ಮದ್ಯವ್ಯಸನಿ ಸ್ನೇಹಿತರಿಬ್ಬರ ಆತ್ಮಹತ್ಯೆ

ಹೊಸನಗರ: ಅತಿಯಾದ ಮದ್ಯಪಾನದ ದುಶ್ಚಟ ಅಂಟಿಸಿಕೊಂಡಿದ್ದ ಸ್ನೇಹಿತರಿಬ್ಬರು ಜೀವನದಲ್ಲಿ ಜುಗುಪ್ಸೆ ಹೊಂದಿ ಬುಧವಾರ ರಾತ್ರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಪಟ್ಟಣಕ್ಕೆ ಸಮೀಪದ ಗಂಗನಕೊಪ್ಪದ ಪ್ರಕಾಶ(30) ಮತ್ತು ಆರ್‌ಕೆ ರಸ್ತೆ ನಿವಾಸಿ ಶ್ರೀಕಾಂತ(28) ಮೃತಪಟ್ಟವರು.

ಕೆಲ ದಿನಗಳಿಂದ ವಿಪರೀತ ಮದ್ಯಪಾನ ಮಾಡುವ ಅಭ್ಯಾಸ ಮಾಡಿಕೊಂಡಿದ್ದು, ರಾತ್ರಿ ಮನೆಗೆ ಸರಿಯಾಗಿ ಮರಳುತ್ತಿರಲಿಲ್ಲ. ಆರೋಗ್ಯದಲ್ಲಿ ಸಹಾ ಏರುಪೇರಾಗಿತ್ತು. ಕೆಲಸ ಕಾರ‍್ಯ ನಡೆಸಲು ಅಶಕ್ತರಾಗಿದ್ದರು. ಕುಟುಂಬಸ್ಥರು ಹೇಳುತ್ತಿದ್ದ ಬುದ್ಧಿವಾದ ಹಾಗೂ ಮದ್ಯಪಾನ ಮಾಡಲು ಹಣ ಸಿಗದೇ ಮಾನಸಿಕ ಖಿನ್ನತೆಗೆ ಒಳಗಾಗಿದ್ದರು. ಇದರಿಂದ ಬೇಸತ್ತ ಸ್ನೇಹಿತರು ಇಲ್ಲಿನ ಮಾರಿಗುಡ್ಡದಲ್ಲಿ ಒಂದೇ ಮರದ ಟೊಂಗೆಗಳಿಗೆ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಹೊಸನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.