ಕಾಲರಾಕ್ಕೆ ಗ್ರಾ.ಪಂ. ಆಧ್ಯಕ್ಷ ಬಲಿ

ಶಿವಮೊಗ್ಗ: ಭದ್ರಾವತಿ ತಾಲೂಕಿನ ಮೈದೊಳಲು ಗ್ರಾಮದಲ್ಲಿ ಕಾಣಿಸಿಕೊಂಡಿರುವ ಕಾಲರಾ ರೋಗಕ್ಕೆ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಮಂಜಪ್ಪ (50) ಬಲಿಯಾಗಿದ್ದು, ಮೃತರ ಸಂಖ್ಯೆ ಐದಕ್ಕೆ ಏರಿದೆ.

ಕಳೆದ ನಾಲ್ಕು ದಿವಸದಿಂದ ಕಾಣಿಸಿಕೊಂಡಿರುವ ಕಾಲರಾದಿಂದ ಗ್ರಾಮದ 54 ಮಂದಿ ಈಗಾಗಲೇ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಹೊರರೋಗಿಯಾಗಿ ಚಿಕಿತ್ಸೆ ಪಡೆದಿದ್ದ ಮಂಜಪ್ಪ ಅವರು ಬುಧವಾರ ಮನೆಗೆ ತೆರಳಿದ್ದರು. ರಾತ್ರಿ ಮತ್ತೆ ವಾಂತಿ ಹೆಚ್ಚಾಗಿದ್ದರಿಂದ ಶಿವಮೊಗ್ಗದ ಮೆಗ್ಗಾನ್ ಆಸ್ಪತ್ರೆಗೆ ದಾಖಲಾಗಿದ್ದರು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಗುರುವಾರ ಬೆಳಗಿನ ಜಾವ ವೃತಪಟ್ಟಿದ್ದಾರೆ.

ಮೈದೊಳಲು ವಾಂತಿಭೇದಿಗೆ ಕಾರಣ ಕಾಲರ

ಊರಿನಲ್ಲಿ ಸ್ವಚ್ಛತೆ ಕಾಪಾಡುವಲ್ಲಿ ನಿರ್ಲಕ್ಷ್ಯ ವಹಿಸಿದ ಗ್ರಾಮ ಪಂಚಾಯಿತಿ ಪಿಡಿಒ ಜಿ.ರಮೇಶ್‌ ಅವರನ್ನು ಅಮಾನತುಗೊಳಿಸಲಾಗಿದೆ. ನೀರುಗಂಟಿಯನ್ನು ಬದಲಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ಡಾ.ಎಂ.ಲೋಕೇಶ್‌ ಬುಧವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದರು.

ನೀರಿನ ವ್ಯವಸ್ಥೆ ಬದಲಾವಣೆ:

ಪಂಚಾಯಿತಿ ಪೂರೈಕೆ ಮಾಡುವ ನಲ್ಲಿ ನೀರನ್ನು ಹಲವೆಡೆ ಸ್ಯಾಂಪಲ್‌ ತೆಗೆದು ಪರೀಕ್ಷೆಗೆ ಒಳಪಡಿಸಿದಾಗ 7 ಕಡೆ ನೀರಿನಲ್ಲಿ ಮಲ ಸೇರಿರುವುದು ದೃಢಪಟ್ಟಿದೆ. ಚರಂಡಿ, ಪೈಪ್‌ ಸೋರಿಕೆಯಾಗುವ ಜಾಗದಲ್ಲಿ ನೀರು ನಿಂತು ಅದರಲ್ಲಿ ಕೊಳಚೆ ಸೇರಿ ನೀರು ಪೂರೈಕೆ ಸ್ಥಗಿತಗೊಳಿಸಿದಾಗ ಪೈಪ್‌ನೊಳಗೆ ಕೊಳಚೆ ನೀರು ಹೋಗಿ ಶುದ್ಧ ನೀರಿನೊಂದಿಗೆ ಮನೆಗಳಿಗೆ ಪೂರೈಕೆಯಾಗುತ್ತಿರುವುದು ದೃಢಪಟ್ಟಿದೆ. ಪಂಚಾಯಿತಿ ಆಡಳಿತವು ಪೈಪ್‌ ದುರಸ್ತಿ ಮಾಡದೆ ನಿರ್ಲಕ್ಷ್ಯ ವಹಿಸಿರುವುದು ಕಂಡು ಬಂದಿದೆ.