಾತಿ ರಾರ‍ಯಲಿಯಲ್ಲಿ 11,700ಕ್ಕೂ ಅಧಿಕ ಅಭ್ಯರ್ಥಿಗಳು ಭಾಗಿಯಾಗಿದ್ದು, 556 ಅಂತಿಮವಾಗಿ ಆಯ್ಕೆಯಾಗಿದ್ದಾರೆ. ಇದು ರಾಷ್ಟ್ರಮಟ್ಟದಲ್ಲೇ ದೊಡ್ಡ ಮಟ್ಟದ ನೇಮಕಾತಿ ರಾರ‍ಯಲಿ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಸಾಮಾನ್ಯವಾಗಿ ಒಂದು ರಾರ‍ಯಲಿಯಲ್ಲಿ 500-600 ಅಭ್ಯರ್ಥಿಗಳು ಮಾತ್ರ ಭಾಗವಹಿಸುತ್ತಿದ್ದರು. ಆದರೆ, ಶಿವಮೊಗ್ಗದಲ್ಲಿ ನಡೆದ ಚೊಚ್ಚಲ ರಾರ‍ಯಲಿಗೆ ಭಾರಿ ಸ್ಪಂದನೆ ಸಿಕ್ಕಿದೆ. ಉತ್ತರ ಕರ್ನಾಟಕದ ಏಳು ಜಿಲ್ಲೆಗಳಿಗೆ 17ರಂದು ನಡೆದ ರಾರ‍ಯಲಿಯಲ್ಲಿ 4 ಸಾವಿರಕ್ಕೂ ಅಧಿಕ ಅಭ್ಯರ್ಥಿಗಳು ಭಾಗವಹಿಸಿದ್ದು, ಈ ಪೈಕಿ, 215 ಆಯ್ಕೆಯಾಗಿದ್ದರು.

ಅದೇ ರೀತಿ, 19ರಂದು ರಾಜ್ಯ ಎಲ್ಲ ಜಿಲ್ಲೆಗಳವರಿಗೆ ರಾರ‍ಯಲಿಯಲ್ಲಿ ಅವಕಾಶವಿತ್ತು. ಅಂದು 1553 ಭಾಗವಹಿಸಿದ್ದು, 197 ಅಭ್ಯರ್ಥಿಗಳು ಅರ್ಹತೆ ಪಡೆದಿದ್ದರು. 21ರಂದು (ಆಟೋ ಟೆಕ್‌ ಹುದ್ದೆಗೆ) ರಾಜ್ಯದ 21 ಜಿಲ್ಲೆಗಳಿಂದ ಒಟ್ಟು 3450 ಅಭ್ಯರ್ಥಿಗಳು ಪಾಲ್ಗೊಂಡಿದ್ದು, ವಿವಿಧ ಹಂತಗಳನ್ನು ಪರೀಕ್ಷೆ ಎದುರಿಸಿದ ಬಳಿಕ ಅಂತಿಮವಾಗಿ 144 ಆಯ್ಕೆಯಾಗಿದ್ದಾರೆ. ಈ ಹುದ್ದೆಗೆ ಶಿವಮೊಗ್ಗದಿಂದ ಹೆಚ್ಚಿನ ಅಭ್ಯರ್ಥಿಗಳು ಅರ್ಹತೆ ಪಡೆದಿರುವುದು ಗಮನಾರ್ಹ ಸಂಗತಿಯಾಗಿದೆ. 144ರಲ್ಲಿ ಸುಮಾರು 45 ಶಿವಮೊಗ್ಗದವರೇ ಆಗಿದ್ದಾರೆ ಎಂದು ಜಿಲ್ಲಾ ಸೈನಿಕ ಕಲ್ಯಾಣ ಇಲಾಖೆ ಉಪ ನಿರ್ದೇಶಕ ಎನ್‌.ಚಂದ್ರಪ್ಪ ಅವರು 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದ್ದಾರೆ.

ಇಡೀ ರಾರ‍ಯಲಿಯಲ್ಲಿ ಬೆಳಗಾವಿಯಿಂದ ಅತಿ ಹೆಚ್ಚು ಅಭ್ಯರ್ಥಿಗಳು ಭಾಗವಹಿಸಿದ್ದರು. ನಂತರದ ಸ್ಥಾನದಲ್ಲಿ ವಿಜಯಪುರವಿದೆ. ಅಂತಿಮವಾಗಿ ಅರ್ಹತೆ ಪಡೆದಿರುವ ಅಭ್ಯರ್ಥಿಗಳ ಸಂಖ್ಯೆಯಲ್ಲೂ ಬೆಳಗಾವಿ ಹಾಗೂ ವಿಜಯಪುರವೇ ಟಾಪ್‌ನಲ್ಲಿವೆ.

===