ಅಪಘಾತ: ತಂದೆ, ಮಗ ಸ್ಥಳದಲ್ಲೇ ಸಾವು

ಸಾಗರ: : ತಾಲೂಕಿನ ಭೀಮನಕೋಣೆ ಸಮೀಪದ ಮುಂಗರವಳ್ಳಿ ಬಳಿ ದ್ವಿಚಕ್ರವಾಹನ ಮತ್ತು ನಾಟ ಸಾಗಿಸುತ್ತಿದ್ದ ಲಾರಿ ಪರಸ್ಪರ ಡಿಕ್ಕಿಯಾಗಿ ತಂದೆ ಮತ್ತು ಪುಟ್ಟ ಮಗ ಸ್ಥಳದಲ್ಲೇ ಮೃತಪಟ್ಟು, ಪತ್ನಿ ಗಂಭೀರವಾಗಿ ಗಾಯಗೊಂಡ ದುರ್ಘಟನೆ ಗುರುವಾರ ನಡೆದಿದೆ.

ತಾಲೂಕಿನ ಕಳಸವಳ್ಳಿ ವಾಸಿಗಳಾದ ಗಿರೀಶ್‌(35) ಮತ್ತು ಮಗ ಸುದೀಪ್‌(6) ಮೃತಪಟ್ಟವರು. ಗುರುವಾರದ ಸಂತೆ ಪೂರೈಸಿಕೊಂಡು ಗಿರೀಶ್‌, ಮಗ ಸುದೀಪ್‌ ಹಾಗೂ ಪತ್ನಿ ಮೂವರು ದ್ವಿಚಕ್ರವಾಹನದಲ್ಲಿ ಕಳಸವಳ್ಳಿಗೆ ತೆರಳುತ್ತಿದ್ದರು. ಈ ಸಂದರ್ಭ ಹೊಸನಗರದಿಂದ ಸಾಗರಕ್ಕೆ ಬರುತ್ತಿದ್ದ ನಾಟ ತುಂಬಿದ ಲಾರಿ ಎದುರಿನಿಂದ ಡಿಕ್ಕಿ ಹೊಡೆದು ದುರ್ಘಟನೆ ಸಂಭವಿಸಿದೆ. ಗ್ರಾಮಾಂತರ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.