ಹೆಬ್ಬಾವನ್ನೇ ನುಂಗಲು ಬಾಯ್ದೆರೆದ ಕಾಳಿಂಗ!

ತೀರ್ಥಹಳ್ಳಿ : ಪಶ್ಚಿಮಘಟ್ಟ ಶ್ರೇಣಿಯ ಆಗುಂಬೆ ಭಾಗ ಪ್ರಾಕೃತಿಕ ವಿಸ್ಮಯದ ಕ್ಷಣಗಳಿಗೆ ಅನೇಕ ಬಾರಿ ಸಾಕ್ಷಿ ಆಗುತ್ತಲೇ ಇರುತ್ತದೆ. ಇಂತಹ ಮೊತ್ತೊಂದು ವಿಸ್ಮಯ ಸೋಮವಾರ ಸಂಜೆ ಗುಡ್ಡೇಕೇರಿ ಗ್ರಾಮ ವ್ಯಾಪ್ತಿಯ ಹೊಸೂರಲ್ಲಿ ಕಂಡುಬಂತು.

ಬೃಹತ್‌ ಗಾತ್ರದ ಹೆಬ್ಬಾವನ್ನು ಕಾಳಿಂಗಸರ್ಪ ನುಂಗುತ್ತಿದ್ದ ಕ್ಷಣಗಳನ್ನು ಜನರು ಕಂಡರು. ಹೆಬ್ಬಾವಿನ ಬಾಲದ ಕಡೆಯಿಂದ ಅರ್ಧ ದೇಹವನ್ನು ನುಂಗಿದ ನಂತರ ಪೂರ್ಣ ನುಂಗಲು ಕಾಳಿಂಗ ಸರ್ಪ ಹೆಣಗಾಡಿತು. ಜನರು ಆತಂಕದಲ್ಲೇ ಈ ವೈಚಿತ್ರ್ಯವನ್ನು ವೀಕ್ಷಿಸಿದರು. ಅಷ್ಟರಲ್ಲೇ ಕತ್ತಲಾಗಿದ್ದರಿಂದ ಮುಂದೇನಾಯಿತೆಂದು ಗೊತ್ತಾಗಲಿಲ್ಲ ಎಂದು ಗ್ರಾಮಸ್ಥರು 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದ್ದಾರೆ.