ಇಬ್ಬರು ವೈದ್ಯರಿಗೆ 6 ಲಕ್ಷ ರೂ. ದಂಡ

ಶಿವಮೊಗ್ಗ : ವೈದ್ಯರ ನಿರ್ಲಕ್ಷ ್ಯದಿಂದ ತೊಂದರೆ ಅನುಭವಿಸಿದ ಮಹಿಳೆಗೆ ಆರು ಲಕ್ಷ ರೂ. ಪರಿಹಾರ ನೀಡುವಂತೆ ಶಿವಮೊಗ್ಗ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ವೇದಿಕೆ ಆದೇಶಿಸಿದೆ.

ಕೆ.ಎ.ಗೀತಾ ಎಂಬುವವರು ದೈಹಿಕ ತೊಂದರೆ ಹಿನ್ನೆಲೆ ವೈದ್ಯರ ಸಲಹೆಯಂತೆ ಶಿವಮೊಗ್ಗದಲ್ಲಿ ವೈದ್ಯ ಡಾ.ಎಂ. ಮುರಳೀಧರರಾವ್‌ ಮತ್ತು ಡಾ.ವಿಜಯಲಕ್ಷ್ಮಿ ರವೀಶ್‌ ಅವರಲ್ಲಿ ಗರ್ಭಕೋಶದ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ಆ ಬಳಿಕ, ವಿಪರೀತ ಜ್ವರ ಬಂದು ಪರಿಶೀಲಿಸಿದಾಗ ಗೀತಾ ಅವರ ಎಡಭಾಗದ ಕಿಡ್ನಿಯಲ್ಲಿ ಮೂತ್ರ ಶೇಖರಣೆಯಾಗಿ ಲೀವರ್‌, ಮೂತ್ರಕೋಶ ಹಿಗ್ಗಿ, ಮೂತ್ರನಾಳದಲ್ಲಿ ಅಡತಡೆ ಉಂಟಾಗಿರುವುದು ತಿಳಿದುಬಂದಿತ್ತು.

ಗರ್ಭಕೋಶದ ಶಸ್ತ್ರಚಿಕಿತ್ಸೆ ವೇಳೆ ಯುರೇಟರ್‌ ಸೇರುವ ಮೂತ್ರನಾಳಕ್ಕೆ ಹಾನಿ ಆಗಿದ್ದರಿಂದ ಈ ಸಮಸ್ಯೆ ಎದುರಾಗಿದೆ ಎಂದು ತಜ್ಞ ವೈದ್ಯರು ಖಚಿತಪಡಿಸಿದ್ದರು. ಆ ಬಳಿಕ ಬೆಂಗಳೂರಿನಲ್ಲಿ ಸಂತ್ರಸ್ತ ಮಹಿಳೆ ಶಸ್ತ್ರಚಿಕಿತ್ಸೆ ಪಡೆದಿದ್ದಾರೆ.

ಈ ಬಗ್ಗೆ ಗೀತಾ ಅವರು, ಗ್ರಾಹಕ ವ್ಯಾಜ್ಯಗಳ ಪರಿಹಾರ ವೇದಿಕೆಗೆ ವೈದ್ಯಕೀಯ ನಿರ್ಲಕ್ಷ ್ಯತನದ ಸೇವಾ ನೂನ್ಯತೆಯನ್ನು ಪ್ರಶ್ನಿಸಿ ದೂರು ದಾಖಲಿಸಿದ್ದರು.

ದೂರನ್ನು ಕೈಗೆತ್ತಿಕೊಂಡ ವೇದಿಕೆಯು ವಿಚಾರಣೆ ಮಾಡಿ ಸೂಕ್ತ ದಾಖಲೆಗಳನ್ನು ಪರೀಶೀಲಿಸಿದಾಗ ವೈದ್ಯರಾದ ಡಾ.ಮುರಳೀಧರರಾವ್‌ ಹಾಗೂ ಡಾ.ವಿಜಯಲಕ್ಷ್ಮಿ ರವೀಶ್‌ ಅವರು ನಿರ್ಲಕ್ಷ ್ಯತನ ತೋರಿರುವುದು ಸಾಬೀತಾಗಿದೆ.

ಈ ಹಿನ್ನೆಲೆಯಲ್ಲಿ, ತೊಂದರೆಗೊಳಗಾದ ಗೀತಾ ಅವರಿಗೆ ಆಗಿರುವ ಖರ್ಚು ಮತ್ತು ಮಾನಸಿಕ ನೋವು, ಹಿಂಸೆಗಾಗಿ 6 ಲಕ್ಷ ರೂ. ಪರಿಹಾರ, ಪ್ರಕರಣ ದಾಖಲಿಸಿದ ದಿನಾಂಕದಿಂದ ವಾರ್ಷಿಕ ಬಡ್ಡಿ ಶೇ.6ರಷ್ಟು ಹಾಗೂ ಪ್ರಕರಣ ದಾಖಲಿಸಲು ಆದ ಖರ್ಚು ವೆಚ್ಚಗಳಿಗಾಗಿ 30 ಸಾವಿರ ರೂ. ದಂಡ ವಿಧಿಸಲಾಗಿದೆ. ಆರು ವಾರಗಳೊಳಗೆ ಈ ಪರಿಹಾರ ಹಣವನ್ನು ನೀಡಬೇಕು. ತಪ್ಪಿದರೆ, ವಾರ್ಷಿಕ ಶೇ.10ರಷ್ಟು ಬಡ್ಡಿ ಸಹ ನೀಡಲು ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ವೇದಿಕೆ ಆದೇಶದಲ್ಲಿ ತಿಳಿಸಿದೆ.