ಬಸ್‌ಗಳಿಗೆ ‘ಶರಾವತಿ ಯೋಜನೆ ವಿರೋಧಿ ಫಲಕ’

ಸಾಗರ : ಶರಾವತಿ ಯೋಜನೆ ವಿರೋಧಿಸಿ ಗುರುವಾರ ಖಾಸಗಿ ಬಸ್‌ ಏಜೆಂಟರು ಮತ್ತು ನಿರ್ವಾಹಕರ ಸಂಘದಿಂದ ಮುಖ್ಯ ಬಸ್‌ ನಿಲ್ದಾಣದಲ್ಲಿ ಶಿವಮೊಗ್ಗ, ಬೆಂಗಳೂರಿಗೆ ಹೋಗುವ ಬಸ್‌ಗಳಿಗೆ 'ಶರಾವತಿ ನದಿ ನೀರನ್ನು ಬೆಂಗಳೂರಿಗೆ ತೆಗೆದುಕೊಂಡು ಹೋಗಲು ಬಿಡುವುದಿಲ್ಲ' ಎಂಬ ಘೋಷಣಾ ಫಲಕ ಅಳವಡಿಸುವ ಮೂಲಕ ಪ್ರತಿಭಟಿಸಲಾಯಿತು.

ಏಜೆಂಟರ ಸಂಘದ ನಾಗರಾಜ ಗುಡ್ಡೆಮನೆ ಮಾತನಾಡಿ, ರಾಜ್ಯ ಸರಕಾರ ಯೋಜನೆ ಕೈಬಿಡುವ ಮೂಲಕ ಮಲೆನಾಡು ಜನರ ಕೂಗಿಗೆ ಸ್ಪಂದಿಸಬೇಕು. ಜಿಲ್ಲಾ ಬಂದ್‌ಗೆ ಸಾಗರ ಮುಖ್ಯ ಬಸ್‌ ನಿಲ್ದಾಣದ ಎಲ್ಲರೂ ಬೆಂಬಲ ಘೋಷಣೆ ಮಾಡುತ್ತೇವೆ ಎಂದು ತಿಳಿಸಿದರು.

ಗೋಪಿನಾಥ್‌, ಸಂತೋಷ್‌, ಜನಾರ್ದನ ನಾಯಕ್‌, ರವೀಶ್‌, ನಾಗೇಶ್‌, ಖಾದರ್‌ , ಮಹೇಶ ಮತ್ತಿತರರು ಹಾಜರಿದ್ದರು.