ವಿದ್ಯಾರ್ಥಿಗಳ ನಿರ್ಲಕ್ಷಿಸಿದರೆ ಅಧಿಕಾರಿಗಳ ಮೇಲೆ ಕ್ರಮ

ಶಿರಾಳಕೊಪ್ಪ: 18ವರ್ಷದ ಒಳಗಿನ ಮಕ್ಕಳಿಗೆ ಮಾನಸಿಕ ಹಾಗೂ ದೈಹಿಕ ಸಮಸ್ಯೆ ಎದುರಾದರೇ ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳ ವಿರುದ್ಧ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ಕರ್ನಾಟಕ ರಾಜ್ಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗದ ಸದಸ್ಯ ಡಿ. ಶಂಕರಪ್ಪ ಎಚ್ಚರಿಕೆ ನೀಡಿದರು.

ಚಿಕ್ಕಜಂಬೂರು ಗ್ರಾಮದ ಉರ್ದು ಪ್ರೌಢ ಶಾಲೆ ಅವ್ಯವಸ್ಥೆ ಬಗ್ಗೆ ದೂರು ಬಂದ ಹಿನ್ನೆಲೆಯಲ್ಲಿಶನಿವಾರ ಭೇಟಿ ನೀಡಿ ಪರಿಶೀಲಿಸಿ ಮಾತನಾಡಿದರು.

ಶಾಲೆಗೆ ನೀಡಲಾಗಿರುವ ಕಂಪ್ಯೂಟರ್‌ಗಳ ಬಳಕೆ ಸಮರ್ಪಕವಾಗಿಲ್ಲ, ಶೌಚಾಲಯ ವಿದ್ಯಾರ್ಥಿಗಳು ಬಳಸಲು ಯೋಗ್ಯವಾಗಿಲ್ಲ, ಅಡುಗೆ ಕೋಣೆ ಬೀಳುವ ಸ್ಥಿತಿಯಲ್ಲಿದೆ. ಶಾಲೆ ಕೊಠಡಿಗಳಲ್ಲಿಶುಚಿತ್ವ ಕಾಪಾಡದೆ ಅನುಪಯುಕ್ತ ವಸ್ತುಗಳ ದಾಸ್ತಾನು ಮೂಲಕ ಶಾಲೆ ವಾತಾವರಣ ಹಾಳುಗೆಡುವಲಾಗಿದೆ. ಶಿಕ್ಷಕರ ಮಧ್ಯೆ ಸಮನ್ವಯ ಕೊರತೆ ಕಾಣುತ್ತಿದೆ. ಇದನ್ನು ಸರಿಪಡಿಸಲು ಶಿಕ್ಷಣ ಇಲಾಖೆ ಅಧಿಕಾರಿಗಳಿಗೆ ಸೂಚಿಸಲಾಗುವುದು ಎಂದರು.

ತಾ.ಪಂ.ಸದಸ್ಯ ಗಾಯಿತ್ರಿ ಆನಂದಪ್ಪ ಮಾತನಾಡಿ, ಶಾಲೆ ಮುಖ್ಯಸ್ಥರು ಶಿಷ್ಟಾಚಾರ ಉಲ್ಲಂಘನೆ ಮಾಡಿದ್ದಾರೆ. ಶಾಲೆಯಲ್ಲಿನಡೆಯುವ ಯಾವುದೇ ಕಾರ್ಯಕ್ರಮಕ್ಕೂ ತಮಗೆ ಆಹ್ವಾನ ನೀಡಿಲ್ಲ, ಗ್ರಾಮಸ್ಥರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಕಾರ‍್ಯನಿರ್ವಹಿಸುತ್ತಿದ್ದಾರೆ. ಈ ಬಗ್ಗೆ ಹಿಂದಿನ ಕ್ಷೇತ್ರ ಶಿಕ್ಷಣಾಧಿಕಾರಿಗಳಿಗೆ ದೂರು ನೀಡಿದರೂ ಪ್ರಯೋಜನವಾಗಿಲ್ಲಎಂದು ದೂರಿದರು. ಹಿರೇಜಂಬೂರು ಸರಕಾರಿ ಪ್ರಾಥಮಿಕ ಶಾಲೆ, ಅಂಗನವಾಡಿ ಕೇಂದ್ರಗಳು ಹಾಗೂ ಮಲೆನಾಡು ಪ್ರೌಢ ಶಾಲೆಯ ಮೂಲಸೌಕರ‍್ಯ ಬಗ್ಗೆ ಪರಿಶೀಲನೆ ನಡೆಸಿದರು. ಹಿರೇಜಂಬೂರು ಪ್ರಾಥಮಿಕ ಶಾಲೆಗೆ ಉತ್ತಮ ಶೌಚಾಲಯ ಕಲ್ಪಿಸುವಂತೆ ಪಿಡಿಓ ಲವಾ ಅವರಿಗೆ ತಾಕೀತು ಮಾಡಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಪಿಡಿಓ ಲವಾ, ನೂತನ ಶೌಚಾಲಯ ನಿರ್ಮಿಸಿಕೊಡಲಾಗುವುದು, ಅಲ್ಲಿವರೆಗೂ ಈಗಿನ ಶೌಚಾಲಯ ಬಳಸಲು ವ್ಯವಸ್ಥೆ ಮಾಡಿಕೊಡುವುದಾಗಿ ತಿಳಿಸಿದರು. ಶಿಕ್ಷಣ ಸಂಯೋಜಕ ನಟರಾಜ್‌ ಕಾರಾರ‍ಯಚರಣೆಯಲ್ಲಿಭಾಗವಹಿಸಿದ್ದರು.