ಮಾದಕ ವಸ್ತು ಬಗ್ಗೆ ಎಚ್ಚರವಿರಲಿ

ರಿಪ್ಪನ್‌ಪೇಟೆ: ಯುವ ಸಮೂಹ ಮಾದಕ ವಸ್ತುಗಳತ್ತ ಗಮನ ಹರಿಸುತ್ತಿರುವುದು ವಿಷಾದನೀಯ. ವಿದ್ಯಾರ್ಥಿಗಳು ಮಾದಕ ವಸ್ತುಗಳ ಬಗ್ಗೆ ಎಚ್ಚರದಿಂದ ಇರಬೇಕು, ಮಾದಕ ವಸ್ತುಗಳು ಬದುಕನ್ನು ನಾಶಗೊಳಿಸುತ್ತವೆ ಎಂದು ಪಟ್ಟಣದ ಪಿಎಸ್‌ಐ ರಾಜಶೇಖರ್‌ ಹೇಳಿದರು.

ಪಟ್ಟಣದ ಮೇರಿ ಮಾತಾ ಪದವಿಪೂರ್ವ ಕಾಲೇಜಿನÜಲ್ಲಿ ಬುಧವಾರ ಪೊಲೀಸ್‌ ಇಲಾಖೆ ಆಯೋಜಿಸಿದ್ದ ಅಂತಾರಾಷ್ಟ್ರೀಯ ಮಾದಕ ವಸ್ತುಗಳ ವಿರೋಧಿ ದಿನಾಚರಣೆ ಯಲ್ಲಿ ಅವರು ಮಾತನಾಡಿದರು.

ಹದಿಹರೆಯದ ವಯಸ್ಸಿನವರು ಮತ್ತು ಮಕ್ಕಳು ಮಾದಕ ಪದಾರ್ಥ ಸೇವನೆ ಮಾಡಿ ಮಾನಸಿಕ ಖಿನ್ನತೆಗೆ ಒಳಗಾಗುತ್ತಿದ್ದಾರೆ. ಅಮಲು ಪದಾರ್ಥ ಸೇವನೆ ಆರೋಗ್ಯ ಮೇಲೆ ತೀವ್ರ ದುಷ್ಪರಿಣಾಮ ಬೀರಿ ಅನಾರೋಗ್ಯಕ್ಕೆ ತುತ್ತಾಗುವುದಲ್ಲದೇ ಕೊಲೆ, ದರೋಡೆ, ಕಳ್ಳತನ, ಸುಲಿಗೆಯಂತಹ ಅಪರಾಧ ಚಟುವಟಿಕೆಗಳಲ್ಲಿ ಭಾಗಿಯಾಗುವಂತೆ ಮಾಡಿ ಸಮಾಜದ ಸ್ವಾಸ್ಥ್ಯ ಹಾಳುಗೆಡುವುತ್ತದೆ. ಜತೆಗೆ ಸಮಾಜದ ನೆಮ್ಮದಿ ಬದುಕಿಗೆ ಮಾರಕವಾಗುತ್ತದೆ ಎಂದರು.

ಕಾಲೇಜಿನ ಸಂಚಾಲಕ ಮಹೇಂದ್ರ, ಉಪನ್ಯಾಸಕರಾದ ಮಂಜಪ್ಪ, ಸುಜನ್‌, ಪಾವನ, ಅರ್ಚನ, ಚಿತ್ರಾ ಹಾಗೂ ಪೊಲೀಸ್‌ ಇಲಾಖೆಯ ಸಂತೋಷ್‌ಕುಮಾರ್‌, ಜಯಶೀಲ, ನಾಗಪ್ಪ, ರಮ್ಯ ಇತರರಿದ್ದರು.