ಸಮರ್ಪಕ ವೇತನ, ಇಎಸ್‌ಐ ಸೌಲಭ್ಯಕ್ಕೆ ಆಗ್ರಹ

ಹೊಸನಗರ: ವಿವಿಧ ಬೇಡಿಕೆ ಈಡೇರಿಸುವಂತೆ ಆಗ್ರಹಿಸಿ ಅಂಗನವಾಡಿ ಕಾರ‍್ಯಕರ್ತೆಯರು ಮತ್ತು ಸಹಾಯಕಿಯರು ಬುಧವಾರ ಪ್ರತಿಭಟಿಸಿದರು. ಇಲ್ಲಿನ ತಾಲೂಕು ಕಚೇರಿ ಆವರಣದಲ್ಲಿ ಸಭೆ ಸೇರಿ ಸರಕಾರದ ವಿರುದ್ಧ ಘೋಷಣೆ ಕೂಗಿದರು. ಸರಕಾರ ಘೋಷಿಸಿರುವಂತೆ ರೂ.18 ಸಾವಿರ ವೇತನ ಮತ್ತು ಇಎಸ್‌ಐ, ಪಿಎಫ್‌, ನಿವೃತ್ತಿ ಭತ್ಯೆ ಮೊದಲಾದ ಸೌಲಭ್ಯ ನೀಡುವಂತೆ ಆಗ್ರಹಿಸಿ ತಹಸೀಲ್ದಾರ್‌ಗೆ ಮನವಿ ಸಲ್ಲಿಸಿದರು.

ಮಾತೃಪೂರ್ಣ ಯೋಜನೆಯಿಂದ ಅಂಗನವಾಡಿ ಕಾರ‍್ಯಕರ್ತೆಯರಿಗೆ ಹೆಚ್ಚುವರಿ ಹೊರೆಯಾಗಿದೆ. ಮಿನಿ ಅಂಗನವಾಡಿಗಳಿಗೆ ಸಹಾಯಕಿಯರಿಲ್ಲ. ತೀರಾ ಕಡಿಮೆ ಗೌರವಧನದಲ್ಲಿ ಕರ್ತವ್ಯ ನಿರ್ವಹಿಸಬೇಕಾಗಿದೆ. ಬಾಡಿಗೆ ಕಟ್ಟಡದಲ್ಲಿ ನಡೆಸುವ ಅಂಗನವಾಡಿಗೆ ಬಾಡಿಗೆ ಹಣ ಸಕಾಲದಲ್ಲಿ ಬಿಡುಗಡೆಯಾಗುತ್ತಿಲ್ಲ. ಅಂಗನವಾಡಿ ಕಾರ‍್ಯಕರ್ತೆ ಹಾಗೂ ಸಹಾಯಕಿಯರಿಗೆ ಸಿ ಮತ್ತು ಡಿ ಗ್ರೂಪ್‌ ನೌಕರರು ಎಂದು ಘೋಷಿಸಬೇಕೆಂದು ಒತ್ತಾಯಿಸಿದರು. ಈ ವೇಳೆ ಫೆಡರೇಶನ್‌ ರಾಜ್ಯ ಸಂಚಾಲಕ ರವೀಂದ್ರ ಸಾಗರ್‌, ತಾಲೂಕು ಅಧ್ಯಕ್ಷ ಬಿ.ಬಿ.ತಾರಾ, ಪ್ರಧಾನ ಕಾರ‍್ಯದರ್ಶಿ ಲೀಲಾವತಿ, ಜಿಲ್ಲಾ ಸಂಚಾಲಕರಾದ ಉಮಾ, ಜಯಾ, ನಾಗಮ್ಮ, ಶರ್ಮಿಳಾ, ಗೀತಾಂಜಲಿ, ಸುಗಂಧಿ, ಸತ್ಯನಾಗರತ್ನ, ರೇಣುಲ, ಶಾಂತ ಮತ್ತಿತರರು ಇದ್ದರು.