ಏರುವುದು, ಜಾರುವುದು ತಪ್ಪದ ಬ್ಯಾಡರಕೊಪ್ಪ ರಸ್ತೆ

ಆನಂದಪುರಂ : ಹೊಸೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಚೆನ್ನಶೆಟ್ಟಿಕೊಪ್ಪ ಗ್ರಾಮದಿಂದ ಬ್ಯಾಡರಕೊಪ್ಪ ಗ್ರಾಮ ಸಂಪರ್ಕದ ಬೈ ಪಾಸ್‌ ರಸ್ತೆ ಮಳೆಗಾಲದಲ್ಲಿ ಜಾರು ಬಂಡಿಯ ರಸ್ತೆಯಾಗಿ ಪರಿಣಮಿಸಿದೆ.

ಚೆನ್ನಶೆಟ್ಟಿಕೊಪ್ಪದಿಂದ ಬ್ಯಾಡರಕೊಪ್ಪ ಗ್ರಾಮ ತಲುಪಲು ಜಂಬೂರಮನೆ ಮೂಲಕ ಮುಖ್ಯ ರಸ್ತೆ ಇದೆಯಾದರೂ ಸುಮಾರು 25-30 ಕುಟುಂಬಗಳಿಗೆ ಈ ರಸ್ತೆ ಅತಿ ಸಮೀಪದ ಬೈ ಪಾಸ್‌ ರಸ್ತೆಯಾಗಿದೆ. ಚೆನ್ನಶೆಟ್ಟಿಕೊಪ್ಪ ಗ್ರಾಮದ ಹುರುಳಿ ನಾರಾಯಣಪ್ಪ ಅವರ ಮನೆ ಸಮೀಪದಿಂದ ಸಾಗುವ ಈ ರಸ್ತೆ ಸಂಪೂರ್ಣ ಕೆಸರುಮಯವಾಗಿದೆ. ಒಂದು ಏರು ಏರುತ್ತಿದ್ದಂತೆ ಇಳಿಜಾರು ಆರಂಭವಾಗತ್ತದೆ. 2 ಕಿ.ಮೀ. ದೂರದ ಈ ರಸ್ತೆಯಲ್ಲಿ ಬೈಕ್‌ನಲ್ಲಿ ಸಾಗುವಾಗ ಜತೆಗೆ ಇನ್ನೊಬ್ಬ ಸಹಾಯಕ ಬೇಕೇಬೇಕು. ಸಹಾಯಕ ಬೈಕ್‌ನ ಹಿಂಬದಿಯನ್ನು ಗಟ್ಟಿಯಾಗಿ ಹಿಡಿದು ಬೈಕ್‌ ಜಾರದಂತೆ ಸಮತೋಲನ ಕಾಪಾಡಬೇಕು. ಈ ರಸ್ತೆಯ ಕೆಸರಿನ ವಿಪರೀತತೆ ಬಗ್ಗೆ ಅರಿವಿಲ್ಲದೆ ಹೊಸಬರು ಆಗಮಿಸಿದರೆ ಒಮ್ಮೆಲೆ ಜಾರುತ್ತಾ ಗದ್ದೆಯ ಮೂಲೆಗೆ ಹೋಗಿ ಬೀಳಬೇಕಾಗುತ್ತದೆ. ಈ ರಸ್ತೆಯ ಕಡಿದಾದ ಇಳಿಜಾರು ಸಮತಟ್ಟುಗೊಳಿಸಿ ಜಲ್ಲೀಕರಣಗೊಳಿಸುವಂತೆ ಗ್ರಾಮಸ್ಥರು ಗ್ರಾಮ ಪಂಚಾಯಿತಿಯಿಂದ ಹಿಡಿದು ವಿಧಾನಸಭೆ ಸದಸ್ಯರ ವರೆಗೆ ಹಲವು ಬಾರಿ ಮನವಿ ಸಲ್ಲಿಸಿದ್ದಾರೆ. ಕೃಷಿ ಕಾರ್ಯ, ಬೆಳೆ ಕಟಾವಿನ ನಂತರ ಫಸಲನ್ನು ಸಾಗಿಸಿ ತರುವುದು, ಜಾನುವಾರುಗಳನ್ನು ಮೇಯಲು ತರುವುದು ಇತ್ಯಾದಿಗಳಿಗಾಗಿ ಈ ರಸ್ತೆ ಬಳಕೆ ಅನಿವಾರ್ಯವಾಗಿದೆ.

ಸ್ವಲ್ಪ ಮಳೆ ಬಿಡುವು ಕೊಟ್ಟು ಬಿಸಿಲು ಬಿದ್ದ ದಿನಗಳಲ್ಲಿ ರಸ್ತೆ ಜಾರಿಕೆಯಾಗದು ಎಂದು ಧೈರ್ಯ ಮಾಡಿ ಬೈಕ್‌ ಚಲಾಯಿಸಿದ ಹಲವರು ಉರುಳಿ ಬಿದ್ದು ಗಾಯಗೊಂಡ ಘಟನೆ ನಡೆದಿದೆ.

ಈ ರಸ್ತೆಯನ್ನು ಜಲ್ಲೀಕರಣಗೊಳಿಸಿ ಚೆನ್ನಶೆಟ್ಟಿಕೊಪ್ಪದ ಗ್ರಾಮೀಣ ರೈತರು ತಮ್ಮ ಹೊಲ ಮತ್ತು ಸಮೀಪದ ಬ್ಯಾಡರಕೊಪ್ಪ ಗ್ರಾಮ ತಲುಪಲು ಉತ್ತಮಗೊಳಿಸಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ.

-----------
ಚೆನ್ನಶೆಟ್ಟಿಕೊಪ್ಪ-ಬ್ಯಾಡರಕೊಪ್ಪ ಸಂಪರ್ಕದ ಬೈ ಪಾಸ್‌ ರಸ್ತೆ ದುರಸ್ತಿಗೆ ಅನುದಾನ ನೀಡಲು ಜಿಲ್ಲಾ ಪಂಚಾಯಿತಿ ಸದಸ್ಯರಿಗೆ ಮನವಿ ಮಾಡಲಾಗಿದೆ. ಅಲ್ಲದೆ ಬರುವ ಬೇಸಿಗೆಯಲ್ಲಿ ಈ ರಸ್ತೆ ಬಗ್ಗೆ ಕಾಮಗಾರಿ ಕೈಗೊಳ್ಳಲು ಉದ್ಯೋಗ ಖಾತ್ರಿ ಯೋಜನೆಯಲ್ಲಿ ಹಣ ಮೀಸಲಿಡಲು ನಿರ್ಧರಿಸಲಾಗಿದೆ.

- ಕೃಷ್ಣವೇಣಿ ನಾಗಪ್ಪ, ಹೊಸೂರು ಗ್ರಾ.ಪಂ.ಅಧ್ಯಕ್ಷ ರು

--------------
ಚೆನ್ನಶೆಟ್ಟಿಕೊಪ್ಪ-ಬ್ಯಾಡರಕೊಪ್ಪ ಗ್ರಾಮ ಸಂಪರ್ಕದ ರಸ್ತೆ ಅತೀ ಸಮೀಪದ ರಸ್ತೆಯಾಗಿದೆ. ರೈತರಿಗೆ ಹೊಲಗದ್ದೆಗೆ ಸಾಗಲು, ತಮ್ಮ ಬಂಧುಗಳ ಮನೆ ತಲುಪಲು ಈ ರಸ್ತೆ ಅನಿವಾರ್ಯವಾಗಿದೆ. ರಸ್ತೆಯಲ್ಲಿ ನಿತ್ಯ ಅತ್ಯಂತ ಸಂಕಷ್ಟದಲ್ಲಿ ಜನರು ಓಡಾಡುತ್ತಿದ್ದು, ತ್ವರಿತವಾಗಿ ರಸ್ತೆ ಅಭಿವೃದ್ಧಿಗೊಳ್ಳಬೇಕಿದೆ.

- ಹರುಳಿ ನಾರಾಯಣಪ್ಪ, ಹಿರಿಯ ನಾಗರಿಕ.