ಹೈನುಗಾರಿಕೆ ನಮ್ಮ ಸಂಸ್ಕೃತಿಯ ಭಾಗ: ಆರಗ

ತೀರ್ಥಹಳ್ಳಿ : ಹಾಲು ಉತ್ಪಾದಕರ ಪರವಾಗಿ ಹಾಲು ಒಕ್ಕೂಟ ಕೆಲಸ ಮಾಡದಿದ್ದರೆ ಹಾಲು ಉತ್ಪಾದನಾ ಕ್ಷೇತ್ರಕ್ಕೆ ಹಾನಿ ಉಂಟಾಗಲಿದೆ. ಹೈನುಗಾರಿಕೆ ಲಾಭದಾಯಕ ಎಂಬ ನಿರೀಕ್ಷೆ ಇಟ್ಟುಕೊಳ್ಳಬಾರದು ಎಂದು ಶಾಸಕ ಆರಗ ಜ್ಞಾನೇಂದ್ರ ಅಭಿಪ್ರಾಯಪಟ್ಟರು.

ತಾಲೂಕಿನ ಅರೇಹಳ್ಳಿಯಲ್ಲಿ ಸೋಮವಾರ ಹಾಲು ಉತ್ಪಾದಕರ ಸಹಕಾರ ಸಂಘದ ನೂತನ ಕಟ್ಟಡ ಉದ್ಘಾಟಿಸಿ ಅವರು ಮಾತನಾಡಿದರು.

ಗೋಪಾಲನೆ, ಗೋ ಸಾಕಣೆ ನಮ್ಮ ಮಣ್ಣಿನ ಸಂಸ್ಕೃತಿಯ ಭಾಗವಾಗಿದೆ. ಲಾಭ, ನಷ್ಟದ ಗುರಿ ಇಲ್ಲದೆ ಹೈನುಗಾರಿಕೆಯಲ್ಲಿ ತೊಡಗುವಂತಹ ಮನೋಭಾವ ಬೆಳೆಯಬೇಕಿದೆ. ಇಂತಹ ಮನೋಭಾವದವರಿಂದ ಹಾಲು ಉದ್ಯಮ ಇಂದು ಬೆಳವಣಿಗೆ ಕಂಡಿದೆ ಎಂದರು.

ಶಿಮುಲ್‌ ಅಧ್ಯಕ್ಷ ಆನಂದ್‌, ಜಿ.ಪಂ. ಸದಸ್ಯೆ ಭಾರತೀ ಪ್ರಭಾಕರ್‌, ತಾ.ಪಂ. ಸದಸ್ಯೆ ಶೃತಿ, ಅರೇಹಳ್ಳಿ ಹಾಲು ಒಕ್ಕೂಟದ ಅಧ್ಯಕ್ಷರು, ಮತ್ತಿತರರು ಇದ್ದರು.
--------

10 ಎಕರೆ ಜಮೀನು ಸಾಗುವಳಿ ಮಾಡುವವರು ಇಂದು ಜಾನುವಾರು ಸಾಕಣೆಯಿಂದ ದೂರ ಸರಿದಿದ್ದಾರೆ. ರೈತಾಪಿಯ ಭವಿಷ್ಯದ ದೃಷ್ಟಿಯಿಂದ ಇಂತಹ ನಿರ್ಧಾರ ಒಳಿತು ಮಾಡದು. ನಷ್ಟವಾದರೂ ತೊಂದರೆ ಇಲ್ಲ ಎಂದು ಭಾವಿಸಿ ತಾನು 30 ವರ್ಷದಿಂದ ಗುಡ್ಡೇಕೊಪ್ಪ ಹಾಲು ಉತ್ಪಾದಕರ ಸಹಕಾರ ಸಂಘಕ್ಕೆ ಹಾಲು ಮಾರಾಟ ಮಾಡುತ್ತಿದ್ದೇನೆ.

- ಆರಗ ಜ್ಞಾನೇಂದ್ರ