ಹೊಸನಗರ ತಾಲೂಕಲ್ಲೂ ಮಂಗಗಳ ಸಾವು

ಹೊಸನಗರ : ತಾಲೂಕಿನ ಸಂಪೆಕಟ್ಟೆ ಸಮೀಪ ಕಾರಗೋಡು ಗ್ರಾಮದಲ್ಲಿ ಮಂಗಳವಾರ ಎರಡು ಮಂಗಗಳು ಮೃತಪಟ್ಟಿವೆ. ಮರದ ರೆಂಬೆಯಲ್ಲಿ ನೇತಾಡುವ ಸ್ಥಿತಿಯಲ್ಲಿದ್ದ ಮಂಗಗಳ ಕಳೇಬರವನ್ನು ಪರೀಕ್ಷೆ ನಡೆಸಲಾಗಿದೆ. ಅಲ್ಲದೇ ತಾಲೂಕಿನ ಪುರಪ್ಪೆಮನೆ ಸಮೀಪದ ಹಿರೆಬಿಳಗೋಡು ಎಂಬಲ್ಲಿ ಒಂದು ಮಂಗ ಮೃತಪಟ್ಟಿದ್ದು, ಮಾದರಿಯನ್ನು ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ.

ಸಾಗರ-ಹೊಸನಗರ ಗಡಿ ಭಾಗದ ಹಸಿರುಮಕ್ಕಿ ಅರಣ್ಯದಲ್ಲಿಯೂ ಮಂಗಗಳು ಸತ್ತಿರುವುದು ವರದಿಯಾಗಿದ್ದು, ಮುನ್ನೆಚ್ಚರಿಕೆ ಕ್ರಮವಾಗಿ ಸಮೀಪದ ಬೈದೂರು ಗ್ರಾಮಸ್ಥರಿಗೆ ಕೆಎಫ್‌ಡಿ ಲಸಿಕೆ ನೀಡಲು ಸಿದ್ಧತೆ ನಡೆಸಲಾಗಿದೆ. ತಾಲೂಕಿನಲ್ಲಿ ಜನರಿಗೆ ಮಂಗನಕಾಯಿಲೆ ಸೋಂಕು ತಗುಲಿರುವ ಯಾವುದೇ ಪ್ರಕರಣ ಇದುವರೆಗೂ ದಾಖಲಾಗಿಲ್ಲ. ಶಂಕಿತ ಪ್ರದೇಶಗಳಲ್ಲಿನ ಜನತೆ ಉಣ್ಣೆ ಹತ್ತದಂತೆ ತಡೆಯಲು ಡಿಎಂಪಿ ಎಣ್ಣೆ ಬಳಸಲು ತಾಲೂಕು ಆರೋಗ್ಯಾಧಿಕಾರಿ ಡಾ.ಸುರೇಶ್‌ ತಿಳಿಸಿದ್ದಾರೆ.