ಎಸಿಬಿ ಬಲೆಗೆ ಪಿಡಬ್ಲ್ಯೂಡಿ ಮ್ಯಾನೇಜರ್‌

ಶಿವಮೊಗ್ಗ: ಗುತ್ತಿಗೆದಾರನ ಪರವಾನಗಿ ಉನ್ನತಿಗೆ ಲಂಚ ಪಡೆಯುತ್ತಿದ್ದ ಲೋಕೋಪಯೋಗಿ ಇಲಾಖೆ ಅಧೀಕ್ಷಕ ಎಂಜಿನಿಯರ್‌ ಕಚೇರಿ ವ್ಯವಸ್ಥಾಪಕ ಷೇಕ್‌ ಮೊಹಮ್ಮದ್‌ ಅವರು ಭ್ರಷ್ಟಾಚಾರ ನಿಗ್ರಹ ದಳ ಬಲೆಗೆ ಗುರುವಾರ ಸಂಜೆ ಬಿದ್ದಿದ್ದಾರೆ.

ದಾವಣಗೆರೆ ಜಿಲ್ಲೆಜಗಳೂರಿನ ಕ್ಲಾಸ್‌ 4 ಗುತ್ತಿಗೆದಾರ ವೈ.ಪಿ.ಸಿದ್ದನಗೌಡ ಅವರು ತಮ್ಮ ಪರವಾನಗಿಯನ್ನು ಕ್ಲಾಸ್‌ 3ಗೆ ಉನ್ನತೀಕರಿಸಿಕೊಳ್ಳಲು ಅರ್ಜಿ ಸಲ್ಲಿಸಿದ್ದರು. ಅದಕ್ಕಾಗಿ ಷೇಕ್‌ ಮೊಹಮ್ಮದ್‌ ಅವರು 10 ಸಾವಿರ ರೂ. ಲಂಚ ಕೇಳಿದ್ದರು. ಮೊದಲಿಗೆ 5 ಸಾವಿರ ರೂ. ಕೊಟ್ಟ ಅವರು ಬಳಿಕ ಎಸಿಬಿಗೆ ದೂರು ಸಲ್ಲಿಸಿದ್ದರು. ಗುರುವಾರ ಸಂಜೆ ಉಳಿದ 5ಸಾವಿರ ರೂ. ಪಡೆಯುವಾಗ ಎಸಿಬಿ ಇನ್ಸ್‌ಪೆಕ್ಟರ್‌ ಜೆ.ಎಸ್‌.ತಿಪ್ಪೇಸ್ವಾಮಿ ಅವರ ಕೈಗೆ ಸಿಕ್ಕಿಬಿದ್ದಿದ್ದಾರೆ.